Aval avé mia yiane ye’ele mone wônan

Éyoñe Yéhôva a nga kôme nda bôt, a nga telé na bebiaé mbe ba yiane be’e mbe’e ya bone bap. (Becolossien 3:20) A bebiaé, mia mia yiane ye’ele mone wônane na a nye’e Yéhôva a na a bo môt akiti. (2 Timothée 1:5; 3:15) Mia yiane fe yeme jé é ne nleme mone wônan été. Yemane na éve’ane miabebien mia liti nje ja dañe mfi. Mi ne yeme ye’ele mone wônan mejô me Zambe nge mejô mete me ne mia nlem été.​—Besam 40:8.

1 BO’ANÉ NA MONE WÔNAN A NYE’E A LAAN A MIA

JÔME KALATE ZAMBE A JÔ: “Bo’ avôle ya wôk, ôte’ete’e ya kobô.” (Jacques 1:19) Wo yi na bone bôé be laan a wo teke ko woñ. Ba yiane ñhe yeme na, wé vô’ôlô be éyoñ bé yi na ba kobô a wo. Bo’o na te jôm éziñ ja ndeñele be na be kôme wo yoé nleme wop. (Jacques 3:18) Nge be yene na wé yaa, nge wô’ô ôlun, ba ye ke beta kate wo mame me ne be nlem. Te bo ôjeja’a, kate fe be éyoñ ése na wo nye’e be.​—Matthieu 3:17; 1 Becorinthien 8:1.

JÔME MI NE BO:

• Éyoñe bone benan ba kômbô laan a mia, te mia titane be ja’a mi bili ki éyoñ

• Te mia jeñe na mi laan a bone benan fo’o ve éyoñe ajô éziñ é ne

2 JEÑANE NA MI WÔ’Ô JÔM ÉBIEN É NE BE NLEM ÉTÉ

JÔME KALATE ZAMBE A JÔ: “Nyô a ve nlem mfa’a ya [jam éziñ] a ye yene mvaé.” (Minkana 16:20) Biyoñe biziñ dé sili mia na mi kôme wô’ô jôme ba kômbô jô, teke tate tebe ve bifia mia wôk. Bisoé bia yeme beté ôdo’é nge ke jô mame ba simesane ki. “Nyô a yalan te taté vô’ôlô, akut a jo’ojo’o le bi ne be nye.” (Minkana 18:13, Mfefé Nkôñelan) Nde ñhe, te bo avôle ya wô’ô ôlun.​—Minkana 19:11.

JÔME MI NE BO:

• Tyi’i na wo ye ke tyi’i mone wôé nkobô, nge wô’ô ôlun éyoñ a kañete wo jôm éziñ, ja’a a te bo mbia jam

• Simesan avale womien ô mbe ô wô’ôtan éyoñ ô mbe ane nye

3 BIANÉ ÔSIMESANE WUA

JÔME KALATE ZAMBE A JÔ: “A mone wom, wô’ô melepe [me] éso, a te jô’é metiñe me nyua.” (Minkana 1:8) Yéhôva a nga ve mia bese mbe’e ya yale bone benan. Mia yiane ye’ele bone benane na be semé mia a na be bo mia mewôk. (Beéphésien 6:1-3) Bone benan be ne yeme na éyoñe ji, pepa ba mema be nji bo nlatan “a nleme wua, a nkañesane wua.” (1 Becorinthien 1:10) Nge mi nji bo tyiñe jia, te mia bo na bone benan be yene de, amu be ne taté na ba biasé mia.

JÔME MI NE BO:

• Tyi’ané aval avé mia ye lep, nge foñôsô mone wônan

• Nge mi lôô ki mam avale da mfa’a ya ye’ele bone benan, kobane de mia bebaé akekui mia ye kui tyiñ

4 MI TATE KÔMESAN

JÔME KALATE ZAMBE A JÔ: “Ye’ele mongô zen a yiane ke.” (Minkana 22:6) Bone benan ba ye ke bo bôt atemetem. Mia yiane kômesan avale mi lebe be. (Besam 127:4; Minkana 29:17) E lep a tinane ki ve na mi foñôsô, a tinane fe na mi volô bone benan na be yem amu jé ba yiane tôñe metiñe ya nda. (Minkana 28:7) Mi ye’ele fe be na be nye’e Kalate Zambe a na be yeme miñye’elane mié. (Besam 1:2) Nalé ate é volô be na be ye’ele mone môte ya nleme wop.​—Behébreu 5:14.

JÔME MI NE BO:

• Mi volô bone benane na be yene Zambe ane vevea môt, a na be ne tabe nye ndi

• Mi volô be na be yeme yene mame me ne tindi be na be bo jam é ne abé, a sa’ale me, mame mete me ne bo internet nge téléfôn. Ye’elané be aval ba yiane sa’ale bôte bijabô