Tebe’e Satan ngame yat

1, 2. Jé bia yiane yem a lat a Satan a mimbia minsisime mié?

ÉNYIÑE ya mfefé émo Yéhôva a ka’a bia, ja ye bo nya abeñe. Ényiñe jangan ja ye bo avale nsôñane Yéhôva ô mbe atata’a. Ve den, bi ngenane bi nyiñe émo Satan ba mimbia minsisime mié ba jôé. (2 Becorinthien 4:4) Ja’a bi vo’o be yen, ba nyiñ, be bili fe beta ngul.

² Kabetôlô nyi, bia zu yen aval avé bi ne kabetane Yéhôva a tebe Satan ngame yat. Yéhôva a ka’a bia na a ye volô bia. Ve bia yiane yeme mezene Satan a mimbia minsisime mié ba belane me.

SATAN A NE ANE “ÑBWEÑBWEM JE ABAM”

3. Jé Satan a sôñ?

³ Satan a jô na bone be bôt ba bo Yéhôva ésaé amu ba sôñe jôm éziñ, a jô na nge ba tôbane abui minjuk, ba ye lume Yéhôva mvus. (Lañe’e Job 2:4, 5.) Éyoñe môt éziñ a liti na a kômbô yeme Yéhôva, Satan a mimbia minsisime mié ba yene de, éyoñ éte ba jeñe na be tindi nye na a telé ayé’é dé. Ba wôk ôlun éyoñe ba yene môte éziñ a va’a émien ngumba be Yéhôva a duban. Bible a ve’e Satan a “ñbweñbwem je abam, a jeñe nyô a ne ngule ya bi.” (1 Pierre 5:8) Satan a kômbô ndamane amvôé bia be Yéhôva.​—Besam 7:1, 2; 2 Timothée 3:12.

4, 5. (a) Jé Satan a nji bo ngule ya bo? (b) E ‘wosane Diable’ a tinan aya?

⁴ Ve bi nji yiane koo Satan a mimbia minsisime mié woñ. Yéhôva a nji ve be ngul ése, ngule jap é bili minné. Yéhôva a nga ka’a na, “bizu’u” benya Bekristene bia ye dañe ‘beta étibela’a.’ (Nlitan 7:9, 14) Satan a nji bo ngule ya kamane na ngaka’a éte é tôéban, amu na Yéhôva a ba’ale bebo bisaé bé.

⁵ Nge bia kabetane Yéhôva, Satan a vo’o ndamane amvôé bia be Yéhôva. Zambe émien a ka’a bia na: “Yéhôva a ne be [bia] nté [bi] ne be nye.” (2 Minkañete 15:2; lañe’e 1 Becorinthien 10:13.) Abui bezôsôô be bôte ya melu mvus ane Abel, Hénoc, Sara, a Moïse be nga tebe Satan ngame yat, a kabetane Yéhôva. (Behébreu 11:4-40) Bia fe bi ne vu be. Kalate Zambe a jô bia na: “Wosa’ane Diable, ndemben a ye [tube] mia.”​—Jacques 4:7.

“MEWOSANE MANGAN”

6. Aval avé Satan a wosane bia?

⁶ Satan a kôme yeme na Yéhôva a nga ve nye minné mfa’a ya jam a ne bo bia, to’o nalé, a jeñ a ngule jé ése na, a ndamane amvôé bia be Yéhôva. Den, Satan a wosane bia abui meval, mefek a belane me den, a jaéya zu a belane me den a ntoo betoyini mimbu. Bi tame zu yene mefe’e méziñe ya été.

7. Amu jé Satan a wosane bebo bisaé be Yéhôva?

⁷ Nlômane Jean a nga tili na: “[Émo ji] ése é jô’ô be mbia môt ate.” (1 Jean 5:19) Satan nnye a ne mbia môt a jôé émo ji, a kômbô fe jôé bebo bisaé be Yéhôva. (Michée 4:1; Jean 15:19; Nlitan 12:12, 17) Satan a yeme na éyoñ é li’iya nye é ne étun, ajô te, a ve ngule jé ése na, a tindi bia na bi ku Zambe. Satan a wô’ô belane meve’ele bia yen a mis, a meve’ele me solô.

8. Jé Kristen ése ja yiane yem?

⁸ Kalate Beéphésien 6:12 a jô bia na: Bia “wosane (bia juan) . . . mimbia minsisim mi ne yôp été.” Kristen ése ja yiane juane Satan a mimbia minsisim. Bia yiane yeme na môt ase a veya émiene ngumba be Yéhôva a yiane juan. Kalate Paul a nga tili Bekristene ya Éphèse, a nga jô be biyoñe bilale na, be “bo ngule ya yem.”​—Beéphésien 6:11, 13, 14.

9. Jé Satan a mimbia minsisim ba jeñ?

⁹ Satan a mimbia minsisim ba jeñe na be du’u bia a abui mezen. Bi nji yiane buni na, mbôle bi nji bili ôlame wé éziñ, bi vo’o bili ôlame wé ôfe. Satan a jeñe vôme bi ne atek, na a bi bia vevee. Ve bi nji yiane ku melame mé, amu Bible a kate bia melam a belane me. (2 Becorinthien 2:11; lañe’e Ayemé 31.) Ôlame wé wua ô ne na, bi yeñ a mimbia minsisim.

