Tabernacle asu ékaña’a

Éyoñ Moïse a mbe Nkôle Sinaï, Yéhôva a nga jô nye na a lôñe tabernacle, vôme bone b’Israël be mbe ngule ya ke kañe nye. Be mbe fe ngule ya be’e tabernacle ate, a ke nye vôm ase ba ke.

Yéhôva a nga jô Moïse na: ‘Jô’ô be na be ve jôm ése be ne ngule ya ve, asu na tabernacle a lôñeban.’ Bone b’Israël ve taté na ba soo or, argent, mvot, minsañga. Be nga ve fe ndombo, biyé, bikôbe betit, a abui biôm bife. Biôm be nga ve bi mbe abui aval é mbe na, Moïse a nga jô be na: ‘Abim ete da yian!’

Befam a binga be mbe be yeme’ bo ésaé, be nga volô lôñe tabernacle. Yéhôva a nga ve be fe’e ya kôme bo ésaé éte. Bôte béziñe be mbe be tiñe biyé, bevo’o be mbe be ba mekok, be saé a or, ba bevo’o ke be saé a bilé.

Ayoñ é nga lôñe tabernacle fo’o ve avale Yéhôva a nga jô de na é lôñ. Beta éndelé a to abeñ, a mbe a kandé’é tabernacle zañ: vôme ya Étyi mfa’a wu, a vôm a Dañ Étyi mfa’a ôvok. Be nga naan éwolo élate vôm a Dañ Étyi, éwolo éte é mbe nkôman a élé acacia a or. Wônaa, vôme ya Étyi ki, be nga futi lambe, tebele, a autel asu na be bo be di’i encens. Mbala’a si ki, fandé a beta autel mfe bi mbe bi tele, mendim me mbe njalane fandé asu mewoban. Éwolo élat é mbe é volô’ô ayoñ Israël na, é bo te vuane ngaka’a é nga bo Yéhôva. Ye wo yeme jôm ba loone na élat? A ne ngum avale ngaka’a.

Yéhôva a nga tob Aaron ba be bone bé na, mbe be bo ésaé bepretre e tabernacle. Be mbe be yiane ba’ale nye, a bo Yéhôva mimvean été. Aaron étam nnye a mbe ngule ya nyiine vôm a Dañ Étyi. A mbe a nyiine wôé éyoñe jia mbu, na a ke ve metuna’a asu minseme mié, minsem mi nda bôte jé, a minseme mi bôte bese ya ayoñ.

Be nga mane ésaé melôñ mvuse mbu wua, akôlô ya Égypte. Ataté éyoñ éte, be mbe be mbili vôme ya kañe Yéhôva.

Duma Yéhôva é nga mane yiane tabernacle ase, nkut ô mbe fe nye yôp. Nté nkut ô mbe e tabernacle yôp, bon b’Israël be mbe be tabe vôme wua. Ve éyoñ ése nkut ô mbe ô kôlô’ô, be mbe be yeme na, éyoñe ya kôlô valé le. Be mbe be be’e tabernacle, a taté na ba tôñe nkut.