Jean Baptiste a kôme zen

Mimbu 17 mi lôteya nté ane Yésus a nga sili beye’ele ya temple minsili, valé a bili mimbu 12. Bi ne atata’a ya mbu 29 É.J. Abui bôte da kobô ajô Jean, évuvumane Yésus, môt a kañete afôla ese ya fefel Ôsôé Jourdain.

Jean a ne étua môt, ataté a mbote wé akekui a mam a kobô. A be’e biyé bi ne nkôman a mimvot mi chameau, a kandé ékôp é tii nye angeteñ. A di bitandak a wôé ya afan. Foé fé a kañete? A jô na: “Kôñela’ane minlem amu éjôé ya yôp é ntoo bebé.”​—Matthieu 3:2, Mfefé Nkôñelan.

Bôte ba zu wô’ô foé Jean a kañete, be ne mevak. Abui da yemelane na, ba yiane kôñelane minlem, ba yiane tyendé abo dulu dap, a kandane mbia ényiñe be nga too be nyiñik. Bôte ba zu be nye, be ne bôte ya Jérusalem a ‘bôte bese ya Judée, a bôte bese be ne afôla ya Jourdain.’ (Matthieu 3:5) Abui bôte da zu be Jean da kôñelane minlem. A du be mendime ya Jourdain été. Amu jé?

Nduane Jean a du bôt ô ne ndeme ja liti na, bôte bete be kôñelaneya minlem a jôban abé dap mfa’a ya Atiñ ya élate Zambe a nga bo a be. (Mam Minloman 19:4) Ve bese be nji tebe été ja yian asu nduan. Éyoñe betebe ôsu ya bamiñyebe béziñ, Bepharisien a Besadducéen ba zu be nye, Jean a loone be na “mvoñe mekpwel.” A jô na: “Wumane ñhe ébuma ja yiane nkôñelane nlem, a te mia bo zezé énguñ e be miabebien na: Abraham a ne ésaa wongan! Amu ma kate mia bebela na, Zambe a ne soo Abraham bon e meko’o ma. Amu ôvôn ô mbôô tine bilé a élé ése ja ye bo te wume bibuma bi ne mvaé, ba ye ba’é je a wua je e nduan.”​—Matthieu 3:7-10, Mfefé Nkôñelan.

Mbôl abui bôte da zu be Jean, a na a bili ngule foé a du fe abui bôt, ba lôme beprêtre a Belévite na be zu sili nye na: “Ô ne ne za?”

Jean a meme na, “Sake ma me ne Krist.”

Nde ba sili nye na, “Wo jô aya? Ye wo ô ne Eli?”

Nye na, “Sake ma.”

Ane ba sili nye na, “Ye ô ne nkulu mejô?” Nge na, beta nkulu mejô Moïse a nga jô na a ye so.​—Deutéronome 18:15, 18.

Jean nye na, “Teké’é!”

Ane ba yemete nye a jô nye na: “Ô ne ñhe za? Amu bia yiane ve e bôte be nga lôme bia éyalan: wo jô womien aya?” Jean nye na: “Me ne tyiñe môt a ke a yôtan afan afane na: Kômane zene Nti, aval ane nkulu mejô Ezayi a nga jô.”​—Jean 1:19-23, Mfefé Nkôñelan.

Nde ba sili nye na: “Ve amu jé wo du bôt, nge ô nji bo Krist, nge Eli, nge ke nkulu mejô?” A ve be éyalan é ne njalan a fek: “Ma ma du bôt a mendim; ve môt éziñ a ntele mia zañ, e nyu mi nji yem, a zu me mvus.”​—Jean 1:25-27, Mfefé Nkôñelan.

Ôwé, Jean a liti fo’o na, éyoñ a volô bôte be bili mbamba nleme na, be kañese Messie be nga ka’ale, a kôme nyô a ye bo Njôô zen. Mfa’a wôé, Jean a jô na: “Nyô a zu ma mvus a ne ngul a dañe ma: me nji bo nyô a yiane vaa nye besilefas.” (Matthieu 3:11, Mfefé Nkôñelan) Jean a beta jô jô na: “Môt a zu me mvus a ne me ôsu: amu a nga to me ôsu.”​—Jean 1:15.

Nde, éyoñe Jean a jô na, “Kôñela’ane minlem amu éjôé ya yôp é ntoo bebé,” foé éte ja yiane fo’o. (Matthieu 3:2, Mfefé Nkôñelan) A volô bôte bese be yeme na, ésaé Yésus Krist, Njôô Yéhôva a ye telé, é nga zu taté.