Ényiñe ja tyendé éyoñe mia biaé mon

Abialé mon é ne so abui mevak alu’u denan, é ne fe tyendé abui mam. Mia ye yene fe na, mba’alane mon wo sili abui éyoñ a mengul a dañe mame mefe. Minju’u mi ne kui alu’u denan amu mia kate beta ke ôyo avale da yian, a na abialé mon ja bo na mi wô’ôtane mam aval étam. Mia bese bebaé, mia yiane tyendé mame méziñ ényiñe jenan asu na mi ba’ale mon, a na mi ba’ale élate jenan. Aval avé melebe ya Kalate Zambe me ne volô mia?

1 MI YEME WÔ’Ô AVAL AVÉ MON A TYENDÉYA ÉNYIÑE JENAN

JÔME KALATE ZAMBE A JÔ: “Nye’an wo ajaé jibi, a ô ne mvam.” Nde fe, nye’an “ô ne te jeñe mam mé, ô ne te yaa.” (1 Becorinthien 13:4, 5) A minga, é ne mvo’é na ô ve fo’o nyo mon abui éyoñ. Ve yeme fe na nyo nnôm a ne wô’ôtane ve ane ô bili ki fe éyoñe jé; nde ñhe, te vuane na wo yiane fe nyoñe ngap a nye. Volô’ô nye évôvoé été na a yeme na nye’ fe a ne wo volô ba’ale mon.

“A mia beyôm . . . mi taba’ane benyo beya aval ane ñyemane ya été.” (1 Pierre 3:7) Yeme na éyoñe ji nyo ngal a mbili mon. A mbili mimbe’e mife, a jamete é ne bo adit asu dé; é ne fe bo na biyoñe biziñ, a wô’ô mame mese njuk. Biyoñe biziñe bia ye kui na a viane yaa a wo, ve te wo wô’ô nye ôlun, amu “nyô a ne ôte’ete’e ya yaa, a dañe môt a ne éwôlô.” (Minkana 16:32) Yeme’e yene na minga wôé a yiane mvolan a volô’ô nye.​—Minkana 14:29.

JÔM Ô NE BO:

• Ésa: Volô ba’ale minga wôé mon, ja’a e zañ alu. Jeñe na ô sé’é éyoñe wo lôte na wo bo mame mefe asu na ô ve nyo ngal ba mone wônan abim éyoñe da sili

• Nyia: Te biasé mengule nyo nnôm a ve na a volô wo. Nge a dañe ke yem ésaé te, te komekane nye, ve ye’ele nye avale ba bo je

2 MI WÔNÔ ÉLATE JENAN

JÔME KALATE ZAMBE A JÔ: “B’aye bo nsône wua.” (Metata’a 2:24) Ja’a mfefé môt ô nyiineya nda bôte jenan, te mia vuane na mia bebaé mi ngenan “nsône wua.” Va’ané mengule mese na mi yemete élate jenan.

Binga ba yiane ve beyôme bap akiba amu mvolane ba volô be. Bifia mia se’e bie beyôme benan bi ne bo “ane mvo’é ya minsôn.” (Minkana 12:18) A beyôm, mi kate benyo beyale na mia nye’e be angondô ya abui. Se’ané be amu ésaé ba bo asu nda bôt ése.​—Minkana 31:10, 28.

“Môt a bo’o te jeñe mvaé jé émién, ve môt ase a jeñe mvaé bôte befe.” (1 Becorinthien 10:24) Bo’o môt ô nga luk mame me ne mvaé éyoñ ése. Môt ase ya be mia, a nyoñ éyoñe ya laan, éyoñe ya sek, a éyoñe ya vô’ôlô nyô mbok. Mfa’a ya nkeane binoñ môt ase ya be mia a jeñe na a jalé miñyiane mi môte mbok. Môt ase a vô’ôlô miñyiane mi nyô mbok. Kalate Zambe a jô na: “Wua a bo te tyi nyô mbok, vengevenge ve [mia kui tyiñ, Mfefé Nkôñelan.]” (1 Becorinthien 7:3-5) Nde ñhe, kobane jamete môt ase a kobô zôsôô. Nge mia yeme jibi a wô’ô nyô mbok, mia ye wônô élate jenan.

JÔM Ô NE BO:

• Te mia vuane nyoñ éyoñe ya tabe ve mia bebaé étam

• Bo’ané bone be mame ba liti na mia nye’esan, ane e tili bone bekalate nge e ve bone be das

3 YE’ELANÉ NKEÑELÉ MONE WÔNAN

JÔME KALATE ZAMBE A JÔ: “Aso ébôbo’o abialé dôé, wo yeme mimfufube mintilan; mi bili ngule ya ve wo fe’e ja ke kui nyian.” (2 Timothée 3:15, Mfefé Nkôñelan) Kômesa’an avale wé ye’ele nkeñelé mone wôé. Mon a ne ngule ya yé’é abui mam ja’a éyoñ a nga’an abum été. A ne ngule ya yeme tyiñe jenan, a fô’ôsan éyoñe wo wô’ô mevak nge wô’ô ôlun. Lañe nye bekalate ja’a a nga’ane nkeñelé mon. Ja’a a vo’o ki kôme wôk jôme wo lañ, mame mete me ne volô nye na a nye’e nlañane bekalate éyoñ é bo nya môtô.

Te buni na mon a vo’o ki vô’ôlô mejô me Zambe amu a nga’ane ntyen. Bo’o na a vô’ôlô ane wo ye’elane Yéhôva. (Deutéronome 11:19) Ja’a éyoñe wo vôé a nye, ô bo’o ô liti nye biôme Zambe a nga té. (Besam 78:3, 4) Nté a yaé, é yeme na wo nye’e Yéhôva, jamete jé volô nye na nye’ fe a yé’é na a nye’e nye.

JÔM Ô NE BO:

• Ye’elane Yéhôva na a ve wo fek ya ye’ele mone wôé

• Ba’alane mone wôé minlô bifia asu na a taté na a yé’é mie a too mongô