Yéhôva a kobô a Samuel

Beta Pretre Éli a mbe a bili bone bebaé, Hophni ba Phinéas; be mbe be saé’ e tabernacle. Be nji be be tôñe metiñe me Yéhôva, a be mbe be bela’ane bôt abé. Éyoñe bon b’Israël be mbe be za’a ve Yéhôva metuna’a, Hophni ba Phinéas be mbe be nyoñe’e mbamba bifuse bi tit asu dap bebien. Éli a nga wô’ô fe de, ve a nji bo jôm éziñ. Ye Yéhôva a nga ke ôsu a jibi jam ete?

Akusa bo na Samuel a mbe mongô abui a Hophni ba Phinéas, a nji vu be. Yéhôva a mbe a nye’e Samuel. Alu éziñ, Samuel a kele’ ôyo, nde a nga wô’ô tyiñ é loone nye. Nde a nga kôlô si a ke mbile be Éli, a jô nye na: ‘Ma nyi!’ Ve Éli a nga jô nye na: ‘Me nji loone wo, kele bômbô si.’ Nde Samuel a nga bulane ke bômbô si. Nde a nga beta wô’ô tyiñ. Éyoñ a wô’ôya je éyoñe lale, éyoñ éte nje Éli a nga yeme na, Yéhôva nnye a loone Samuel. Nde a nga jô Samuel na, nge tyiñ éte é beta loone nye, a yiane yalane na: ‘Kobô’ô a Yéhôva, mbo ésaé wôé a vô’ôlô wo.’

Éyoñe Samuel a keya bômbô si, nde a nga beta wô’ô tyiñ é loone nye: ‘A Samuel! A Samuel!’ Ane a nga yalane na: ‘Kobô’ô a Yéhôva, mbo ésaé wôé a vô’ôlô wo.’ Nde Yéhôva a nga jô nye na: ‘Kate’ Éli na, ma ye foñôsô nye a nda bôte jé ése. Amu a kôme yeme mbia be mam bone bé ba bo e tabernacle wom été, ve a teke bo jôm.’ Tyé kpwaa, nde Samuel a nga ke yoé mimbé ya tabernacle, aval a mbe a bo’o éyoñ ése. A nga ko woñe ya ke kat Éli jôme Yéhôva a nga jô. Ve Éli a nga loone nye a sili nye na: ‘A mon, jé Yéhôva a te kate wo? Kate’e ma.’ Nde Samuel a nga kate nye.

Yéhôva a nga ke ôsu a su’u Samuel nté a mbe a yaék. Bôte bese ya Israël be nga mane yeme na Yéhôva a nga tobe Samuel na a bo nkuli mejô, a ntyi’i mejô.