3 Mvolan asu na bi jibi minjuk

Bi vo’o sa’ale nge dañe minju’u miziñ mia kui bia den. Bi ne nyoñ éve’ane na, môte wo nye’e a te wu, nge ke na, ô bili ôkon ô vo’o saéban. Ô vo’o bo aval afe, fo’o ve jibi. Ye Kalate Zambe a ne ngule ya volô wo na ô dañ avale minju’u ete?

ÔKON Ô VO’O SAÉBAN

Rose a jô na: “Me bili ôkon wo so ma metyi, wo bo na me wô’ô mbia mintaé kom ése. Ényiñe jam é nji fo’o beta bo aval é mbe ôsusua.” Beta nju’u wua a bili a ne na, biyoñe biziñ a kate kui na a bem ôsimesane wé ôse mam a yé’é éyoñ a yé’é Kalate Zambe, nge bo mame ya nsisim. Ve mejô bia koone me kalate Matthieu 19:26 me nga volô nye abui. Éfus éte ja jô na: “Zambe a ne ngule ya bo mam mese.” Rose a nga yemelane na, mezene mefe ya yé’é me ne. Mbôle mintaé a mbe a wô’ô mi mbe mi bo’o na a kate lañe biyoñe biziñ, a nga taté na, a vô’ôlô nlañane Kalate Zambe a bekalate bangan.a A jô na, “Nge me nji be me bili fan éte, me nji ye kui na me ba’ale ngul élat a Yéhôva.”

Éyoñe nlem ô ne nye abé amu a kate kui na a bo mam a mbe ngule ya bo ôsusua, a bi mvolane nleme mejô bia koone me kalate 2 Becorinthien 8:12, a jô na: “Éyoñe mbamba nkômban a né, Zambe a nyoñ jôme môt a ve, a fombô’ô biôme môt ate a bili, saa bi a nji bi.” (Mfefé Nkôñelan) Mejô mete me nga volô Rose na a yemelane na, Zambe a nye’e ngul ése a ve amu, a bo abim a ne ngule ya bo, akusa bo minné mié.

MINTAÉ YA NLEM

Delphine bia te jôô nye atata’a a simesan: “Éyoñe ngo jam é mbe mimbu 18 é nga wu, me nji be me buni’i na me ne ke ôsu a nyiñ, amu mintaé me nga wôk, mi nga lôte ma nkôñ. Me mbe me yeme’e na, mam ma ye tyendé.” A nga yene nya mvolane mejô ma so kalate Besam 94:19, vôme ntili besam a nga jô Zambe na: “Éyoñe nleme wom ô nga jaé a minsimesan, ô nga volô ma, ô nga ve ma avak.” (Mfefé Nkôñelan) A jô na, “Me nga ye’elane Yéhôva a volô ma na, me yeme mam me ne bo asu ya na me jibi mintaé.”

A nga taté na a ve émiene ngumba mfa’a ya na a volô bôte bevok. Biyoñe biziñ, a nga taté na a ve’e émien a nkôse mongô a bili, ñwô ôte ô ne ngule ya beta kañ, ja’a ô ne mbu’an. Aval ete da da, ja’a nlem ô mbe nye ntya’an, a nga yeme na a ne ngule ya volô bôte bevok. A simesan: “Me nga teme na, e belane miñye’elane ya Kalate Zambe a melebe ya été na me volô minleme mi bôte bia be be bia yé’é Kalate Zambe, a mbe zene Yéhôva a mbe a bela’ane je na a volô ma nlem.” A nga mane tili biyôlé bi bôte ya Bible be nga jibi abui mintaé. A nga yé’é na, “bôte bete bese be mbe mbane meye’elan.” A nga yeme fe na, “a ne ngule ya jibi mintaé mié nge a lañe Bible.”

