Yéhôva a foñôsô Jézabel

Njô bôt Achab a mbe ngule ya yen afube mindik Naboth, a tele vundu ya nda jé. Achab a nga yi na Naboth a kuane nye afub ete. Ve Naboth a nga ben, amu Atiñe Yéhôva e mbe e kamane na, môt a kuan éli’i ya nda bôte jé. Ye Achab a nga semé ntyi’ane Naboth a nga nyoñ? Momo. A nga wô’ô mbia ôlun. Ôlun ôte ô nga bo na a bene kôlô si, a na, a bene di.

Nde Jézabel, mbia minga a nga bili, a nga jô nye na: ‘Wo ô ne njôô ya Israël. Ô ne bi jôm ése wo yi. Ma ye ve wo afub ete.’ Ane a nga tili benya bôtô ya tison kalate, a jô’ô be na be bôte Naboth ajô na, a te ta Zambe, a na, be lume nye mekok, a wôé nye. Bôte bete be nga bo avale Jézabel a nga jô, nde Jézabel a nga kat Achab na: ‘Naboth a wuya. Afub e ntoo éndôé.’

Ve sa ke Naboth étam nnye Jézabel a nga wôé. A nga wôé fe abui bebo bisaé be Yéhôva befe. A mbe a kañe bengulemelan, a bo’o fe mbia be mam befe. Yéhôva a mbe a yene mam mese Jézabel a mbe a bo’ok. Nde a nga bo aya?

Éyoñ Achab a wuya, mone wé Joram nnye a nga bet éto njôô. Yéhôva a nga lôme Jéhu na a ke foñôsô Jézabel a nda bôte jé.

Jéhu a nga bete chariot wé, a ke Jizreel, vôme Jézabel a mbe a too. Joram a nga zu tôbane nye a sili nye na: ‘Mvo’é é ne zañe jangan, nga?’ Jéhu a nga jô nye na: ‘Mvo’é évé é ne bo zañe bia wo, éyoñe nyua, Jézabel, a bo mbia be mam?’ Ane Joram a nga jeñe na a kot a chariot, a tup. Ve Jéhu a nga jii nye akoñ, nde a nga wu.

Nde Jéhu a nga ke be Jézabel. Éyoñe Jézabel a nga wô’ô na Jéhu a zu, nde a nga ji’a ke bo nyanga, a mane kôme nlô, nde a kôme ke tebe vundu na a yange nye. Éyoñ Jéhu a nga so, nde a nga taté na a labe nye. Nde Jéhu a nga jô bebo bisaé be Jézabel be mbe be tele nye fefele na: “Wuané nye si!” Nde be nga sô’ôlô Jézabel e vundu yat, nde a nga ku si, a wui.

Mvuse ya valé, Jéhu a nga wôé bon be Achab 70, a vaa ékaña’a Baal nlam. Nga wo yene na Yéhôva a yene mam mese, a na, a foñôsô bôte bese ba bo mam me ne abé e mbamba éyoñ?