A bo ésaé nkañete Galilée, a yañele fe minlômane mié

Yésus a boya beta ésaé nkañete tañe mimbu mibaé. Ye éyoñ é kuiya ñhe na a wo’one mone jôm? Teké’é, Yésus a ke ôsu a ésaé nkañete jé “minlam mise a male mese, a ye’ele bôt menda me Zambe map, a kate foé ya [Éjôé] Zambe, ane a nga bo bôt be nga wô’ô mintaé a akon mevale mese mvo’é.” (Matthieu 9:35) Mam a yen ma bo na, a yene mfi ya ke ôsu a ésaé nkañete. Ve aval avé a ye bo jam ete?

Nté ôse a ne dulu, Yésus a yene bôte ba yi mvolane mfa’a ya nsisim a ba ba yi ngule ja so benya mejôô. Be ne ane mintômba mi nji bi mba’ale, mi to fe ntibilan a mbiasan. Amu a wô’ô be éngôngol nde a jô beyé’é bé na: “Bidi abui bi nto bitôtôlô, ve bebo bisaé be ne tyôtyoé. Ajô te ye’ela’ane mie bidii na, a lôme beva bidi afube dé.”​—Matthieu 9:37, 38.

Yésus a yeme jé é ne volô be. A loene minlômane mié 12 a lôme be bebaé bebaé, a bo mengabe bekañete mesaman. Ane a ve be ngum avale melep: “Te keane mezene ya meyoñ me ne te yeme Zambe, te keane fe nlame wua ya Samarie: ve keane be mintômba ya nda Israël mi dimiya. Éyoñ mi ake, katane mejô me Zambe, a jô na, [Éjôé] ya yôp é nto bebé.”​—Matthieu 10:5-7.

Éjôé ba yiane nkañete é ne ji Yésus a nga jô je meye’elan a nga ye’ele. ‘Éjôé é nto bebé’ nalé a tinane na Njôô Zambe a nga top nnye a ne Yésus Krist a ne valé. Ve jé ja ye liti na beyé’é bé ba ye bo bôte ba ye liti na Éjôé éte é ne fo’o vevee? Yésus a ve be ngule ya saé akon a wômôlô mimbim, a ve mam mete mese e zezé. Nde ñhe, aval avé minlôman mia ye kui na mi jalé miñyiane miap, ane e bi bidi ya môs?

Yésus a kate beyé’é bé na be bo te kômesane na ba nyoñe biôm bi mo asu ôbane nkañete wu. Be nji yiane nyoñe gôlôt, moné, nge mvot a futi bikpwaé biap. É nji sili na be nyoñ ékpwaé bidi asu dulu nge mengômesan a bikôndé bife. Amu jé momo? Yésus a ve be ndi nleme na: “Mbo ésaé a yiane bidi (ma’ane ya ésaé jé).” (Matthieu 10:10) Bôte ba ye nye’e mejô me Zambe ba ye nyoñe ngap a miñyiane mia yian asu beyé’é. Yésus a jô na: “Vôm ase mi anyi nda, taba’ane wôé akekui éyoñ mi akôlô.”​—Marc 6:10.

Yésus a liti fe aval avé be ne taté na ba ve môte foé ya Éjôé, a jô’ô na: “Éyoñ mi anyi nda, bata’ane bôte ya été. Nge bôte ya nda éte be aye mvamane mia, wôna mvo’é jenan je aye tabe été: nge bôte ya nda éte be aye bo te mvamane mia, wôna mvo’é jenan je aye bulane be mia. Bôte bese môt a ye bo te nyoñe mia, te wô’ô mejô menan, éyoñ mi akôlô nda éte nge nlam ôte, sasan mbulu’u mebo menan.”​—Matthieu 10:12-14.

E ne fe kui na, ngume tison éziñ nge ngume nlam éziñ ô bene foé jap. Jam avé é ne kui aval afôla ete? Yésus a liti na ba ye bi mbia ntyi’ane mejô. A timin a jô’ô na: “Me ajô fo’o mia na, a si ya Sodome a Gomorrhe, a nlam ôte, si ya Sodome a Gomorrhe je aye dañe yen mvaé môs Zambe a ye tyi’i bôte mejô.”​—Matthieu 10:15.