Timothée a mbe a kômbô volô bôt

Timothée a mbe avale ndôman da nye’e da volô bôt. A nga be a kele mulu na a ke volô bôte bevok. Jamete é nga bo na, a bi angôndô ya abeñ ényiñ. Ye wo kômbô yeme nlañe wé?—

Timothée a nga yaé e tisone be mbe be loone na Lystre. Éyoñ a mbe mone mongô, émvame jé Loïs a nyia wé, Eunice, be nga taté na ba ye’ele nye mame ma lat a Yéhôva. Nté Timothée a mbe a yaé, a nga yi na a volô bôte bevo’o na be yeme Yéhôva.

Éyoñe Timothée a mbe a nga’ane ndômane môt, Paul a nga jô nye na, a ke litane nye mevôme mefe na be ke ba kañete. Ane Timothée a nga yalane na: ‘Ma kañese!’ A mbe a nto nkômesane na a ke volô bôte bevok.

Timothée ba Paul be nga ke tisone ya Macédoine be mbe be loone na Thessalonique. Asu na be ke kui wôé, be nga yiane wulu ayap éyoñ, a su’ulane ke nyoñe sitima. Éyoñe be kuiya wôé, be nga volô bôte na be yeme Yéhôva. Ve jame da, bôte béziñe be nga wô’ô mbia ôlun a be nga jeñe na be bo be abé. Nde Paul ba Timothée be nga kôlô vôm ate, a ke kañete vôme mfe.

Éyoñe bone bengon be lôteya, ane Paul a nga jô Timothée na a bulan e Thessalonique asu na a ke yemelane nge bekristene ya wôé be ne mvo’é. É nji be tyi’ibi na Timothée a beta bulane tisone te! Ve, Timothée a nga beta ke wôé amu a mbe a wô’ô bekristene ya wôé mintaé. Ane a nga bulan a mbamba mefoé asu Paul. Bobejañe ya Thessalonique be mbe be too nya mvo’é!

Timothée ba Paul be nga saé nsamba abui mimbu. Paul a nga tili na a bili ki môte mfe a mbe lôme na a ke volô mekônda ane Timothée. Timothée a mbe a nye’e Yéhôva, a nye’e fe bôt.

Ye wo nye’e fo’o bôt, a kômbô volô be na be yeme Yéhôva?— Nge nalé, yeme na ényiñe jôé jé bo angôndô ya abeñ, fo’o ve ane ji Timothée é mbe!