Élisabeth a biaé mon

Mimbu 400 mi mbe mi lôteya nté ane ésaé melôñ é nga man; pretre éziñ a mbe jôé na Zacharie, ba minga wé Élisabeth, be mbe be nyiñe’e fefele Jérusalem. Be mbe be lu’aneya ayap, ve teke mon. Môs éziñ Zacharie a mbe a di’i encens e temple, ane ange Gabriel a nga tebe nye ôsu. Zacharie ve si’an, ane Gabriel a nga jô nye na: ‘Te ko woñ. Ma te zu kate wo mbamba foé. Yéhôva a jô na Élisabeth a ye biaé mona fam, wo yiane yôlé nye na Jean. Yéhôva a te tobe nye asu ngum aval ésaé.’ Ane Zacharie a nga jô nye na: ‘Ma sôan ajô te! Abim minnôm bi ntoo di? Nde bia ye biaé mon aya?’ Ane Gabriel a nga jô nye na: ‘Zambe nnye a te lôme wo foé éte. Ve mbôle wo te sôô, wo ye bo te kobô akekui éyoñ mon é bialé.’

Zacharie a nga tabe ayab e temple été. Éyoñ a nga kui, bôte be mbe be yange’e nseñ be nga kômbô yeme jam da te boban. Ve Zacharie a nji be ngule ya kobô. A mbe ngule ya laane ve a mo. Ane bôte bete be nga yeme na éngele Zambe a te kobô a nye.

Mvuse ya valé, Élisabeth a nga be’e abum a biaé mona fam, aval éngele a nga jô. Bemvôé bé a bivuvumane bié bi nga zu yene mon. Be nga va’a abui. Nde Élisabeth a nga jô na: ‘Bia ye loone nye na Jean.’ Ane be nga jô na: ‘Teke môt a be’e éyôlé éte nda bôte jôé. Va’a nye éyôlé ésa.’ Nde Zacharie a nga tili bifia bi tyia: ‘A ne jôé na Jean.’ Été été, nde a nga beta taté na a kobô! Foé éte ve mane yametane tisone ya Juda, bôte be mbe be kamek, be jô’ô na: ‘Mone nyi é bo bo avale mon avé?’

Ane Zacharie a nga jaé a mbamba nsisim. A nga jô na: ‘Yéhôva a nyoñe duma. A nga ka’a Abraham na a ye lôme bia Messie na a kôté bia. Jean a ye bo nkulu mejô, a ye fe kôme Messie zen.’

Étua jam é nga kui fe Marie, évuvuman Élisabeth. Kabetôlô a tôñe valé a zu kobô ajô ete.