Ayé’é ya Kalate Zambe é nga volô Delphine na a yé’é jam afe—a beme mise mé mame ya ôsu, sa ke mam me lôteya. Ndi nlem é ne kalate Mam Minlôman 24:15 ja volô nye nlem: “Bôt be aye wômô mesoñ, ba be ne zôsô a ba be ne bikotekot.” Abim avé a too ndi na Yéhôva a ye wômôlô ngo jé? Bi tame nye ve nkobô: “Me lôô ngo jam melu ma zu. Ésa wom émien a teléya ‘môs’ ôte, wu bia ngo jam bia ye beta yenan. Me lôô bia ngo jam bi kele bia vôé nseñ fo’o ve ane me nga yene nye a nye’e nye môs a nga bialé.”

a Ô ne vô’ôlô nlañane bekalate bete anjeñe mefoé jw.org.

Kalate Zambe a ne volô bia na bi bi mvolane minlem ja’a éyoñ minju’u mi lôteya bia nkôñ

AVAL AVÉ ZAMBE A NE VOLÔ BIA?

Kalate Zambe a yalane ne sañesañe na: “Yéhôva a ne bebé be ba bese b’aloene nye, ba bese b’aloene nye a benya mejôô. A ye jalé nkômbane ya ba b’ako nye woñ; a ye fe wô’ô ñyône wop, a nyii be.” (Besam 145:18, 19) Ye jam ete e nji nambe bia minleme nga? Nde, aval avé Zambe a yalane bôte ba jeñe mvolane wé meye’elan été?

A VE BIA NGUL:

Minju’u miziñ mi ne te’e bia—mfa’a ya minsôn a mfa’a ya nsisim. (Minkana 24:10) Ve Yéhôva “a ve nyô a ne ate’e ngu, a kô’ôlan éwôlô be nyô a ne te ngu.” (Ésaïe 40:29) Nlômane Paul, ñwô ôte ô nga jibi ngule bitibela’a, ô nga jô na: “Me ne ngule ya bo mam mese be nyô a ve ma ngu.” (Bephilippien 4:13) Zambe a nga ve Paul mbamba nsisim. Wo fe ô ne sili Zambe na a ve wo mbamba nsisim.—Luc 11:13.

A VE BIA FEK:

Jé wo yiane bo asu na ô tu’a wôk a tôñe melebe ya Kalate Zambe? Ñyé’é Jacques a tili na: “Nge fe’e ja jembane môt éziñe ya be mia, a jaké’é je Zambe, nye a ve bôte bese tyi’ibi tyi’ibi, te minkomekan, ja ye vebane be nye.” (Jacques 1:5, Mfefé Nkôñelan) Mimboone miôé mi ne lu’an a meye’elan wo te bo nge wo lañe Kalate Zambe a tôñe miñye’elane mia so été. (Jacques 1:23-25) Éyoñe wo bo nalé, wo ye yene na melebe ya Bible me ne mfi.

A VE BIA MVO’É JÉ:

Ja’a éyoñ nlem ô tyele wo yop abui, Yéhôva a ne volô wo na ô tabe ne mieññ. Mejô mé ma jô na: “Te tyelane minleme yôp a jam éziñ; ve mfa’a ya jam ese, mam mi asili me kateba’ane be Zambe a meye’elan a nja’an a mvean akéva. A mvo’é Zambe, nje éte je adañe fe’ ése, je aye ba’ale minlem mienan a minsimesane mienan be Krist Yésus.” (Bephilippien 4:6, 7) Nga ô ne sili Yéhôva na a bôé wo nleme si?

Ve jé ô ne bo nge minju’u miôé mia ji’a ke man? Te ji’a tyi’i na Zambe a vuaneya wo. Ja’a minju’u mia ke ôsu, Zambe a ne ve wo ayo’o nlem a ngule ya jibi mie. (1 Becorinthien 10:13) Kalate Zambe a ka’ale fe na, éyoñ minju’u miangan mia ye man éyoñe jia ya biyoñ bise ja ye kui!