Za ba loone na ôlo ô ne mewôk a fek?

Valé awu dé é nto bebé, Yésus a nga laan a beyé’é bé benyin, Pierre, Jacques, Jean a André. A nga ve be ndeme ja liti nzuane wé melu y’asu’ulan. Eyoñe te a nga sili na: “Za a ne [ôlo ô ne mewôk a fek, MN] masa wé a nga telé e be bôte ya nda jé asu ya ve be bidi éyoñe ja yian?” (Matthieu 24:3, 45, Mfefé Nkôñelan; Marc 13:3, 4) Yésus a nga jô be na, melu y’asu’ulan, a ye tobe bôte b’aye ve be bidi ya nsisim bi ayian. Za a ye bo ôlo ôte?

Ô ne mone nsamba bôt a ne ñwo’ane mbon. “Ôlo” ôte ô ne fe Tin Ékôane Bengaa be Yéhôva. Wo ve bebo bésaé be Yéhôva bese bidi ya nsisim éyoñe ja yian. Ényiñe jangane ya nsisim é tii “ngabe bidi [ba ve bia, MN] éyoñ ja yian.”​—Luc 12:42.

Wo belane nda bôte Zambe. (1 Timothée 3:15) Yésus a nga ve ôlo ôte beta mbe’e ya belan akume ya ékôane Zambe si va. Mbe’e ôte wo fombô fe ésaé nkañete a ñye’elan. Ôlo ôte wo ve bidi ya nsisim a zene ya miñye’elane bia nyoñe bisulan a bitôkan. Wo ve fe bia bekalate bia belane be nkañete.

Amu jé ba jô na ôlo ôte ô ne mewôk a fek? Ô ne mewôk amu wo tôñe benya mejôô a ésaé nkañete Yésus a nga ve be. Ôlo ôte wo liti fe na ô ne fek amu wo telé mam ma fombô Krist ôsu. (Mam minlôman 10:42) Yéhôva a botaneya wô amu a bo na ésaé nkañete é wum abui bibuma, a na bidi ya nsisim bi bo abui.​— Ésaie 60:22; 65:13.

• Za Yésus a nga telé na a ve beyé’é bé bidi ya nsisim?

• Amu jé ba jô na ôlo ôte ô ne mewôk a fek?