“Ésaé é ne anen”

MÔSE beta ékôane ya Jérusalem ô kpwaneya. Njô bôte David a te bañete bivete bié bise, bezimbi, a biwôlô bi bôt. Be ne ôjeja’a ya wô’ô ngumba avale foé. Yéhôva a nga jô na Salomon, mone David, nnye a ye lôñe beta nda ba ye belane je na be kañe nya Zambe. Nnôme njô bôte ya Israël ô nga bi éve’ela’a ya melôñ a zene ya mbamba nsisim, ane ô nga ve je Salomon. David a jô na: “Ésaé . . . é ne anen; amu beta nda ate a nji bo mfa’a ya môt, ve mfa’a Yéhôva Zambe.”—1 Mka. 28:1, 2, 6, 11, 12; 29:1.

Mvuse ya valé nde David a sili na: “Nde za a ye ve a nye’an ôse na a telé émien étyi môse wu be Yéhôva?” (1 Mka. 29:5) Nge ô nga ye be valé, ô nga ye yalan aya? Ye ô nga ye bo ntindane ya suk beta ésaé ate? Bone b’Israël be nga taté ésaé te été été. Nde fe, be “nga vak . . . amu be nga ve Yéhôva a benya minleme, be nyeke’e.”—1 Mka. 29:9.

Mvuse mintete mimbu, Yéhôva a nga telé jôme ja dañe temple. A nga telé beta temple ya nsisim, nnye ate a ne nta’ane mam wo ve bôte fane ya subu Zambe bebé, a kañe nye a zene ya awu Yésus. (Beh. 9:11, 12) Aval avé Yéhôva a volô bôte ya melu ma na be late ngbwa a nye? A zene ya ésaé ya bo bôte beyé’é. (Mt. 28: 19, 20) Asu’ulane ya ésaé te é ne na, mbu ôse, bia bo bemillion meyé’é ya Kalate Zambe, betoyini beyé’é ba nyoñe mbatizô, a mintete mimfefé mekônda mia bialé.

Jame te da bo na ésaé ya kuli abui bekalate, ésaé melôñ a mba’alane Meba m’Éjôé a menda asu bitôkan a beta bitôkan é nen. Nga bi ne tyiñe na ésaé nkañetane mbamba foé ja nen a ja wume bibuma?—Mt. 24:14.

Nye’ane bia nye’e Zambe a bôte bevok, a ôjeja’a ya kañete Éjôé, bia tindi bebo bisaé be Zambe na, be ‘ve a nye’an ôse na be telé bebien étyi . . . be Yéhôva’ a zene ya bo mimvean. Ngo’o abim avak bi né éyoñe bia “kañe Yéhôva a biôme [biangan],” a éyoñe bia yen avale ba belane mimveane miangan a fek, mfa’a ya bo beta ésaé é nji tame boban émo!—Min. 3:9.

Avale bôte béziñ ba tobe na ba suk ésaé ya éjôé

Abui bôt melu ma da ‘naane jôm,’ nge abime moné éziñ, a ke futi de nkop ô ne Aba Éjôé, e vôm a ne ntilane na, “Oeuvre Mondiale.” (1 Bec. 16:2) Ngon ése, mekônda ma lôme moné ate e wofise Bengaa be Yéhôva ya nlame wop. Womien ô ne fe lôme mimveane miôé adresse Bengaa be Yéhôva ya vôm ô too. Nge wo kômbô yem adresse Bengaa be Yéhôva ya si jôé, tili’i nge ke na, lo’one wofise ya Béthel. Ô ne fe yene b’adresse e www.pr418.com. Mimveane womien ô ne lôm mmie mi:

MIMVEAN BE NJI BULAN

Ô ne bo mimvean a zene ya bank, bekate be bank, nge ke a zene fe. E be bank béziñ, ô ne fe belane jw.org nge anjeñe mefoé afe.
Ô ne ve moné, mekatak, nge ke biôm bi mo bife bi ne dia. Wo yiane tili kalate a liti na ba ye ke bulane wo biôm wo ve.

MIMVEAN BA BULAN

Ô ne bo mvean a kate na ba ye bulane wo wô nge wo tôbane njuk éziñ.
Wo yiane tili kalate a liti na, ba ye bulane wo mveane wo bo.

AVAL Ô NE BO MIMVEAN

Nge ô vaa mveane moné, a biôm biôé bife bi ne dia, ô ne belane mezene mefe ya bo mimvean na ô suk ésaé ya Éjôé. Bia te lañe mezene mete yôp. Nge wo kômbô belane zen, nge mezene méziñe ya été, taté’é loen, nge tili wofise ya nlame wôé, na ô yeme mezen ô ne belane me. Mbôle metiñ, a metiñe ma fombô toya me nji bo avale da minlam mise, é ne mfi na ô yene bôte ba yeme metiñ a mam ma fombô toya, ôsusua na wo top zene wo ye belane je na wo bo mvean.

Contrats d’assurances vie: Éyoñe wo bo mvean, é ne mfi na ô kate na, Bengaa be Yéhôva mbe ba ye nyoñe moné wôé ya assurance, nge nyi ya awo’one bisaé.

Moné bia naan e bank: Ô ne lôme moné wôé e compte Bengaa be Yéhôva, ô tôñe metiñe ya bank ya vôm ô too. Ô ne fe ta’a mam mfa’a ya na, bank ate a ke ôsu a lôme be moné to’o womien ô wuya.

Zene fe é ne na, mbu ôse, môt a kômbô suk ésaé ya Éjôé a ne tyi’i na a kuane biyem bié biziñ, nge abime bidi ya afup dé, moné a ye bi été, nye a ye ke futi nkop, e vôm a ne ntilane na, “Oeuvre Mondiale.”

Menda a mesi: Ô ne ve Bengaa be Yéhôva mimvean ba ye ke bulane wo, ve nge mveane te ô ne nda ô too, ô ne ke ôsu a nyiñ été nté ô ngenan ô vee.

Kalate élik: Ô ne ve Bengaa be Yéhôva mesi a menda, nge moné, ve wo yiane de bo a zene ya notaire. Nge na, ô ne tili nkômbane wôé e kalate élik wôé. Mboane te ô ne volô wo mfa’a ya toya.

Avale bia te jô, môt a bo avale mimveane te a yiane ta’a mam méziñ.

Nge wo kômbô yem abui mam afe, ô ne ke anjeñe mefoé dangan ô tobe vôm a ne ntilane na, “Aval ô ne bo mimvean ya suk ésaé ya si ése” nge na, ô ne tili wofise ya Béthel.