E kômesan asu mam ma ye kui: a ne zene ya fek

Nkana Yésus a nga kan a lat a mon a nga jañ, ô liti’i na Zambe a bili nkômbane ya jamé bebo mam abé ba kôñelane minlem ô nga yiane nambe benyoñe taxe, bescribe a Bepharisien. (Luc 15:1-7, 11) Éyoñe ji, Yésus a kobô a beyé’é bé. A belane nkana ôfe ô tii a nkukume wo yemelane na mba’ale nda wé, nge na mba’ale akum wé a te bo ékotekot.

Yésus a liti na, ba somane mba’ale akum amu a te dimine belan akume masa wé. Nde masa a tyi’i na a zu kandan a mbo ésaé wé. Mba’ale akum a sili émiene na: “Ma ye bo aya, amu masa wom a vaa ma mba’ale ya akume dé? Ye ke fa’a si? Me nji bi ngule ya bo nalé. Ye ke ma bo zak? Ma wô’ô nalé ôson.” Asu na a kômesane jam da yange nye ôsu, a jô émiene na: “Ma yem e jam ma ye bo, nalé ate e ba ba ye nyoñe ma e menda map éyoñe ba ye vaa ma e mba’alan akume wom ba ye yené.” Ane a ji’a loene bôte be bili masa memvôla a sili na: “Ô bili masa wom tañeya?”​—Luc 16:3-5, Mfefé Nkôñelan.

Nyi ôsu nye na: “Mende’e me mbon ntet.” Môte nyi a te yiane bi beta afube b’olivier nge na a too nkuane mbon. Mba’ale akum a jô nye na: “Nyoñe’ kalate wôé, ô ji’a tabe si, a tili mewôm metan.”​—Luc 16:6.

Mba’ale akum a sili nyô mbo’o na: “[Wo ki] ô bili tañ aya?” Nye na: “Biate bi nlisi ntet.” Ane mba’ale akum a jô nye na: “Nyoñe’ kalate wôé, ô tili mewôm mwom.” A sé’é fo’o mvôla te nya abuii.​—Luc 16:7.

Mba’ale akum a ngenan a nyoñe ngap a mame me moné me masa wé, nde ñhe a bili ngule ya sé’é abime bikôla bôte be bili masa wé. Ajô te nde a late ngbwa a bôte ba ye bo ngule ya volô nye éyoñ a ye jañele bisaé bié.

Da viane kui na masa a ke su’ulane yeme jame da te boban. Ve, akusa bo na jam ete da zu bo na a jañele abui moné, masa nyô a se’e mbo ésaé wé amu ja’a na mboane wé ô ne “ékotekot,” a te liti na a “ne fek.” Yésus a beta jô na: “Amu bone ya si nyô ba dañe yeme tabe ntyee e mfa’a bôte baa be be be ne avale da, e jame e ne ayaé e be bone y’éfufup.”​—Luc 16:8, Mfefé Nkôñelan.”

Yésus a nji su’u mimboane mi mba’ale akum nyô, a nji fe kañese na bôte be bo mvôl e mame me makit. Nde ñhe, nsôñane wé ô ne ôvé? A timine beyé’é bé na: “Latane memvôé a akum da so ékotekote mboon, nalé ba ye nyoñe mia [bitaba’a ya nnôm éto].” (Luc 16:9, Mfefé Nkôñelan) Ôwé, ñye’elan ô ne va mfa’a ya bo fek a bi mbamba ñyenane mam. Bebo bisaé be Zambe, “bone ya éfufup,” ba yiane belane biôme bi mo biap, ve be bili fe ényiñe ya melu mese ôsimesane wop.

Fo’o ve Yéhôva Zambe ba Mone wé étam mbe be ne ve môte fane ya nyiñe Éjôé ya yôp, nge nyiñe si va e Paradis, Éjôé Zambe si. Bia yiane ve ngule ya late ngbwa a be éyoñe bia belan akume dangane mfa’a ya su’u mame ya Éjôé Zambe. Nde ñhe, ényiñe jangan ya melu ma zu ja ye tabe nnôm éto éyoñ or, argent a mame mevo’o mese ma ye mane ndaman.

Yésus a jô fe na, bôte ba yeme belane biôme bi mo biap a mame mevo’o mese, ba ye fe bo ngule ya yeme nyoñe ngap a mame ma dañe mfi. Nde Yésus a liti na: “Nge mi nga bo te yené zôsôô akum e nji yian été, za a ye ve mia benya be biôm [ane biôme ya Éjôé]?”​—Luc 16:11, Mfefé Nkôñelan.

Yésus a liti beyé’é bé na, da ye sili na be jalé abui mimbe’e nge ba kômbô tabe “bito ya melu mese.” Môt a vo’o bo mbo ésaé Zambe a to fe ôlo ya akum é ne ékotekot. Yésus a ke suu nkobô a jô’ô na: “Teke mbo ésaé éziñ a ne saane bemasa bebaé. Amu naa a ye vini wua a nye’e nyô mbok, nge na a ye kabetane wua a biasé nyô mbok. Mi se ngule ya saane Zambe a Akum.”​—Luc 16:9, 13, Mfefé Nkôñelan.”