Satan a ve’ele Yésus

Éyoñ Yésus a dubaneya, nsisime Zambe ô nga kee nye nkôte si. A nga bo melu 40 teke di, nde a nga wô’ô mbia zaé. Ane Satan a nga zu ve’ele nye, a jô’ô nye na: ‘Nge ô ne fo’o Mone Zambe, jô’ô meko’o ma na me veñesane belet.’ Yésus a nga belan éfuse ya Kalate Zambe ja jô na: ‘Sa ke bidi étam mbie bi ne mfi ényiñe môt. Wo yiane dañe vô’ôlô Mejô me Yéhôva.’

Ane Satan a nga beta jô nye na: ‘Nge ô ne fo’o Mone Zambe, yele’e andile ya temple, ô ke ku si. Amu e ne ntilane na, Zambe a ye lôme beange bé be ba’ale wo.’ Ve Yésus a nga beta belan éfuse ya Kalate Zambe ja jô na: ‘Te ve’ele Yéhôva.’

Ane Satan a nga liti Yésus bijôé bise ya émo, akum a duma ése ya été, a jô nye na: ‘Ma ye ve wo mam mese ma nge wo kañe ma ve éyoñe jia.’ Ve Yésus a nga yalane nye na: ‘A satan, kôlô’ô! E ne ntilane na, wo yiane kañe ve Yéhôva étam.’

Ane Satan a nga ke, éyoñ éte beange be nga zu ve Yésus jôme ya di. Ataté môs ôte, Yésus a nga kañete mbamba foé ya Éjôé Zambe. Ésaé a nga zu bo si nje le. Bôte be mbe be nyeke’e mam a mbe a kate’e be, jôm ete nje be mbe be tôñe’e nye vôm ase.