Saé’ a Yéhôva môs ôse

1. Aval avé bi ne saé a Yéhôva?

ÉYOÑ Yéhôva a té’ bôt, a mbe a yii’ na, ba be be be saé fufulu a tôé minsôñane mié. Akusa bo abé é nga nyiin émo, bezôsôô be bôt be ne ngule ya saé a Yéhôva môs ôse. Bi ne “beébe bebo bisaé be Zambe” éyoñ bia kañete mbamba foé ya Éjôé, a bo bôte beyé’é. (1 Bec. 3:5-9) Tame ve’ele simesane beta mvome bi bili na, Nté biôm bise a yebe na bia be nye bi bo aval ésaé ete! Ve bia saé ki a Zambe ve éyoñ bia kañete a bo bôte beyé’é. Ayé’é di, bia zu yene na bia saé fe a Yéhôva éyoñ bia volô nda bôte jangan a bobenyañe bangan ya nsisim, éyoñ bi ne anyep, éyoñ bia su’u bisaé ya ékôane Yéhôva, a éyoñ bia nene ésaé nkañete jangan.​—Beco. 3:23.

2. Amu jé ô nji yiane ve’ ésaé wo bo Yéhôva a ji bôte bevok?

² Nté bia yé’é nlô ajô wu, te jeñe na ô ve’e ésaé jôé a ji môte mfe. Te vuane na bité bi bôt bia selan, bôte bese be nji bi abime ngule da, nge ke ôkala wua. Nlômane Paul ô nga tili na: “Môt ase a fombô’ô mboane wé émien, wôna a ye bi ava’a dé de aso ve be émien, [teke sengan a môte mfe].”​—Beg. 6:4.

SU’U NDA BÔTE JÔÉ A BOBENYOÑE YA AKÔNDA

3. Amu jé bia jô na môt a nyoñ ngab a nda bôte jé a saé a Zambe?

³ Yéhôva a yi na bebo bisaé bé be nyoñe ngap a menda me bôte map. Éko éziñe wo yiane saé na ô toñe nda bôte jôé. Abui binga da jibi tabe teke ésaé, na e yeme yale bone bap. Bôte béziñe ki ba yiane nyoñe ngap a bebiaé bap be nto mintutuñ. Mam mete mese me ne mfi. Bible a jô na: “Nge môt éziñ a bo te ba’ale bôte bé, a adañedañe bôte ya nda jé émien, nnye ate a maneya kat mbunan, a a ne abé adañe nyô a ne te buni.” (1 Tim. 5:8) Nge ô telé été jia ya bité bia te lañe yôbe le, éko éziñ ô nji bi abui éyoñ asu mame ya nsisim. Ve te bili atek! Amu Yéhôva a nye’e éyoñe wo nyoñe ngab a nda bôte jôé.​—1 Bec. 10:31.

4. Aval avé bebiaé be ne telé mame ya nsisim ôsu, a bibotane bivé ba bi éyoñ ba bo nalé?

⁴ Bebiaé fe ba saé a Zambe éyoñ ba volô bone bap na be bi minsôñane ya nsisim. Abui bobejañ é ne bekpwa’a mefane den amu bebiaé bap be nga volô be na be bo de. Bia lañ été: bemissionnaire, Bebéthelite, a ba ba su’u ésaé vôme bekañete mbamba foé ba jemban. E ne été na éyoñ bongô ba nyiñ ôyap, e nji bo tyi’ibi na ba bebiaé bap be yenan éyoñ ése. Ve bebiaé ba telé nkômbane Yéhôva ôsu ba liti bone bap mfi ya bo te telé ésaé nkpwa’a mefane jap. Amu jé? Amu ba bi abui avak éyoñ bone bap ba telé mame ya nsisim ôsu. (3 Jean 4) Abui ya be be da yiane wô’ôtan ane Anne, nnye ate a nga jô na a ‘kee’ Yéhôva mone wé Samuel. Bebiaé bete ba yene jam ete ane beta ébotan. Be nji jôban.​—1 Sa. 1:28.