TUBU’U MIMBIA MINSISIM

10. (a) E yeñ a mimbia minsisim a tinan aya? (b) Aval avé Yéhôva a yene mame ya dibi?

¹⁰ Môt a yeñ a mimbia minsisim a bo mam me tii a mame ya dibi aval ane, mvi’i, évu, bo’o, ngbwel, kôñ, e laan a bewu. Bible a jô bia na, môt a yeñ a mimbia minsisim a ne “mbia jôm,” a na bi voo yeñ a mimbia minsisim, bi kañe’e fe Yéhôva. (Deutéronome 18:10-12; Nlitan 21:8) Bekristen ba yiane sa’ale mame mese me tii a mame ya dibi.​—Beromain 12:9.

11. E nye’e mame ya dibi a ne tindi bia na bi bo jé?

¹¹ Satan a yeme na nge bia nye’e mame ya dibi, bi ne ji’a bili ôlame ya yeñ a mimbia minsisim. Nge bia yeñ a mimbia minsisim a zen éziñ, bi vo’o bo bemvôé be Yéhôva.

SATAN A KÔMBÔ DU’U BIA

12. Aval avé Satan a ndumekane bôte minlô?

¹² Satan a kômbô ndumekane bôte minlô. Ôte’ete’ ôte’etek a futi bôt bisô nlem, a bo na be simesane na ‘abé nde é ne mvaé a na mvaé nje é ne abé.’ (Ésaïe 5:20) Satan a tindi bôte na be simesane na melebe ya Bible me vo’o volô be, a na ba ye dañe bo mevak nge ba biasé metiñe me Zambe.

13. Aval avé Satan a futi bôte bisô nlem?

¹³ Satan a bili fe beta ôlam éziñ, a futi fe bôte bisô nlem. A jaéya zu a belan ôlam ôte. Afub Éden, a nga futi Ève bisô nlem éyoñ a nga sili nye na: “Ye Zambe a nga tu’a fo’o jô na: Mia ye bo te di [bibuma ya] bilé bise ya afup?” Mvuse ya valé, melu me Job, éyoñ a nga zu tabe ékôan éziñe yôp, Satan a nga sili Yéhôva beange be too na: “Ye Job a ko Zambe woñ zezé?” (Job 1:9) Éyoñ Yésus maneya duban, Satan a nga ve’ele nye. A nga jô nye na: “Nge ô ne mone Zambe, jô’ô meko’o na me veñesane fembé.”​—Matthieu 4:3.

14. Aval avé Satan a bo na bôte be biasé mame me tii a mimbia minsisim?

¹⁴ Den, Satan a ke ôsu a futi bôte bisô nlem. A bo na bôte be biasé mame me tii a mimbia minsisim, a bo bo na mame méziñ ya dibi me yené ve ane me ne zezé mam. Bekristene béziñe fe be nga ku ôlam ôte. (2 Becorinthien 11:3) Nde ñhe, jé bi ne bo nge bi nji kômbô ku ôlam ôte? Jé é ne ve bia njika’ane na bi ngenane teke bili ôlame Satan? Bi tame zu yene mame mebaé me ne bo na bi du’uban: mimvôman, a éyoñe bia kômbô saéban.

SATAN A BELANE MBIA MINKÔMBANE MIANGAN

15. Aval avé mimvôman mi ne tindi bia na bi yeñ a mimbia minsisim?

¹⁵ Den, abui befilm, bevidéo, bingeñegeñ, bejeux vidéo, internet bia liti mame mimbia minsisim, magik a mame ya dibi. Bôt abui ba yene na mame mete me nji bo mbia be mam, ba nyoñe nyoñe me ane fianga, be lôô ki na, éyoñe ba bo nalé, ba yeñ a mimbia minsisim. Môt a ne fe yeñ a mimbia minsisim a mame méziñ ane horoscope; e tiñeti mongô nkol, nge ke éfus éyé wo a angeteñ; a e kate môt aval ényiñe jé ja ye bo a zene ya mintene ya wo. Satan a bo na bôte be simesane na, avale mam ete e ne ndimba, a nkenge, a na a ne ve fianga. Môt éziñ a ne jô na, ‘e nji bo abé ya yene mame ma liti mimbia minsisim, nge ke mame ya dibi, amu na mamien me vo’o bo me môs éziñ.’ Amu jé ôsimesan ôte ô ne mbia abé?​—1 Becorinthien 10:12.

16. Amu jé bia yiane sa’ale mimvômane mi tii a mame ya dibi?

¹⁶ Satan a mimbia minsisim be vo’o lañe minleme miangan. Ve be ne yeme mame bia nye’e, a mame bia simesane éyoñe ba yene mintyi’ane bia nyoñ asu dangan, a asu nda bôte jangan, to’o éyoñe ba yene mimvômane miangan. Nge bia tobe befilm, mezik, nge ke bekalate ba wumulu bemvi’i, magik, mimbia minsisim, mingbwengbwel, bevampire, nge avale mam ete, Satan a mimbia minsisim ba ye yeme na bia nye’e avale mam ete. Ba ye ñhe jeñ a ngul ése na, bi dañe nye’e me.​—Lañe’e Begalate 6:7.

