Éjôé é ne ane beta élé

Nebucadnetsar a nga beta yem bitua biyeyem alu éziñ. Ane a nga loone beyeme mame bé na be ve nye atinane ya biyeyem bite. Ve teke wua ya be be a nga kui na a bo de. Nde a nga su’ulane loone Daniel.

Nebucadnetsar a nga jô Daniel na: ‘E biyeyem biam, ma te yen élé. Élé éte é nga yaé a bo aval ayap é ne na, é nga kui yôp. É mbe ngule ya yené bevôm bese ya si. É mbe é bili abeñ mekaé a abui bibuma. Betit be mbe be za’a tabe élé éte si, anon fe é mbe é za’a tabe mintyaé ya été. Ane ange a nga so yôp. A nga jô na: “Baké’é élé éte, a tyi’i mintyaé ya été. Ve jô’é ékume si été, tiñeti je a éba’a étyé a mvot. Nleme wé wo ye kôñelan, te fe bo wu ya môt, ve wu ya tit, a biyoñe zangbwal bia ye lôt. Môt ase a ye yeme na Zambe nnye a ne Njôô, a na, nnye a ve môt ase a yi fek.”’

Yéhôva a nga liti Daniel atinane ya biyeyem bite. Eyoñe Daniel a wô’ôya atinan, ane a nga ko woñ. Nde a nga jô na: ‘A njô bôt, me mbe me buni’i na biyeyeme bi bia fombô besiñe bôé, ve me lôô na wo bia fombô. Wo ô ne élé ba ba’é. Ejôé j’aye kôlô mo môé, a wo ye di bilok ane tite ya fé. Ve mbôle ange a nga jô na be jô’é ékume si, wo ye beta nyoñ éto njôô.’

Ngume mbu ve lôt. Môs éziñ Nebucadnetsar a mbe a wulu’u mbala’a si ya nda jé, a fombô’ô ane nlame wé ô ne abeñ. Ane a nga jô na: ‘Za aval abeñe tison me nga lôñe di. Me ne fo’o beta môt!’ Awolô ebien a mbe kobô’ô, tyiñ é nga so yôp é jô’ô na: ‘A Nebucadnetsar! Éjôé é kôlôya mo môé.’

Éyoñ éte ébien, a nga jañele fek, a taté na a bo mam ane tite ya fé. Be nga titane nye, nde a nga ke nyiñ a betite ya fé. Bisile bié bi nga mane yaé a bo ane mesaé me ndôé. Biaé bié bi mbe bi funa’ane biaé bi anon.

Mvuse mimbu zangbwal, Nebucadnetsar a nga mane bo mvo’é, a Yéhôva a nga beta ve nye éto njôô. Ane Nebucadnetsar a nga jô na: ‘Ma ve Yéhôva, Zambe ya yôp, duma. Me yemeya éyoñe ji na Nnye a yiane éto Njôô. A sulu émiene si na a mvamane mona môt, a ne fe ngule ya ve nyô a nye’e éjôé.’