Éyoñe Ndône mendim, za a nga bo mewôk, ve za a nga bo melo?

Bôt abui ya melu me Noé, be mbe be bo’o ve mame me ne abé. Metata’a 6:5

Adam ba Ève be nga biaé bon, ane bôte be nga taté na ba bo abui si nyô. Melu mete, beéngele be Zambe béziñ be nga tyi’i na ba ke ngame Satan.

Be nga suse si a nyoñe nyule bôt asu na be lu’u binga. Bone binga bete be nga biaé, be mbe beémômôtô, angôndô ya ayok a ngu.

Ane si é nga jaé a bôte ba bo mbia be mam. Kalate Zambe a jô na: “Mbia mboone môt a nga dañ anen si nyô; a na môs ôse nleme wé wo bôndé ve mbia b’asimesane.”

Noé a nga vô’ôlô Zambe, nde a nga lôñe arche. Metata’a 6:13, 14, 18, 19, 22

Noé a nga be mbamba môt. Yéhôva a nga kate nye na a zu wôé mbia be bôt a zene ya beta ndône mendim.

Zambe a nga jô fe nye na, a lôñe beta sitima be nga loene na arche. Nda bôte jé, émien, a betite mevale mese bé nyiine été.

Noé a nga bemene bôte na Ndône mendime j’azu, ve be nji vô’ôlô mam a nga jô. Bôte béziñ be nga kpwe’ele nye, bevo’o ke be nga vini nye.

Éyoñe nlôñane arche ô maneya, Noé a nga bo na betit be nyiine été.