Zambe a ne jôé na za?

Éyoñe wo kômbô yembane môt, nsili ô ne taté sili nye ô ne na “ô ne jôé na za?” Nge ba jô wo na ô sili Zambe nsili ôte, aye yalane wo aya?

“Ma me ne Yéhôva. Jôé dame le.”—Ésaïe 42:8.

Ye ô nji be ô yeme’ éyôlé ete? A ne bo nalé, amu na abui bekôñelan Kalate Zambe e nga belan éyôlé Zambe ve mone jôm, ba bevo’o ki be nji belane je. Be nga fole éyôlé Zambe a môé mese’esa ane “TATE.” Ve jame ya yeme e ne na, éyoñe be tili’i mimvulekane mi kalate Zambe kôa, éyôlé Zambe é mbe é ntilan été biyoñ 7 000 a mvuk. Nkobô Hébreu ba tili éyôlé Zambe a bikanga binyine bi : YHWH nge na JHVH. E ne njôan, den a nga ke mimbu na, ba yiane tote bikanga bite kobô bulu na “Yéhôva.”

Éyôlé Zambe mimvulekane Kalate Zambe ya éwuwua mañ nkobô Hébreu — Mvulekane kalate Besam ya éwuwua mañ Ézezañ mbu 30 a 50 É.J., HÉBREU

Éyôlé Zambe nkobô anglais nkôñelan Kalate Zambe Tyndale — Nkôñelane Tyndale 1530, ANGLAIS

Éyôlé Zambe nkobô Paña nkôñelane Kalate Zambe Reina-Valera a nga kôñelan — Nkôñelane Reina-Valera 1602, ESPAGNOL

Éyôlé Zambe nkobô Chinois nkôñelan Union — *Nkôñelan Union* 1919, CHINOIS

Bia koene éyôlé Zambe mimfufube mintilane ya nkobô Hebreu a abui minkôñelane mi Kalate Zambe

MAM MA LITI NA ÉYÔLÉ ZAMBE E NE NYA MFII

Éyôlé Zambe e ne mfi asu dé émien. Môt éziñ a nji ve Zambe éyôlé; émien a nga yôbane je. Yéhôva a nga jô na: “Jôé dam nde di nnôm éto, nde fe e ne ndeme ya simesane ma akui miaé mi bôte mise.” (Nkôlan 3:15) Kalate Zambe été, éyôlé Yéhôva, nje ja dañe yené a lôte biyôlé mese’esa bié bise, ane Zambe ya ngul ése, ésaa, Tate nge Zambe; a ja dañe yené a lôte biyôlé bi bôt ane Abraham, Moïse, David, nge Yésus. Jame da dañ e ne na, Yéhôva émien a yi na, bôte be yeme éyôlé jé. Kalate Zambe a jô na: “B’aye yeme na, wo étam, nyô jôé dé e ne Yéhôva, ô ne nyô a dañe bôte bese yôp a jôô si se.”—Besam 83:18.

Éyôlé Zambe e ne mfi asu Yésus. Meye’elane ba loene den na meye’elane me Tate, Yésus a nga jô beyé’é bé be ye’elane Zambe na: “Jôé dôé e bo’ étyi.” (Matthieu 6:9) Yésus émien a nga ye’elane Zambe na: “A Tat, wumulu’ jôé dôé.” (Jean 12:28) Yésus a nga telé ñwumulan éyôlé Zambe ôsu ényiñe jé, jôm ete nje a nga ye’elane na: “Me nga liti be jôé dôé, me aye fe beta liti de.”—Jean 17:26.

Éyôlé Zambe e ne mfi asu bebo bisaé bé. mien. Bebo bisaé be Zambe ya melu mvus be mbe be jeñe’ môt ane kamane be a nyii be. Nde be nga wô’ô na mam mete mese me tii a éyôlé Zambe. “Jôé Yéhôva e ne ôlem ô ne ngu; zôsôa môt a ke mbil été, a tabe mvo’é.” (Minkana 18:10) “Môt ase a ye loene jôé Yéhôva a ye nyiñ.” (Joël 2:32) Kalate Zambe a liti na éyôlé Yéhôva ja ye bo na nsela’ane a bo zañe ba ba kañe Zambe a ba be nji kañe nye. “Amu meyoñe mese m’awulu, ayoñ ese a jôé ya zambe wé; a bia bi aye wulu a jôé ya Yéhôva Zambe wongan nnôm éto a nnôm éto.”—Michée 4:5; Mam Minlôman 15:14.