5. Aval avé ô ne su’u bôte ya akônda dôé? (Fombô’ô fôtô ya atata’a.)

⁵ Nge ô nji bi beta mimbe’e ya nda bôt, jé ja kamane wo na ô suk bobenyoñ ba sutane ba’ale bebiaé bap be ne mintutuñ, minnôm, akeke? Tame tu’a jeñe na ô yemelane za ya akônda dôé a yi mvolan. Éko éziñ ô ne tyi’i na wo volô sita éziñ a ba’ale mbiaé wé a nto ntutum; ô ne lôt éyoñ a nye nté sita ate a bo mam mefe. Ô ne fe bo ô kele’ liti bobejañ béziñe bisulan, a ke be minlôman, nge ke nyoñe be na mi ke jome nkôkon éziñ. Za a yem? Éko éziñ Yéhôva nnye a belane wo aval ete na a yalane meye’elane me bobejañe bete.​—Lañe’e 1 Becorinthien 10:24.

BO’O ANYEP

6. Jé ja tinane na e bo anyep?

⁶ Benya Bekristen be ne anyep. (Beh. 13:2) Minkañete miziñe ya Kalate Zambe mia ye’ele bia na bia yiane nye’e beyeñ. (Met. 18:1-5) Môt ase ya be bia a ne ngule ya volô bôt éyoñ ése, a bia yiane volô bôte bese, to’o ba bia be be bi nji bo ñyebe wua.​—Beg. 6:10.

7. Amu jé wo yiane bo anyep a bekpwa’a mefan?

⁷ Ye ô ne fo’o liti bekpwa’a mefan fulu anyep? Mbamba zene mfe ya wulu a Zambe le. (Lañe’e 3 Jean 5, 8.) Éyoñ bia lôt éyoñ a bekpwa’a mefan, nalé a bo na ‘bia be be bi volôbane minlem.’ (Bero. 1:11, 12) Jam e nga kui mojañ Olaf da yemete de. A jô na éyoñ a mbe mongô, teke môt éziñ ya akônda dé a mbe ve ba’ale njome mekônda nda jé. Bebiaé bé ke be nji be Bengaa be Yéhôva; ve Olaf a nga sili be nge njome mekônda a ne zu tabe nda jap bone melu. Be nga kañese a jô Olaf na, nté nneñ wé a ne valé, a ye bômbô éto balanda. Jam ete é nji ndeñele nye. Olaf a jô na: “Me nga lôt angôndô ya mbamba sondô! Bia njome mekônda bi mbe bi vee ndibe tyé ôse na bia laane nté bia nyoñ étyamakak. Meleb a nga ve ma, me nga tindi ma na, ma fe me kômbô bo nkpwa’a mefan.” Mimbu 40 mi ndeme lôte mi, Olaf a nga saé ane missionnaire mesi abui.

8. Amu jé bia yiane mvamane môt ja’a éyoñ a te taté dimine nyoñ bia? Va’a éve’an.

⁸ Ô ne bo abui mam asu na ô liti beyeñ fulu anyep, to’o éyoñ môt a te taté dimine nyoñe wo. Tame vô’ôlô jam e nga kui sita éziñ ya Espagne. A mbe a yé’é Bible môs éziñ a Yesica, ngone ya Équateur; e viane teme na Yesica a nga yôn. Amu jé? Yesica a nga kate nye na, ôsusua na a zu nyiñ Espagne, a mbe mbia azoé. Ba mone be mbe be wo’o zaé, susu’a jôm a mbe ve ve mone wé é mbe ve bone mendime ya nyu. Môs éziñ a mbe a fôlô’ mon, a ye’elane Zambe na a volô nye. Ane Bengaa bebaé be nga kute mbé, ve Yesica a nga yaa be, a mane fe nyab bekalate be nga ve nye. Éyoñ éte a nga sili be na: “Ye bekalate ba mbe mone wom é di nga?” Besita bete be nga jeñe na be volô nye nlem, ve be nga wu nju’u zezé. Mvuse ya valé be nga zu nye telé ékate bidi mbé yôp. Jam ete é nga nambe Yesica abui, a nga ve fe émiene bijô amu éyoñ besita bete be nga zu jome nye, a nji yene jam ete ane wo Zambe. Nga mi lôo ane fulu akap é nga wum mbamba bibuma!​—Ec. 11:1, 6.

