Ye biyoñe biziñ ô wô’ô wô’ôtan ane ô ne étam, ô ko fe woñ?

Tame yene mone mongô a ne fôtô nyi. Nga a ne ane a wô’ôtane na a ne étam, a ko fe woñ? Ye wo fe ô wô’ôtaneya nalé môs éziñ?— Môt ase ya be bia a ne wô’ôtane nalé biyoñe biziñ. Kalate Zambe a kobô ajô bemvôé be Yéhôva be nga wô’ôtane fe na be ne étam, a be nga ko woñ. Wua ya été a mbe Élie. Bi tame zu kobô ajô dé.

Élie a nga nyiñ Israël ayab éyoñ ôsusua na Yésus a zu bialé. Achab nye a mbe njô bôte ya Israël melu mete; a nji be a kañe Yéhôva. Ba Jézabel minga wé, be mbe be kañe Baal, évôlevôla zambe. Nde jamete é nga bo na abui bôte ya Israël be taté fe na ba kañe Baal. Jézabel a nga be angôndô ya mbia minga, a mbe a kômbô wôé Élie a bôte bese bevo’o be mbe be kañe Yéhôva. Ye wo yem aval avé Élie a nga bo?—

Élie a nga tup! Nde a nga ke kui nkôte si, a ke sobô mbas akok. Wo buni na jé é nga bo na a tup?— Wo bele fo’o, woñ. Ve Élie a nji be a yiane ko woñ. Amu jé? Amu a mbe a kôme yeme na Yéhôva a ne ngule ya volô nye. Yéhôva a mbe a tatéya liti Élie ngule jé. Môs éziñ, Yéhôva a nga vô’ôlô meye’elane me Élie a lôme nduane si. Yéhôva a mbe fe ngule ya beta volô nye!

Élie a too mbas akok, ane Yéhôva a nga kobô nye a jô’ô nye na: ‘Wo bo jé va?’ Nde Élie a nga yalane nye a jô’ô na: ‘Ma étam me li’iya me kañe wo. Mbôle me ne étam, ma ko woñe na be wôé ma.’ Élie a mbe a buni na be maneya wôé bebo bésaé be Yéhôva bevo’o bese. Ve Yéhôva a nga jô nye na: ‘Jôm éziñ é nji bo ane wo buni. Bôte toyini zañbwa befe be nga’ane be kañe ma. Bi ngul. Me nga’ane me bili abui ésaé ya ve wo!’ Ye wo buni na Élie a nga wô’ô mvaé éyoñ a maneya wô’ô Yéhôva a kobô nalé nga?—

Jam é nga kui Élie é ne wo ye’ele jé?— Ô nji yiane wô’ôtane womien étam môs éziñ, nge ko woñ. Ô bili bemvôé ba nye’e Yéhôva a ba nye’e wo. A fe na, Yéhôva a ne ngul abui, a é ke ôsu a ba’ale wo! Ye wo wô’ô mvaé ya yeme na ô nji ve’ele bo étam?—