JAM ÉYÔLÉ ZAMBE JA YE’ELE BIA

Éyôlé Zambe ja bo na bi yemelan nye. Beyeme mam be ne tyiñe na éyôlé Yéhôva ja tinane na: “A bo na é boban.” Yéhôva Zambe a nga ve bôt atinane ya éyôlé jé éyoñ a nga kate Moïse na: “Me to nyô me to.” (Nkôlan 3:14) Be ne beta kôñelan bifia bite na “ma ye bo jôme mamien ma tyi’i na ma bo.” Éyôlé Zambe e nji tinane ve na, a ne nté biôme bise bi ne yôp a si. Ja tinane fe na a bili ngule ya bo na, émien, nge ke biôme a nga té bi bo jôme ése ja sili asu ya na a tôé nsôñane wé. Biyôlé mese’esa bié bia liti bia abime nkôñ a bili, abim éjôé a bili, nge abime ngul a bili; fo’o ve éyôlé jé étam, Yéhôva, nje ja kôme bia liti jôm ese a né a jôm ese a ne bo.

Éyôlé Zambe ja liti na a nyoñe bia ngap. Atinane ya éyôlé Zambe da liti na a nye’e biôme bise a nga mane té a nlem ôse, ja’a môt a binam. Nde fe mbôle a nga bo na bôte bese be yeme éyôlé jé, nalé a liti na, a yi na bôte bese be yeme nye. Nga émien nnye a nga tyi’i na a kate bia éyôlé jé ôsusua na bia yeme je a belane je? Nde Zambe a nji nye’e bi simesane na, bi vo’o bo amvôé a nye; a yi bi yeme na, a wô’ô bia mintaé a na bi ne late ngbwa a nye.—Besam 73:28.

Bia liti na bia fe bia nyoñe Zambe ngap éyoñe bia belane éyôlé jé. Bi tame jô na, wo kate nyo mvôé na a bo’o a bela’ane éyôlé jôé, éyoñ ése a loene wo. Wo ye wô’ô aya nge môt ate a vañe bene belan éyôlé jôé? Éko éziñ wo ye sili nlem été, nge môt ate a kômbô fo’o bo nyo jôé. Zambe fe a wô’ô avale da. Yéhôva a nga kate môta binam jôé dé, amu a yi na a belane de. Éyoñe bia belan jôé Zambe, bia liti na bia kômbô bo mvôé jé. Amu a kui na, a yemelan “ba be nga simesan jôé dé”!—Malachie 3:16.

E yeme éyôlé Zambe a ne beta jam ôsu, môt a yiane bo asu ya na a yeme nye. Ve bi nji yiane su’u valé. Bia yiane kôme yeme mefulu me môt a be’e éyôlé éte. Bia yiane yem mam a nye’e.

ZAMBE A NE JÔÉ NA ZA? Zambe a ne jôé na Yéhôva. Éyôlé éte ja liti na a ne Zambe a bili ngule ya tôé nsôñane wé

ZA A NGA TÉ ZAMBE?

Abui bôte da sili nsili ôte. Éko éziñ womiene fe ô siliya wô. Bi ne beta sili nsili ôte avale di: Nge émo minlañ, si nyô a biôme bise bi ne été bi bili atata’a, nde za ñhe a nga té Zambe?

Beyeme mam ba jô na, émo minlañ a si nyô bi bili atata’a. Nalé a lu’an a mejô ma: “Atata’a Zambe a nga té yôp a si.”—Metata’a 1:1.

Atété a beplanète be nji bialé etam. Asu ya na jôm e bialé, jôm éziñ ja yiane bo na e bialé. Nge Nté biôm a nji be atata’a, nne atété a beplanète be nga ye bialé aya? Amu Yéhôva Zambe a ne nsisim wo dañe ngul a fek, jôm ete nje biôme bise bi nga téban.—Jean 4:24.

Kalate Zambe a jô na: “Te yene beta minkôle mi za té’é, nge na ô ngenan te té si nyô a si se, ja’an ataté nnôm éto akekui nnôm éto ô ne Zambe.” (Besam 90:2) Zambe émien a nyiñe den a too nnôm éto a nnôm éto. Jôm ete nje, “atata’a” a nga té émo minlañ a si se.—Nlitan 4:11.