YE WO TOO Ô YEMEK?

Mbia fulu Bejuif mbé a nga tindi Yésus na, a jô na be bo te kane ngana?

ATIÑE Moïse e mbe e va’a bôte ngule ya kane ngana; be mbe be jô’ô jôm éziñ ane: “Ane Zambe a vee,” nge ke “Ane Yéhôva a vee.” Ve melu me Yésus, bôte be mbe be kane’e ngana a lôte nné, asu ya na bôte be buni be. Ajô ete nde, Yésus a nga jô biyoñe bibaé na, mboon ôte ô ne abé. A nga jô na: “Nkobô wônan ô bo’o ve yaa, yaa; momo, momo!”​—Mt. 5:33-37; 23:16-22, Mfefé Nkôñelan.

Dictionnaire théologique du Nouveau Testament (nkobô Énglis) a jô na, “Bejuif be mbe be bili fulu ya kane ngana éyoñ ése ba jô jôm éziñ, asu ya na bôte be buni be.” Bifuse biziñe ya Talmud bia kat avale ngana môt a yiane tôé, a avale ngana a ne bo teke tôé.

Sa ke Yésus étam nnye a nga tyili mboon ôte. A kobô’ô ajô nsamba Bejuif éziñ, Flavius Josèphe, beta ñyeme mam a nga tili na: “Ba bene kane ngana, amu ba buni na, e kane ngana a ne abé a dañe minsos. Ba jô na, nge da sili na môt a taté kane ngana asu ya na, bôte bevo’o be vô’ôlô nye, nalé a tinane na a ne nlaa minsos.” Kalate Siraside (23:11), kalate wua ya ba Bejuif be nga tili a jô na: “E môt a kane ngana abui a kô’ôlane minkoban.” Yésus a nga jô na fulu ya kane ngana é ne abé. Nge bia kobô benya mejôô éyoñ ése, da ye ke sili na bi kane ngana asu ya na bôte be yeme na bia kobô benya mejôô.