Yésus: ‘Belet ya ényiñ’

Mfa’a Mañ ya Galilée e yat, Yésus a nga bo asimba mfa’a ya ve betoyini be bôte bidi a tup éyoñe be nga kômbô telé nye njôô. Alu ete ébien, a nga wulu mañ me mbe me vuñu’u abui a nyii fe Pierre, nnye ate a nga wulu mendime yôp, ve a nga taté na a nyoñe mendim été éyoñe mbunane wé ô nga bili atek. Yésus a nga bo fe na évuñulu é tebe, a jam ete e nga bo na beyé’é bé be bo te ku.

Éyoñe ji, Yésus a beteya so mfa’a ouest ya mañ, abôta si ya Capernaoum. Bôte Yésus a nga ve bidi a zene ya asimba ba zu koone nye a sili nye na: “Wo ate zu nne éyoñ évé?” Yésus a komekane be amu ba jeñe nye a ôsimesane ya na, a ne beta ve be bidi. A jô be na be bo te bo “bisaé ajô bidi bi aye wu ntuk, ve ajô bidi bi aye tabe ényiñ ya melu mese.” Nde ñhe ba sili nye na: “Bi ayiane bo jé bi aye bo bisaé bi Zambe?”​—Jean 6:25-28.

Éko éziñ be ne simesane mam me ne ntilan Atiñ, ve Yésus a dutu ôsimesan wop mfa’a ya beta ésaé a dañe mfi a jô’ô na: “Ésaé Zambe é ne na, mi buni môt a nga lôm.” Ve jam da, be nji buni Yésus akusa bo mame mese a nga bo. Ba jô nye na a liti be ndem ja ye bo na be buni nye. Ba sili nye na: “Jé wo abo? Betate bangan be nga di manne fé été; ane e ne ntilane na, A nga ve be bidi bi so’o yôp be di.”​—Jean 6:29-31; Besam 78:24.

A lat a jam ba sili, Yésus a liti be môt a ne ngule ya bo mesimba a ve bone be bôte jôm ba yi a jô’ô na: “Ma kate mia na, sake Moïse nye a nga ve mia belet ja so yôp, Ésaa wom e nye a ve mia benyaa bidii ba so yôp. Amu na belet Zambe e nje é ne môt a so yôb a zu ve si ndôn ényiñ.” Amu be nji kôme wô’ô jôm a jô, ba ye’elane nye be jô’ô na: “A Nti, ke wo ve ñhe fo’o bia belet éte kom ése.” (Jean 6:32-34, Mfefé Nkôñelan) Ve “belete” fé Yésus a jô je?

Yésus a jô be na: “Ke ma me ne belet ya ényiñ, e môt a zu be ma, aa ye wô’ô zaé, a môt a buni ma, aa ye wô’ô évé ne tya. Ke me nga mane kate mia, mi yene fe ma, ve mi teke buni. . . . Amu me nga so yôp, sake na me bo nkômbane wom mamien, ve nkômbane môt a nga lôme ma. E nkômbane môt a nga lôme ma kik ô ne na, e bôte bese a nga ve ma, me bo te ve’ele jañele wua ya été, ve na me wômôlô be bese e môse wo ye su’ulan. Amu na nkômban Ésaa wom ô ne na, e môt ase a yene Mon a buni fe nye, a bi ényiñe ya melu mese.”​—Jean 6:35-40, Mfefé Nkôñelan.

Jam ete da bo na Bejuif be wô’ ôlun, a ba taté na ba kobô Yésus menyiñ. Jé ja ve nye ngule ya jô na a ne “belet ja so yôp”? (Jean 6:41, Mfefé Nkôñelan) Mfa’a wop, a ne fo’o ve môta binam a bili bebiaé e Galilée, tisone ya Nazareth. Nde bôte ba sili na: “Ye sake Yésus mone Joseph nyô, e nye bia bebien bia kôme yem ésaa baa nyia?”​—Jean 6:42, Mfefé Nkôñelan.

Yésus a yalan, a jô’ô be na: “Miabebien, te kobane menyiñ. Môt a nji bo ngule ya zu be ma, ve Tate a nga lôme ma a dutu nye: nnye me aye wômôlô alu de aye su’ulan. E ne ntilane kalate bekulu mejô na, Zambe a ye ye’ele be bese. Môt ase a maneya wô’ô mejô me aso be Tate, a yé’é me, nnye a zu be ma. Te ke môt a nga yene Tate, ve nyô a nga so be Zambe, nnye a nga yen Ésa. Me abele fo’o ane me ajô mia na, môt a buni, nnye a ne ényiñ ya melu mese.”​—Jean 6:43-47; Ésaïe 54:13.

E minlañ a nga bi a Nicodème, Yésus a nga liti na, nja ô ne zañ ényiñe ya nnôm éto a mbunan bi bili be Mona môt a jô’ô na: “Môt a buni [Atyi’i Mone Zambe] a ye jañ, ve tabe ényiñ ya melu mese.” (Jean 3:15, 16) Ve éyoñe ji a kobô vôm abui bôt e né a jô’ô na a bili beta mbe’e mfa’a ya ve bôt ényiñe ya melu mese, jôme manne nge belet ba koone je Galilée be vo’o ke ve. Nde, aval avé bi ne bi ényiñe ya melu mese? Yésus a beta ba’alane mejô mé a jô’ô na: “Me ne [belet] ya ényiñ.”​—Jean 6:48.

Minlañe mia fombô ajô belet ja so yôp mia ke ôsu, a ñye’elane ya été wo kôme wô’é a to ke na Yésus a ye’ele synagogue ya Capernaoum.