Mam me ne bo na ayé’é dôé é tu’a bo mvaé a abeñ

Josué a lañe kalate Metiñ; mimfine ya Jéricho mia ku, ve nda Rahab ja li’i é tele ne bip; Josué a bete mo yôp a ye’elane Yéhôva

JOSUÉ a be’e adite mbe’e. Nnye a yiane kee bone b’Israël e Si ya ntiñetan. Ve Yehôva a ve nye ngule nyôl a jô’ô nye na: ‘Bo’o ngu a ayo’o nlem. Tôñe’e metiñe mam. Lañe’e me môse ba alu mfa’a ya bo mam mese me ne ntilan été. Ndemben wo ye bo fek, a mam mese ma ye wulu mvo’é asu dôé.’

“Mbia biyoñ” bia nyiñe bi, bia fe bi be’e adite mimbe’e. (2 Tim. 3:1) Ve nge bia tôñe melebe Yéhôva a nga ve Josué, mam me ne fe wulu mvo’é asu dangan. Ajô te, bia yiane lañe Bible mban, a jeñe na bi tôñe miñye’elane ya été.

Ve abui ya be bia da meme na, e nji dañe jibi ayé’é, teke ke dañedañe yeme yé’é. Ve mbôl ayé’é Bible e ne nya mfii, tame lañané nka’ale ô ne nlô ajô na “Tame ve’ele mam ma,” nka’ale ôte wo ve melebe ma volô na bi tu’a yem, a na bi tu’a nye’e bi yé’é Bible.

Ntili besam a nga yia na: “Tindi’i me na me ke zene ya mebendé môé, amu m’ayen mvaé été.” (Bs. 119:35) Wo fe ô ne nye’e ayé’é ya Kalate Zambe. Nté wo ye ke ôsu a fa’a nye, wo ye koon abui bidima bi mam été.

To’o ô nji bi mbe’e ya wulu ngum ayoñ ane Josué, ô bili minju’u mia té wo mebo si. Aval ane Josué, yé’é mam me ne volô wo na ô dañe minju’u mite, a tôñe me ényiñe jôé. Nge wo bo de, wônaa wo ye tu’a bi fek, a mam ma ye fe wulu mvo’é asu dôé.

TAME VE’ELE MAM MA

Taté’é ye’elan. Zambe ya ngul ése a nga ba’ale asimesan é ne Bible asu mfi wôé. Nde, éyoñ wo lañe Bible, ye’elane nye na a volô wo na ô tu’a wô’ô mam wo yé’é, na ô ba’ale me, a na ô tôñe me ényiñe jôé.—Esdras 7:10.
Sili’i womiene minsili mi nté wo lañ Bible nge ke bekalate ya Tin Ékôan: ‘Jé jam ma lañe di da ye’ele ma a lat a Yéhôva? Aval avé da lu’an a nlô ajô ya Bible? Aval avé me ne belane miñye’elane mite na me volô môte mfe?’
Bindi’i mam wo yé’é. Tebe’e mone jôm ô fas, a sili womiene na: ‘Mam ma lañe ma ma bo na me wô’ôtan aya? Amu jé ma wô’ôtane nalé? Ye me tatéya tebe aval été éte melu mvus, ye me tele été éte den, a ye me ne tebe été éte melu ma zu? Aval avé me ne belane miñye’elane mi ényiñe jam?’ (Job 23:5; Bs. 49:3) Jeñe’e fe na ô yem nge ô nto ngule ya liti môt amu jé Yéhôva a tyili bebo bisaé bé mam méziñ, a mbia be mam be ne kui môt a biasé melebe me Yéhôva mete.—Dt. 32:28, 29.
Bo’o ane womien ô ne valé éyoñ wo lañ minkañete miziñe ya Bible. Nge wo lañe nkañete Joseph, tame ve’ele bo ane wo yen ane bone be Jacob ba kuane b’Ismaélite mone monyañe wop! (Met. 37:18-28) Ô lôô jé? Wo wô’ô bôt be jô’ô aya? Avale menyum avé wo wôk? Tebe’ été bôte ya nkañete wo lañ. Ba simesan a wô’ôtan aya? Mboan ôte wo ye bo na ayé’é dôé é tu’a bo mvaé, a na, ô tu’a wô’ô mam wo yé’é.
Bela’ane bikpwelé bi ne volô wo nté wo yé’é. Jeñe’e na ô mane yemban a bikpwelé bi nee nkobô wôé, bi ya nkol a bekalate. Jeñe’e mvolan nge ô nji tu’a yem avale ba belane bie. Index a Guide de Recherche Bengaa be Yéhôva be ne volô wo na ô yene mame Tin ékôan é kuliya a lat a minlô mejô miziñ, a na, ô yen avale Tin Ékôan ja timine bifuse biziñe ya Bible. Bela’ane beappendice ya Traduction du monde nouveau nge a kuiya nkobô wo wôk. Beappendice bete ba volô na bi yem vôm mame ya Bible me nga boban, éyoñ me nga boban, avale be mbe be ve’e biôm ôteñ, akeke.
Wôleka’an beta be mam wo te yé’é asu na ô bo teke ji’a vuane me. La’ane bôte bevo’o mam mete. Jeñe’e na ô belan asimesan éziñe ya été nkañete. Nalé a ye volô na womien ô ba’ale miñye’elan mite ôsimesan, a na bôte befe be yene mfi ya mam wo te yé’é.