Jé é ne ayé’é ya nda bôt?

Ataté melu mvus, Yéhôva a zu a yi na nda bôt ése é kañe nye mfula’ane. Nalé ate a volô na be nye’e Yéhôva, a na be nye’esan. (Deutéronome 6:6, 7) Ajô te Bengaa be Yéhôva ya mesi mese ba nyoñ éyoñ sondô ase na ba bo ayé’é ya nda bôt. Ba fase ngume nlô ajô ô ne volô na be subane bebé, be subu fe Yéhôva bebé. To’o wo nyiñ étam, nyoñ ôyôm éyoñ sondô ase na ô yé’é nlô ajô éziñe ya Bible.

Éyoñe ya subu Yéhôva bebé. “Suba’ane Zambe bebé, ndemben a ye subu mia bebé.” (Jacques 4:8, Mfefé Nkôñelan) Bi ne tu’a yeme Yéhôva éyoñe bia yé’é mefulu a mimboane mié Kalate Zambe été. Nlañane Bible a nda bôte jôé ô ne mbamba zene ya taté ayé’é ya nda bôt. Mi ne tôñe nlañane Bible ya ésulane bia loene na Ényiñe Kristen a ésaé nkañete jangan. Nda bôt ése é ne kabane bifuse ya lañ, mvuse ya valé, mi nga fase bie.

Éyoñe ya late minkañe ya nda bôt. Éyoñ ngal ba nnôm, bebiaé a bon, ba nyoñ éyoñe ya yé’é Kalate Zambe fufulu, élate jap ja bo ngul. Môt ase a yiane yange éyoñe te a mevak. Bebiaé ba tobe minlô bifia mi ayian a bone bap, aval ane mi mi ne volô be na be dañe meve’ele ba tôbane me e sikôlô. Be ne koone minlô bifia mite e Nkume mmombô a bete, a e Vee ôyo!, nge ke anjeñe mefoé dangan, jw.org. Nge ésoé jenan éziñ ja tôbane minju’u e sikôlô, mi ne jeñe melebe me ne volô nye na a dañe minjuk mite. Mi ne fe yene bingeñegeñe ya Télé Bengaa be Yéhôva (tv.jw.org) éyoñe te nje mia laane mame me mbe mfi été. Menda me bôte méziñe ma nye’e fe me yé’é bia. Be ne fe di a nyu mone jôm éziñ éyoñ ayé’é é maneya.

Abeñ éyoñe mia nyoñe sondô ase na mia kañe Yéhôva nda bôte, da ye volô mia na mi tabe mevak éyoñe mia yé’é; a Yéhôva Zambe a ye botane ngule mia ve.​—Besam 1:1-3.

• Amu jé bia nyoñ éyoñe ya bo ayé’é ya nda bôt?

• Aval avé bebiaé be ne bo na éyoñe te é bo éyoñe mevak asu nda bôt ése?