Asimba baa e Cana

Éyoñ a lôteya melu mebaé e Samarie, Yésus a bulane si jé. A boya beta ôbane nkañete si ya Judée, ve a nji bulane Galilée na a ke wo’on. A viane taté beta ésaé e si a nga yaé. A nji be a yange na be nyoñe nye mvo’é wôé, amu aval ane émien a nga jô, “nkulu mejô a nji bi ésemen e si jé.” (Jean 4:44, Mfefé Nkôñelan) A lôte na be tabe a nye, beyé’é bé ba bulane mesi map, menda me bôte map, a mesu m’ésaé map.

Foé fé Yésus a taté na a kañete? E nje nyi: “Éjôé Zambe é nto bebé: kôñela’ane ñhe minlem, mi buni Mbamba Foé.” (Marc 1:15, Mfefé Nkôñelan) Aval avé bôte ba nyoñe foé éte? Abui bôte ya Galilée da nyoñe Yésus mvo’é, a ve nye duma. A nji bo fo’o ve amu foé jé. Bôte béziñe ya Galilée be nga tabe abô’ô Pâque Jérusalem bengone ya mvus a yene beta be mam a nga bo.​—Jean 2:23.

Nne Yésus a taté beta ésaé wé ya Galilée vé? Éko éziñe na e Cana, vôm a nga bo na mendim me kôñelane woon abô’ô aluk. Éyoñ a beta kui wôé éyoñe baa, Yésus a wô’ô na, mone mongô a kon abui, a nto bebé ya wu. A ne mon évete bezimbi Hérode Antipas, njô bôt a ye su’ulane wôé Jean Baptiste. Évete bezimbi éte ja wô’ô na Yésus a so Judée a kele’e Cana. Nde môt ate a kôlô nda jé e Capernaoum a zu jeñe Yésus e Cana. Évete bezimbi ja jô nye a mintaé nleme na: “A Nti, jika’a siliki, nté mone wom a ngenane te wu me.”​—Jean 4:49, Mfefé Nkôñelan.

Yésus a ve éyalane ja bo na môt ate a kam: “Kele’ wo ake; mone wôé a vee.” (Jean 4:50, Mfefé Nkôñelan) Évete bezimbi Hérode éte é nga buni mejô me Yésus, a taté fe na a bulane jale dé. E zene zañ, a tôbane belo bé, be wulu’u avôl asu na, be kate nye mbamba foé. Ôwé, monafam wôé a vee, a ne fe mvo’é! A kômbô yemelane jam ete, éyoñ éte a sili be ‘awolo mongô a nga bo mvo’é.’

Ba yalane nye na: “Ôkon wé ô nga man angô’é, awolo zangbwale.”​—Jean 4:52, Mfefé Nkôñelan.

Évete bezimbi éte ja yemelane fo’o na awolo ete ébiene nde Yésus a nga jô nye na: “Nyo mon a vee.” Mvuse ya valé, môt ate, nyi a ne nkukum a ngule ya bi belo, ba nda bôte jé ba su’ulane bo beyé’é be Krist.

Cana a ne fo’o vôme Yésus a nga bo mesimba biyoñe bibaé, a kôñelane mendim na me bo vin a su’ulane fe saé ésoé monafam é mbe nye ôyap, bebé bekiliméta 26. E ne été na, sa ke mesimba mete étam mme a nga bo. Ve asimba di é ne nya mfii amu é ne beta ndeme ya na, a bulaneya Galilée. Da yené ne ngeññ na a ne nkulu mejô Zambe a nye’e. Ve abim avé ‘nkulu mejô nyi a ye wum e jale dé’?

Jam ete da ye tu’a yené éyoñe Yésus a ye bulane jale dé e Nazareth. Jé ja yange nye wôé?