17. Aval avé Satan a belane nkômbane wongane ya bo mvo’é minsôn?

¹⁷ Satan a yeme fe na, bia kômbô bo mvo’é minsôn. Den, bôt be bili bitua bi akon. E ne bo na môt éziñ a jeñeya na a saéban mevale mese teke ndoñ. (Marc 5:25, 26) A ne bili atek, a nga viane kañese avale biañ ese ba ve nye. Ve bia Bekristen bia yiane tabe ntyel éyoñe bia tobe biañ éziñ, bi nji yiane kañese biañ ése é tii a “ngule ya mimbia minsisim.”​—Ésaïe 1:13, MN.

18. Avale biañ avé Kristen ja yiane sa’ale?

¹⁸ Melu mvus, ayoñ Israël, bôte béziñe be mbe be bela’ane “ngule ya mimbia minsisim.” Yéhôva a nga jô be na: “Éyoñ mi asame mo menan, m’aye solé mia mise mam; ya, éyoñ mi abo meye’elan abui, m’aye bo te vô’ôlô.” (Ésaïe 1:15) Aval ajô ete, Yéhôva a nga jô na, a ye bo te vô’ôlô meye’elane map! Bi nji kômbô bo jame da ye ndamane amvôé bia be Yéhôva, jam é ne kamane nye na a volô bia, e dañe dañ éyoñe bia kon. (Besam 41:3) Ajô ete nde bia yiane taté fas nge biañ bia zu nyoñ é tii ki a mimbia minsisim nge ke mame ya dibi. (Matthieu 6:13) Nge biañ éte é tii a avale mam ete, bia yiane sa’ale je!​—Lañe’e Ayemé 32.

MINLAÑ MI TII A MIMBIA MINSISIM

19. Jé ja bo na bôt abui be koo Satan woñ?

¹⁹ Bôte béziñ ba jô na bôte ba ve’e befe’e na Satan a mimbia minsisim be ne, bevo’o ke ba kañese na be ne fo’o amu mame be nga tôbane me. Bôt abui ba koo be woñ awu, be ne belo ya metum a mame bôte ba kañete a lat a mame mimbia minsisime mia bo. Bôte béziñe ke ba kañete minlañe ya beta be mam mimbia minsisim mia bo vôm ase. Bôte ba nye’e fo’o avale minlañ ete. Avale minlañ ete da bo na bôt be koo Satan woñ.

20. Aval avé bi ne miase minsose mi Satan?

²⁰ Tame fase jame di: Satan a yi na bôte be koo nye woñ. (2 Bethéssalonicien 2:9, 10) A ne nlaane minsos, a bôndé mefek asu ya na, bôte ba nye’e mame me tii a mimbia minsisim be fas aval a yi. A bo nalé na, bôte be buni to’o mame me nji bo été. Bôte ba buni nye be ne taté na ba kañete bitua bi mam, be jô’ô na, be nga yen ane bia boban, nge ke na be nga wô’ô na bi nga boban. Nté bôte ba kañete bitua bi mame bite, môt ase a nga beté ôdo’é. Bi nji kômbô miase woñe bôte ba koo Satan, jôm éte nje bi nji yiane kañete avale minlañ ete.​—Jean 8:44; 2 Timothée 2:16.

21. Bia yiane belan éyoñe jangan, a ngule jangane na bia kañete mame ma fombô za?

²¹ Nge Ngaa Yéhôva éziñ a yeme nlañ ô tii a mame ya dibi, a nji yiane kañete wô bôte bevok. Bebo bisaé be Yéhôva be nji yiane koo woñ amu mame mese Satan a mimbia minsisime be ne ngule ya bo. Be nji yiane belane éyoñe jap, a ngule jap na ba kañete beta be mame Satan a mimbia minsisime ba bo, ve ba yiane belane éyoñe jap a ngule jap na, be fas a kañete mame ma fombô Yésus a ngul Ésa a nga ve nye. (Behébreu 12:2) Ja’a Yésus émien a nji jañele éyoñe na a laane beyé’é bé minlañe mia fombô mimbia minsisim. A nga dañe kañete be “beta be mame ya Zambe.”​—Mam Minlôman 2:11; Luc 8:1; Beromain 1:11, 12.

22. Jé bi ne nkômesane ya bo?

²² Bi nji yiane vuane na nsôñane Satan ô ne na a tyam amvôé dangan a Yéhôva. A ye ve ngule jé ése na a tôé nsôñan ôte. Ve bia yeme melame mé, bi ne fe nkômesane ya sa’ale mame mese me tii a mimbia minsisim. Te bia ve’ele ‘ve Satan ôyôme fet’ ya bi bia melame mé. (Lañe’e Beéphésien 4:27.) Nge bia ve ngule ya ke Satan ngame yat, bia ye ke bili ôlame wé éziñ, Yéhôva a ye fe kamane bia.​—Beéphésien 6:11.