Aval avé mia yiane belane moné

Bia bese bia yi moné asu na bi ve nda bôte jangane biôme bi ayian. (Minkana 30:8) Ja’a ba jô aya, “moné a ne jôme [ja ba’ale] môt.” (Ecclésiaste 7:12) É wô’ô bo ayaé biyoñe biziñe na bôte be ne nlu’an be kobô ajô moné, ve te mia jô’é na mam me moné me so mia mejô alu’u denan. (Beéphésien 4:32) Bôte be ne nlu’ane ba yiane tabe ndi, wua a nyô mbok, ba yiane fe belane moné wop avale ba te tyik.

1 TA’ANÉ AVAL MIA YE BELANE MONÉ

JÔME KALATE ZAMBE A JÔ: “Za ya be mia, nge a kômbô lôñe nkum, a bo te taté tabe si asu ya bo metañe ya moné a yian ésaé, a yene nge a bili abime da ye bo na ésaé te é man?” (Luc 14:28, Mfefé Nkôñelan) É ne mfi na mi fase nsamba aval avé mia ye belane moné wônan. (Amos 3:3) Tyi’ané jé mia yiane kus, a abime moné avé mia yiane belane de. (Minkana 31:16) Sa ke ve amu mi bili moné ya kuse jôm éziñ nde mia yiane kuse jôme te. Mi sa’ale bikôla. Mi belane ve abime moné mi bili.​—Minkana 21:5; 22:7.

JÔM Ô NE BO:

• Nge amane ngon, mi ngenane mi bili moné, mia bebaé mia yiane tyi’i aval avé mi ne belane nye

• Nge é bo ki na amane ngon, mi ntoo teke fe jôm éziñ, jeñané na mi sé’é biôme mia kus. Éko éziñ, mia ye jiba yame jôme ya di nda, a lôte na mi ke kuse bidi nseñ

2 KATE BEBELA, A TYELÉ NFEK NKÔÑE WÔÉ

JÔME KALATE ZAMBE A JÔ: “Bia ve ngule ya bo mvaé, saa ve e mise me Zambe étam, ve nalé fe e mise me bôt.” (2 Becorinthien 8:21, Mfefé Nkôñelan) Kate môt ô nga lu’u bebela, te solé nye abime moné ô bili, a abime moné wo belane de.

Te wo nyoñe beta minty’iane mi alat a mam me moné, teke taté kui tyiñ a môte mia nye mi ne nlu’an. (Minkana 13:10) Éyoñe mia kate bebela mfa’a ya mame me moné, nda alu’u jenan jé tabe mvo’é. Te jô na moné wo nyoñ a ne éngôé, moné ate a ne asu nda bôt ése.​—1 Timothée 5:8.

JÔM Ô NE BO:

• Tyi’ané abime moné avé môt ase a ne belane de teke taté sili nyô mbok

• Te mia yange na njuk éziñ ô kui ôsusua na mi kobô ajô moné