Mbunane wé wo tebe meve’ele été

Abraham a nga jô mone wé na a nye’e Yéhôva, a na a tabe’e ndi na é tôé bengaka’a bé. Ve éyoñ Isaac a nga bi bebé mimbu 25, Yéhôva a nga jô Abraham na a bo jam éziñ, jam ete e mbe mbia ayaé. A nga jô nye na a bo jé?

Zambe a nga jô Abraham na: ‘Nyoñek atyi’i mone dôé, ô ve ma de metuna’a nkôle Morija.’ Abraham a nji be a yeme’e amu jé Yéhôva a nga jô nye na a bo jam ete. Ve a nga bo nye mewôk.

Ndibe tyé, Abraham a nga nyoñ Isaac a bebo bisaé bé bebaé, a ke be nkôle Morija. Éyoñ be wuluya melu mela, nkôle Morija ô nga taté na wo yené ôsu. Ane Abraham a nga jô bebo bisaé na be yange’e be valé, nté ba mon ba ke ve Yéhôva metuna’a nkôle yôp. Abraham a nga ve Isaac nja’a na a be’e, émiene ke a bili ôtyeñ. Isaac a nga sili ésa na: ‘A pa, tit ébien bii ve metuna’a é ne vé?’ Nde Abraham a nga yalane nye na: ‘A mon, Yéhôva émien é ve bia tit.’

Éyoñ be kuiya nkôle yôp, be nga taté na ba lôñ autel. Nde Abraham a nga ka’a Isaac mo a mebo, a bôône nye autel yôp.

Ane Abraham a nga bete ôtyeñ. Valé a nga zu tyi’i mon éngoñ, nde tyiñ éngele é nga so yôp é jô’ô na: ‘Abraham! Te wôé nyo mon! Éyoñ ji me yemeya na wo buni Zambe, amu ô nji nyume nye mone wôé.’ Ane Abraham a nga yene ntômba, minla’a mié mi yeme mintyaé mi élé. Nde a nga ji’a tiine Isaac mo a mebo, a ve Yéhôva mone ntômba ate metuna’a.

Ataté môs ôte, Yéhôva a nga loon Abraham na mvôé jé. Ye wo yem amu jé? Abraham a mbe a bo’o jôm ése Yéhôva a mbe a jô’ô nye na a bo, ja’a éyoñ a nji be a wô’ô amu jé Yéhôva a sili nye jôm éte.

Yéhôva a nga beta ba’alan Abraham ngaka’a nyi: ‘Mé botane wo, a mé ve wo abui bon.’ Nalé a mbe a tinane na, Yéhôva a ye botane bôte bese ba nye’e nye, a zene ya nda bôt Abraham.