E SU’U BISAÉ YA ÉKÔANE YÉHÔVA

9, 10. (a) Éyoñ évé e nga sili na, bebo bisaé be Yéhôva ya melu mvus be su’u bisaé bi tii a nya ékaña’a? (b) Bisaé bivé befam ba yiane bo akônda melu ma?

⁹ Melu mvus, bone b’Israël be mbe be yi’ane ve bebien na ba su’u bisaé biziñ bi mbe bi tii a nya ékaña’a. (Nk. 36:2; 1 Mka. 29:5; Neh. 11:2) Dene fe, bi bili fane ya ve éyoñe jangan, moné wongan, a atyeñ mboone mam dangan na bi volô bobejañ a besita. Nge ô bo de, wo ye bi abui mevak a abui bibotan.

¹⁰ Kalate Zambe a jô befame ya akônda na, be jeñe na be bo bediakon a bemvendé. (1 Tim. 3:1, 8, 9; 1 P. 5:2, 3) Ba ba bo de ba liti na be bili nkômbane ya su’u bobejañ nsisim a minsôn. (Mam. 6:1-4) Ye bemvendé be siliya wo nge wo kômbô su’u bisaé biziñe ya akônda aval ane e nyoñ bôt, e saé ata’a bekalate, e bo mfuban Aba Éjôé, e kabe bôte mebôta me nkañete, akeke? Ba ba bo bisaé bite ba bi angôndô ya abui meva’a ya saane bôte bevok.

11. Aval avé sita éziñ a nga bi mimfefé bemvôé amu a nga su’u bisaé ya ékôane Yéhôva?

¹¹ Ba ba su’u bisaé ya ékôane Yéhôva be wô’ô bi mimfefé bemvôé. Margie a su’u ésaé melôñ den a nto mimbu 18. A jô na, ésaé éte é boya na a yañele abui bisoé besita. Nalé a nga bo na ba be be be veane ngul nyôl mfa’a ya nsisim. (Bero. 1:12) Éyoñ a tôbane meve’ele ényiñ jé, mvolan wo so nye be bemvôé a nga bi éyoñ a mbe a su’u ésaé melôñ. Ye wo fe ô su’uya fo’o ésaé melôñ môs éziñ? To’o ô nji yeme ajô melôñ, ye ô ne fo’o ve womien asu ésaé éte?

12. Jé ô ne bo asu na ô su’u bôte ba te tôbane beta ébubua?

¹² Éyoñ beta ébubua a kui, bebo bisaé be Yéhôva ba jeñe mezene ya volô bobenyañ bap. E wô’ô kui na be ve be moné. (Jean 13:34, 35; Mam. 11:27-30) Be wô’ô fe be volô kôme menda map, nge ke lôñe be menda mefe. Ndôn é nga bo na nda Gabriela, sita ya Pologne, é ku; mvolan bobejañ ya mekônda ya mefefel ô nga nambe nye abui. A jô na: “Me nji kômbô kobô ajô biôm me nga jañele, amu a ne ve biôm bi mo. Ve ma kômbô kate mia abim biôm me nga bi. Jam e nga kui ma é nga bo na me tu’a yeme na, e bo Ngaa Yéhôva a ne angôndô ya beta ébotan, a ne fe jam da soo môt abui meva’a ényiñ.” Ba bese be nga bi aval mvolan ete ba jô na ba wô’ôtane fe nalé. Bôte ba su’u aval bisaé ete be’efe ba bi abui bibotan.​—Lañe’e Mam minlôman 20:35; 2 Becorinthien 9:6, 7.

13. Aval avé élate jangan a Yéhôva ja yem éyoñ bia ve biabebien asu bisaé ya ékôane jé? Va’a éve’an.

¹³ Stephanie a ne sita ya Amelka, a wô’ô mvaé ya su’u bobejañ ba tube bita mesi map. Ba bobejañe befe ba volô be na be bi vôme ya tabe a biôm bi nda. A jô na: “Bia bi ngule nyôl éyoñ bia yen ane ba vak amu nye’an bobejañ ba liti be wo nambe be. Ba buni na bia étam bia volô be, nde mbe ba dañedañe volô bia. Bia tu’a nye’e Yéhôva amu bia yen ane élat jangan, mbunan wongan, a ndi bi bili be nye bia nen, nalé a bo na bi ve nye akiba amu bibotan bia bi ékôane jé.”

