Évôvoé nlem—Zene ya fek
Toni a bo ésaé ya tuñulu minnôm mi bôt. A nga ke ba’ale nnôme minga éziñ. Éyoñ a kuiya vôm a saé, nde a nga kute mbé, ane minga éziñ a nga yalan. Minga ate a nga kobô Toni mbia abé, amu a nji ji’a zu ba’ale nyia wé a ne nnôm. Akusa bo na Toni a nji kui ésaé mvus, a nga sili minga ate njaman évôvoé été.
MÔS A nga beta ke wôé, nde minga ate a nga beta taté na a kobô nye abé. Jé Toni a nga bo? A jô na: “A mbe jam e nji be tyi’ibi mfa’a wom, amu a nji be a yiane komekane ma nalé.” Ve to’o éyoñe te, Toni a nga sili minga ate njaman. Nde fe a nga kate nye na a yeme na a tôban abui minjuk.
Nge ô mbe Toni, wo simesane na ô nga ye bo aya? Ye ô nga ye jeñe na ô liti fulu évôvoé nlem? Ye ô nga ye yen ayaé ya jôé womien? E ne été na, éko éziñ wo ye ke yene tyi’ibi ya ke ôsu a bo évôvoé, éyoñ ô tele e bité biziñ, aval ane ji bia te yene yôp. Éyoñe nlem ô tyele bia yôp, nge éyoñe ba soñe bia, e ne ayaé ya ke ôsu a bo évôvoé nlem.
Ve jame da, Kalate Zambe a tindi Bekristene na be bo évôvoé nlem. Mejô me Zambe ma liti na môt a ne évôvoé nlem a ne fek. Jacques a sili na: “Za ya be mia a ne fek a ñyeman? A liti’i mimboane mi mam mié amu mbamba ényiñe wé a évôvoé nleme ya fek.” (Jc. 3:13) Aval avé môt a ne évôvoé nlem a liti na a bili fek ja so yôp? A jé é ne volô bia na bi bi mbamba fulu ate?
NSISIM ÉVÔVOÉ WO LITI NA BI NE FEK
Évôvoé nlem ja bo na mejô me bo teke nen. “Evôvoé éyalan j’avôôn ñyaan; ve mbia éfia a soñ ayaa.”—Min. 15:1.
Éyalan bia ve a ôlun nlem é ne bo na ajô e nen, amu ja kô’ôlane mbon e nduan. (Min. 26:21) Ve éyalan bia ve a évôvoé nlem ja bo na ajô e man. E ne bo na nleme môt a ne ayok ô su’ulane nyemé.
Toni a nga tebe été te. Fulu évôvoé nlem Toni é nga nambe minga ate, ane a nga taté na a yôn. A nga kate Toni na, a tôbaneya abui minjuk, mi mia nambe nye, a mi mia nambe bôte ya nda bôte jé. Toni a nga bi fane ya kañete nye, mvuse ya valé nde ayé’é Kalate Zambe é nga taté—fo’o ve amu na a mbe évôvoé nlem, a jeñe fe mvo’é.
Évôvoé nlem é ne soo bia mevak. “Ebotan a bôt be ne minlem ne mieññ! Amu be aye nyoñe si nyô.”—Mt. 5:5.
Amu jé bôte be ne minlem évôvoé be ne mevak? Abui bôt e mbe ayok e ne mevak éyoñe ji, amu na da jaé fulu évôvoé nlem. Ényiñe jap é nto abeñ, a ba yeme na mbamba be mam ba yange be melu ma zu. (Beco. 3:12) Adolfo a ne njome mekônda e Panya, a simesan aval ényiñe jé é mbe ôsusua na a yeme benya mejôô.
A jô na: “Ényiñe jam é nji be é bili ngumba nsôñan. Me mbe éyoñ ése ma ji’a yaa, to’o bemvôé bam béziñ be mbe be nga ko ma woñ, amu me mbe mebun a évô. Ve jam éziñ e nga kui ényiñe jam. Môs éziñ me nga juan, nde be nga jii ma ôtyeñ biyoñe bisaman, me jañele abui metyi.”
Ve éyoñe ji, Adolfo a ye’ele bôte bevok a zene ya nkobô a mimboane na be bo évôvoé nlem. Abui bôt da subu nye bebé amu abeñe mefulu a bili. Adolfo a ne mevak éyoñ a yen aval a tyendéya. A ve fe Yéhôva akéva amu a nga volô nye na a bo évôvoé nlem.
Évôvoé nlem ja ve Yéhôva nlem avak. “A mone wom, bo’o fek, a ve nleme wom mevak, nde te m’aye yalane nyô a kobô me abé.”—Min. 27:11.
Diable, beta nsiñe Yéhôva a soñe nye. Zambe a bili beamu ya yaa éyoñ a yen avale Satan a biasé nye, ve Kalate Zambe a liti na, Yéhôva a ne “ôte’ete’e ya yaa.” (Nk. 34:6) Éyoñe bia jeñe na bi bo ôte’ete’e ya yaa, a évôvoé ane Yéhôva, bia tôñe zene ya fek, nje te ja ve Yéhôva nlem avak.—Beép. 5:1.
Émo ji é wô’ô bo mbia évô. Éko éziñ bia nyiñ a avale bôte da ‘wumulu ébien, e ne mebun, a mewôman. . . bebo bibôta, te jôô ébien, ayok.’ (2 Tim. 3:2, 3) Ve jam ete e nji yiane kamane Kristene na é bi nsisim évôvoé. Mejô me Zambe ma ba’alane bia na, “fe’e je aso yôp . . . e ne na . . . mvo’é, évôvoé.” (Jc. 3:17) Éyoñe bia jeñe mvo’é a éyoñe bi ne évôvoé, bia liti na bi bili fek ja so be Zambe. Avale fe’e te da ye tindi bia na bi yalan évôvoé été éyoñe ba soñe bia, a da ye bo na bi subu Yéhôva bebé, nnye a ne anjeñe ya fek é ne te nné.