NSILI 5

Me ne bo aya nge bongô besikôlô bevok ba tibili ma?

AMU JÉ NSILI ÔTE Ô NE MFI?

Éyalane jôé é ne kôm ajô, nge ndamane de.

NGE A MBE WO, Ô NGA YE BO AYA?

Tame simesane jame di: Thomas a nji bi nkômbane ya ke sikôlô, nge den, nge akiti, nge môs ôfe. A nga jañele nkômbane ya ke sikôlô éyoñe bongô besikôlô be nga taté na ba ve éyôlé jé mvit, den a ntoo ngon éla. Be nga taté na ba ve nye bone biyôlé. Biyoñe biziñ, mongô éziñ a bibi nye wo, bekalate be mane nye ku si, éyoñe te nje a jô na a nji vañ. Nge ke na, be to nsamba, éyoñe te mongô mfe a sô’ôlô nye, a ji’a sobô. Môse ya angô’é, bongô bete be nga beté ôdo’é éyoñe be nga tili nye kalate na, ba ye tya’a nye ébôm . . .

Nge wo ô mbe Thomas, ô nga ye bo aya?

TEBE MONE JÔM, Ô TAME FAS!

Ô ne ngule ya bo jôm éziñ. Ô ne ngule ya kpwéé bongô bete si, teke belane bikuta. Aval avé?

TE YAA. Kalate Zambe a jô na: “Ôkukut wo kuli ayaa dé ése; ve mfefe’e môt w’akame de a volô de.” (Minkana 29:11) Éyoñe wo bi womien, ô teke liti na jôm ete da jô wo jôm, ô ne te’e môt a tibili wo.
TE KUNE WOMIEN. Kalate Zambe a jô na: “Te butane môt abé ba abé.” (Beromain 12:17) E jeñe na wo kune womien a tu’a ndamane ndaman ajô.
SA’ALE MEJÔ. Kalate Zambe a jô na: “Môt a ne ntye a yene mbia jam, ve sobô.” (Minkana 22:3) Nge ô ne ngule ya bo de, sa’ale bôte be ne tibili wo, sa’ale fe mam mese, nge bevôm bese be ne bo na bôte be tibili wo.
KPWÉ’É BE BIVÔ A ÉYALANE JÔÉ. Kalate Zambe a jô na: “Évôvoé éyalan ja je’e ayaa.” (Minkana 15:1, Mfefé nkôñelan) Ô ne bo fianga. Nge môt a kpwe’ele wo a jô wo na, ô nto ane wo yeme mone zok, ô ne bete bitul a jô nye na: “Wo bele fo’o, ma yiane sé’éban.”
KELE VÔME MFE. Nora a bili mimbu 19, a jô na: “Éyoñe wo tabe ne séé, nalé a liti na ô ne nya môtô, a ngul a dañe môt a kpwe’ele wo, nalé a liti fe na, wo jôé womien, fulu môt a kpwe’ele wo a nji bi.”—2 Timothée 2:24.
TABE’E WOMIENE NDI. Môt a tibili ba bevok a ne ngule ya yemelane na, nyô a ne nwôwoñ, nyuna ki a nji bo ngule ya bo jôm éziñ. Ve, abui da tek, éyoñe ba yene na, môte ba tibili a nji bo nwôwoñ.
KATE DE NYA MÔTÔ. Môt éziñ a nga ye’ele sikôlô a jô na: “Ma jô bongô na be kulane bôte ba tibili be. Nalé a ye soo be mvolan, a ye fe volô na, te bongô befe ba tebe été éte.”

Mongô éziñ a liti na a nji koo môt a tibili nye woñ — E tabe ndi a womien a ve wo ngule ja jembane môt a tibili wo

YE WO TOO Ô YEME NALÉ?

Ane ô vaa bitibela ba bo nyule mongô, bi ne fe lañ:

Meta. “Me vo’o vuane bone biyôlé be mbe be va’a ma, a mbia minkobô be mbe be jô’ô ma. Me mbe me wô’ôtane ve ane me ne zezé jôm, a na môt éziñ a nye’e ke ma.”—Céline, mimbu 20.
Éyoñe bongô be sikôlô bevo’o ba sa’ale wo. “Bongô besikôlô bevo’o be nga taté na ba sa’ale ma. E zañe môs, be mbe be bo’o ane teke fe éto e tebele wop, asu na me bo teke zu tabe a be. Me nga tabe ngumba mbu me ja’a étam, me yônôk.”—Haley, mimbu 18.
Bitibela’a a zene ya internet. “Da sili ve na môt a lôme bone bifia internet asu na a ndamane wo éyôlé, nge ke ndamane ndamane wo ényiñ. Mi ne buni na ma bete ôdo’é, ve avale jam éte e ne kui.”—Daniel, mimbu 14.

**Ô NE YALANE MINSILI MI AYA?**
ÔWÉ NGE MOMO	BIYALAN
1 Bitibela’a bi tatéya den a nto betoyini mimbu.	1 Ôwé. Éve’an é ne na, Kalate Zambe a kobô ajô Benephilim, mbe bete éyôlé ja tinane na: “Biwôlô bi bôt.”—Metata’a 6:4.
2 Étibela’a e nji dañe bo abé, a ne fo’o ve asu fianga.	2 Momo. Abui bongô ba wôé bebien amu ba tibili be.
3 Mbamba zene ya bo na môt a tibili wo a jô’é wo, a ne na ô juan a nye.	3 Momo. Bôte ba tibili ba bevo’o be wô’ô bo ngul abui. Nde, e ke juan a be a ne akute jam.
4 Nge wo yene be tibili môt mbok, wo yiane bo ane jôm éziñ é nji bo.	4 Momo. Mfa’a ôte, môt a nji yiane fet anyu dé. Amu nge a yen ane ba tibili môte mbok, a teke kobô, a ne fo’o ve ane émien a ne nyoñe ngabe ya ajô te, amu a nji volô na be kôme de.
5 Môt a tibili ba bevok, a wô’ô liti na a ne ngul, ve nya ajô a ne na, a ne éngôngol e nleme wé été.	5 Ôwé. Akusa bo na, bôte ba tibili bôte bevok be wô’ô wô’ôtane bebien, abui y’été é nji tabe ndi a bebien, a be wô’ô jeñe na be samele bôte bevok amu be nji yi na be yeme na be ne bingôngo.
6 Bôte ba tibili ba bevok be ne tyendé.	6 Ôwé. Bôte ba tibili ba bevok be ne tyendé mimboone miap nge ba volô be.