AYÉ’É 10
Aval avé ô ne yemelane nya ñyebe?
1. Ye nya ñyebe a ne ve wuwua?
“Taba’ane bekuli mejô be ne medu’an ntye.”—MATTHIEU 7:15.
Yésus a nga ye’ele beyé’é bé na, nya ñyebe a ne ve wuwua. Zen été é ne nyi ja ke bôte, ényiñe ya nnôm éto. Yésus a nga jô na: “bôte be ayene je be ne tyôtyoé.” (Matthieu 7:14) Zambe a kañese fo’o ve ñyebe wo so benya mejô été. Benya bekañe Zambe bese, be ne nlatane mbunane wua.—Lañe Jean 4:23, 24; 14:6; Beéphésien 4:4, 5.
Yene’e vidéo a ne nlô ajô na Ye Zambe a kañese befatane b’ékaña’a bese?
2. Yésus a nga jô jé mfa’a ya bivuse bekristen?
“Ba jô na, be ayeme Zambe; ve be akate nye a mimboane mi mame miap.”—TITE 1:16.
Yésus a nga bemene bia na, bekulu mejô ba laane minsos, b’aye ndamane miñye’elane mié. Nde ñhe, nya ñyebe a selane miñyebe mise mivok, mia ye’ele asimesane bôt. Miñyebe mite mia jô na, mi ne bekristen, ve ô ne ngule ya yemelan avale bôt avé be né. Aval avé? Fo’o ve nya ñyebe étam, nnye a kuli benya bekristen. Mimboane miap a mefulu map, mmie mi ne bo na be yeme be.—Lañe Matthieu 7:13-23.
3. Aval avé ô ne yemelane benya bekristen?
Tame fombô mendem metane ma:
Benya bekristene ba nyoñe Kalate Zambe ane mejô m’aso be Zambe. Ba jeñ a ngul ése na, be ke ôsu a nyiñ avale metiñe y’été me né. Nalé a liti na, nya ñyebe a selan a miñyebe mise mivok, mia ye’ele asimesane bôt. (Matthieu 15:7-9) Benya bekristene be nji kañete jôm éfe, a bo aval afe.—Lañe Jean 17:17; 2 Timothée 3:16, 17.
Benya bekristene ba wumulu éyôlé Zambe, Yéhôva. Yésus a nga wumulu éyôlé Zambe, a bo na, bôte be yeme je. A nga volô bôte na be yeme Zambe. A ye’ele fe be na, be ye’elan na, jôé dé é bo étyi. (Matthieu 6:9) Ñyebe ôvé, wo bo na bôte be yeme éyôlé Zambe vôm ô too?—Lañe Besam 68:4; Jean 17:26.
Benya bekristene ba kañete Éjôé Zambe. Zambe a nga lôme Yésus na, a zu kañete mbamba foé mfa’a ya Éjôé Zambe. Éjôé Zambe nje étam é ne ndi nlem bôte bese ya si. Yésus a nga ke ôsu a kobô ajô te, akekui môs awu dé. (Luc 4:43; 8:1; 23:42, 43) Yésus a nga jô na, beyé’é bé b’ayiane kañete ajô te. Nde, nge môt a zu laane wo ajô y’Éjôé Zambe, wo ye simesane na, môt ate a ne ñyebe ôvé?—Lañe Matthieu 24:14.
Benya bekristene be nji nyoñe ngap a émo ji. Ô ne yeme be, amu be nji nyoñe ngap a pôlitik, bita a na, be nji bo bingôngôm minjoñ. (Jean 17:16; 18:36) Nalé fe, be nji vu mbia bemam ya émo ji, a be nji bi mefulu ya été.—Lañe Jacques 4:4.
Benya bekristene ba nye’esan abui. Be nga yé’é e mejô me Zambe été na, ba yiane semé bôte ya meyoñe mese. Bivuse miñyebe mia ke ôsu a suk bita ya meyoñ a ngule jap ése. Ve benya bekristen be nji bo avale mam te. (Michée 4:1-3) Benya bekristen, be ne anyep: ba belane éyoñe jap, biôme bi mo biap, na be volô bôte bevok a na, be ve bôte bevok ngule nyôl.—Lañe Jean 13:34, 35; 1 Jean 4:20.
4. Ye ô ne yemelane nya ñyebe?
Ñyebe ôvé wo nyoñe miñye’elane mié mise e Kalate Zambe été? Ñyebe ôvé wo wumulu éyôlé Zambe? Ñyebe ôvé wo kañete na, Éjôé Zambe é ne ndi nlem bôte bese ya si? Nsamba bôt ôvé wo liti nye’an, a ôvé ô nji nyoñe ngap a bita? Wo simesane aya?—Lañe 1 Jean 3:10-12.