“Zambe a mbe vé?”

ÉYOÑE BIBUBUA BI MAME BIA KUI, YE Ô SILIYA WOMIENE NA, ‘ZAMBE A MBE VÉ?’ NGE NA ÉNYIÑE JÔÉ, YE JAME DA DUBETANE WO NLÔ E BOYA NA Ô SILI WOMIENE NGE ZAMBE A NYOÑE FO’O WO NGAP?

Éko éziñe wo wô’ôtane ve ane Sheila, minga a nyiñ États-Unis. A nga yaé nda bôt e mbe e nye’e mame me Zambe; a jô na: “Ma nye’e Zambe a so mongô, amu nnye a ne Nté wongan. To’o nalé, me nji wô’ôtan éyoñ éziñe na me ne nye bebé. Me mbe me simesane na a lôô ma, fo’o ve ôyap. Me nji be me wô’ôtane na a vini ma, ve da me nji be fe me buni’i na a nyoñe ngap a ma.” Amu jé Sheila a bili bisô nlem? Émien a timine na: “Bibubua bi mam bi nga kui nda bôte jam fifiti, a jam ete e nga yené ane Zambe a nji volô bia vôm éziñ.”

Aval ane Sheila, ô ne buni na Zambe ya Ngul ése a ne fo’o vevee. Ve, ô ne sili womiene nge a nyoñe fo’o wo ngap. Zôsôa môte Job, môt a mbe a buni na Nté wongan a ne ngul a fek, nye’ fe a nga bi avale bisô ete nlem. (Job 2:3; 9:4) Éyoñe Job a maneya bo nte’an a bibubua a nga tôbane bie, teke’e mvolan éziñ, a nga sili Zambe na: “Amu jé wo solé asu dôé? A nyoñe ma ane nsiñe wôé?”​—Job 13:24, Mfefé Nkôñelan.

Jé Kalate Zambe a jô? Ye Zambe nnye a yiane be’e ayeme éyoñe bibubua bi mam bia kui? Ye jam éziñe da liti fo’o na Zambe a nyoñe môta biname ngap, a môt ase ya be bia ngap? Ye môt éziñe ya be bia a ne fo’o kui na a yem nge Zambe a yene fo’o bia, nge a wô’ô bia, nge a yeme tebe été jangan, nge a volô bia na bi dañe minju’u miangan?

E minlô mejô mia zu tôñe valé, bia zu yene jôm bitétéa bia ye’ele bia a lat a avale Zambe a nyoñe bia ngap. (Beromain 1:20) Mvuse ya valé, bia ye yene jôme Kalate Zambe a jô a lat a nyoñane ngap Zambe a nyoñe bia. Avale wo ye ke ôsu a “yeme nye” a zene ya bitétéa bié a Mejô mé, aval ete fe wo ye bi ndi nleme na, “a nyoñe wo ngap.”​—1 Jean 2:3; 1 Pierre 5:7, NW.