‘Ñwômôlô bôt a ényiñ’

Nkôlane ya Pérée, Yésus a zu kui fefele Béthanie, nlam ô ne bebé bekilimeta belal a Jérusalem mfa’a jôp da tôô. Marie ba Marthe, bekale be Lazare ba yi du amu be ndôme bi awu. Abui bôte da te be zu ve ngule nyul.

Ane môt éziñ a kate Marthe na Yésus le a zu, nnye ki a ne ôjeja’a ya ke tôbane nye. Marthe a kate Yésus jame ba monyañe wé ba too be simesa’ane den a nga ke melu menyin: “A Tat, nge ô nga to va, ve ndôme jam é nji wu.” Ve nalé a nji tinane na, a nji bi ndi nlem. Marthe a jô na: “Me ayeme na jam wo aja’é Zambe, Zambe a ye ve wo de.” (Jean 11:21, 22) A simesane na Yésus a ne ngule ya bo jôm éziñ asu ndôme jé.

Yésus a yalan a jô’ô na: “Nyo ndôm a ye beta wômô.” Marthe a simesane na a yiane kobô ajô ya ñwômane miñwuane ya melu ma zu e si va, ndi nlem Abraham a abui bôt afe e nga bi. A liti ndi nlem a bili na jam ete da ye tôéban a jô’ô na: “Me ayeme na a ye wômô éyoñ Zambe a ye wômôlô bôt alu de aye su’ulan.”​—Jean 11:23, 24.

Nde ñhe, ye Yésus a ne fo’o soo mvolane wo sili éyoñe ji? A ba’alane Marthe na Zambe a te ve nye ngule ya dañ awu a jô’ô na: “Môt a buni ma, akusa bo a wu a ye nyiñ; a bôte bese môt a nyiñ a buni ma, a ye fe wu.”​—Jean 11:25, 26.

Yésus a nji jô valé na beyé’é bé ba ye wu môs éziñ. Ja’a émien a ye wu aval ane a nga kate minlôman mié. (Matthieu 16:21; 17:22, 23) Yésus a liti na môt a buni nye a ne bi ényiñe ya nnôm éto. Abui bôte da ye bi ényiñ éte a zene ya ñwômane miñwuan. Ve jame da, bezôsôô bebo bisaé be Zambe ba ye bo vevee e memane ya nta’ane mame wu be ne bo te wu. Jam é ne été é ne na, nyu ase a bili mbunane be Yésus a ne tabe ndi na, a vo’o tabe soñ nnôm éto.

E Yésus a ndôme jô na, “Ma me ne ñwômôlô bôt, me ne fe ényiñ” ye a ne fo’o ngule ya volô Lazare, môt a wuya valé a nga ke melu menyin? Yésus a sili Marthe na: “Ye wo abuni ajô te?” A yalane nye na: “Ya, A Tat: me buniya na ô ne Krist, Mone Zambe, nnye be nga buni na a ye zu si nyô.” A mbunan ôse na Yésus a ne bo beta jam môs ôte ôbien, Marthe a ji’a ke mbil nda na a ke kate monyañe wé asoé na: “Ñye’ele a soya, a loene wo.” (Jean 11:25-28) Ane Marie a ji’a kôlô nda; mbôle bôte ba simesane na a ke soñe Lazare, ba tôñe nye.

Ve Marie nye a viane ke be Yésus. A ku mebo mé si a yônôk, a jô’ô fe mame monyañe wé a ndôme mane jô: “A Tat, nge ô nga to va, ve ndôme jam é nji wu.” Éyoñe Yésus a yen ane a yôn, a jama bôte ba be nye ba te so nsamba be yii’ fe, nde nlem wo tôlé Yésus abum a taté fe na a yôn. Jam ete da nambe bôte be ne valé. Ve jame da, bevo’o ba sili na: ‘Nge môte nyô a nga saé ndindim, ke a mbe ngule ya bo môte nyô te wu?’​—Jean 11:32, 37.