NENE’ ÉSAÉ NKAÑETE JÔÉ

14, 15. (a) Ésaïe a nga bili fulu fé? (b) Aval avé bi ne vu nye den?

¹⁴ Ye wo kômbô nene ésaé wo bo a Yéhôva? Ye wo kômbô ke su’u ésaé vôm bekañete mbamba foé ba jemban? E ne été na, e nji dañe sili ve na, bi kôlô vôm bi to na bi ke su’u ésaé vôm mfe. Ve bobejañ béziñ be nga bo de, amu be mbe ngule ya bo de. Bobejañ bete ba vu nkulu mejô Ésaïe. Éyoñ Yéhôva a nga sili na: “Za m’aye lôm, a za a ye ke ajô dangan?” Ésaïe a nga yalane na: “Me nyô; lôme’ ma.” (És. 6:8) Ye wo fe ô bili nkômban a ngule ya su’u ékôane Yéhôva aval ete? Mam mevé ô ne bo?

¹⁵ Yésus a nga kobô ajô ésaé nkañete a jô’ô na: “Bidi abui bi nto bitôtôlô, ve bebo bisaé be ne tyôtyoé. Ajô te ye’elan mie bidii na, a lôme beva bidi afupe dé.” (Mt. 9:37, 38) Ye wo fe ô ne nyoñ ésaé nkpwa’a mefan a ke su’u ésaé vôm bekañete mbamba foé ba jemban? Ye ô ne volô môte mfe na a bo de? Abui bobejañ da jô na, e ke su’u ésaé vôme bekañete mbamba foé ba jemban a ne mbamba zene ya liti na bia nye’e Yéhôva a bôte befe. Ye wo simesan mam mefe ô ne bo asu na ô nene ésaé nkañete jôé? Bo’o me, a wo ye bi abui mevak.

16, 17. Mam mevé mefe ô ne bo asu na ô nene ésaé wo bo Yéhôva?

¹⁶ Ye ô ne saé Béthel nge ke su’u ésaé meloñ, to’o ô nji saé môs ôse? Ékôane Yéhôva ja yi bôt be bili nkômbane ya ke vôm ase be ne lôme be, a bo ésaé ése be ne ve be. Nalé a tinane na, be ne nkômesane ya kañese ésaé ése ba jô be na be bo, to’o be ngenane teke tame bo je môs éziñ. Jam Yéhôva a nye’e é ne na, môt a bi nkômbane ya bo fatan ésaé ése ba ve nye ékôane Jé.​—Bs. 110:3.

¹⁷ Ye wo yi na ékôane Yéhôva é yañele wo asu na ô tu’a yeme bo ésaé nkañete? Nge nalé, wo yiane jeñe na ô jalé mam ma sili asu na ô ke Sikôlô bekañete mbamba foé ya Éjôé. Sikôlô ate a yañele bekpwa’a mefan na be tu’a yeme bo ésaé jap vôm ba lôme be. Ba ba kômbô tabe sikôlô ate ba yiane bo nkômesane ya ke vôm ase ba lôme be. Ye wo fe wo kômbô tye’e ébotan éte?​—1 Bec. 9:23.

18. Bibotane bivé bia bi éyoñ bia saé a Yéhôva môs ôse?

¹⁸ Bebo bisaé be Yéhôva ba yiane bo akap, nalé a tinane na, ba yiane liti bôte nye’an, mbamba nlem a mvamane be môs ôse. Éyoñ bia bo de, bia bi abui mevak a mvo’é. (Beg. 5:22, 23) To’o bi tele été évé, bi ne ngule ya nyiñe meva’a été, nge bia vu fulu akabe Yéhôva, a nge bia nyane ma’a bi bili na bia saé fufulu a nye.​—Min. 3:9, 10.