Yésus a bo na ôkôs wo to ô vuñu’u e Mañ ô tebe

Môs wo to ayap a Yésus a te saé abui. Éyoñe ngô’é ja kui, a jô beyé’é bé na: “Nkelan mfa’a ya ato’o yat,” nalé a tinane na e si ya Capernaoum yat.​—Marc 4:35.

E kindi’i yate ya Mañ ya Galilée, nlame Begérasénien ô ne wôé. Ba loene fe vôm ate na Décapole. Bitisone ya Décapole bi ne vôme metume Begrek ma dañe boban, to’o na abui Bejuif da nyiñe wôé.

Bôt ba ji’a yem éyoñe Yésus a kôlô Capernaoum. Bifunga bife bi ne valé, bia ke nsamba a nye mañ été. (Marc 4:36) Dulu éte é nji dañe bo ôyap. Mañ ya Galilée me ne ane beta ôsôé a bili évôvoé mendim, me to ayab bebé bekilimeta 21, a ndam bebé bekilimeta 12. Ve me ne édok.

Yésus a mbe a te’eya amu ngumba môs a nga ye’ele bôt. Amu nalé, nné ane éfunga ja taté dulu, a ke bômbô si, a kele ôyo.

Abui minlôman e ne atyeñ ésaé mfa’a ya wulu éfunga mañ été, ve dulu ete d’aye bo be tyi’ibi. Minkôl mia bômane Mañ ya Galilée, a mendim me wô’ô bo ayôñ. Biyoñ biziñ, évuñulu é wô’ô lôme mfebe ô so’o minkôl e mendime yôp, ô to avep. Nalé a so mbia b’akôs. Avôl avôl, mintyôa mi mañ mia zu jimbi éfunga. Éfunga é nga taté fe na ja ‘jaé a mendim’ a be ntele mbia été. (Luc 8:23) Ve, Yésus nye a ne ve ke ôyo!

Ba jeñe na be belan atyeñe dap ane be jaéya zu ba bo éyoñ ba tôban akôs, na be wulu a éfunga. Ve mam me nji bo avale da éyoñe ji. Mbôle ba ko woñe ya wu, ba vele Yésus a jô na: “A Tat, nyi’i bia; bi nga ye jañ.” (Matthieu 8:25) Beyé’é be nji kômbô wu ôsoé été!

Éyoñe Yésus a vee, a kate minlômane mié na: “Mi ako woñ amu jé? Ye mi ngenan te buni?” (Matthieu 8:26) Éyoñ éte Yésus a bam évuñulu a mañ a jô’ô na: “Tabe’e évô, bo’o ne mieññ!” (Marc 4:40, Mfefé Nkôñelan) Été été, évuñulu ve man, a mañ ve tabe ne mieññ. (Nkañete wop, Marc ba Luc ba ngôné na Yésus a nga taté bo na évuñulu é man, a mvuse ya valé nde ba kobô ajô ate’e mbunane beyé’é.)

Tame simesan aval ane jam ete da nambe beyé’é! Be ndôme yene mañ me vuñuk, a me ji’a fe beta tabe ne mieññ. Nde ba ko mbia woñ. Ane ba jô bebiene na: “Nyuna nye ñhe a ne za? amu ja’ane évuñulu, a mañ bi ve wô’ô nye?” Ba kui fe kindi’i mañe ya yat, jôme teke be bo. (Marc 4:41–5:1, Mfefé Nkôñelan) Éko éziñ, bifunga bife bia te yiane ke kui kindik, mfa’a ya ouest.

Yésus, Mone Zambe a liti na a bili ngule ya jôé ôkôs a mañ. Ñyeman ôte wo ve fo’o bia ndi nlem. Éyoñ a ye beme mise mé si va na a kôme je, bôt ba ye nyiñ évôvoé été amu bibubua bi mame bia ye bo momo!