Ésaé évé bemvendé ba bo akônda?

Bia ya’ane ke betebe ôsu ya ékôane jangan. Bemvendé bangan ba ‘ba’ale akônda Zambe’ aval é mbe é boba’ane melu mvus. (Mam minlôman 20:28) Biwôlô befam bite be ne bitôtôlô nsisim été. Ba bo ésaé jap “saa a ntindan, ve a nye’an, aval ane Zambe a kômbô. Saa amu [ba] sôñe ma’an, v’amu nya nkômbane ya bo ésaé.” (1 Pierre 5:1-3) Ésaé évé bemvendé ba bo asu dangan?

Ba nyoñe bia ngap a ba’ale bia. Bemvendé ba liti bia zen a ba’ale fe bia akônda été mfa’a ya nsisim. Ba jôé ki Bekristene bevok amu ba yeme na Zambe émiene nnye a nga ve be mbe’e ôte. Ve ba ve ngul ése na be tabe mvo’é a meva’a été. (2 Becorinthien 1:24) Aval ane mba’ale mintômba a wulu a mintômba mié, avale te fe bemvendé ba jeñe na be tu’a yeme mintômba mise y’akônda.​—Minkana 27:23.

Ba ye’ele bia avale bi ne bo nkômbane Zambe. Sondô ase, bemvendé ba ye’ele bia e bisulan mame me ne bo na mbunane wongan ô wôn. (Mam minlôman 15:32) Biwôlô befam bete ba liti bia éve’ela nkañete. Éyoñe bia ke nkañete a be, ba liti bia aval avé bi ne yeme bo ésaé nkañete éte.

Ba ve môt ase ya be bia ngule nyul. Bemvendé ya mekônda be wô’ô ve bia melep. Be ne bia me ve Aba Éjôé, nge menda mangan. Melebe mete ma ve bia ngule nyul.​—Jacques 5:14, 15.

Ésaé jap é nji bo ve akônda. Abui y’été é bili mesu mésaé mefe a mimbe’e ya nda bôt. Mam mete mese ma nyoñe be abui éyoñ. Bia yiane be semé amu beta ésaé ba bo asu dangan.​—1 Bethessalonicien 5:12, 13.

• Ésaé évé bemvendé ba bo?

• Aval avé bemvendé ba liti na ba nyoñe môt ase ya be bia ngap?