Ésaé évé Tin Ékôane ja bo den?

Ntete mimbu ôsusua, mone nsamba minlôman a bemvendé ya Jérusalem, nnye a mbe tin ékôan. Be nga to be nyoñe beta mintyi’an asu Bekristene bese ya melu mete. (Mam minlôman 15:2) Jé é mbe é bo’o na be kui tyiñ? Be nga bo be nyoñ éyoñe ya fase mejô ya Kalate Zambe, be jôké’é fe na nsisim Zambe ô volô be. (Mam minlôman 15:25) Avale te nde fe da bobane den.

Zambe a belane Tin Ékôane na nkômbane wé ô boban. Bobejañe ya Tin Ékôane ba nye’e ba yé’é Kalate Zambe. Be mbili abui ñyemane mfa’a ya ésaé nkañetane mbamba foé a mame ya nsisim. Ba tôban éyoñe jia sondô ase na be fase mame ma sili asu bobenyañe bap ya si se. Aval ane ntete mimbu ôsu, ba ve melebe ma so Kalate Zambe a zene ya bekalate a bejome mekônda. Nalé a volô na bia bese bi bo jôme jia. (Mam minlôman 16:4, 5) Tin Ékôan éte ja kômesane bidi ya nsisim. É tele ôsu mfa’a ya ésaé nkañetane mbamba foé; ja fombô fe aval avé bemvendé ba bo ésaé jab akônda.

Ja yebe na mbamba nsisim a liti nye zen. Tin Ékôane ja wulu avale Yéhôva ba Yésus ba jô. (1 Becorinthien 11:3; Beéphésien 5:23) Bôte bete ba nyoñe ke bebiene na be ne bivet asu bobenyañ bap ya nsisim. Baa Bekristene bevok be ne miñwo’on ba ke ôsu a “tôñe mon ntômba [Yésus] vôm ase a ke.” (Nlitan 14:4) Tin Ékôane ja yene mvaé na bi ye’elan asu dé.

• Beza be mbe tin ékôane ya melu mvus?

• Aval avé Tin Ékôane ja wulu ane Zambe a yi den?