Amu jé bia yômbô a wu?

Zambe a nga jô nye na: “Môs w’aye di [ébuma y’élé éte], w ’aye fo’o wu.” (Metata’a 2:17) Zambe a nji ye ve Adam atiñ ete, nge a mbe a yeme’ na a ye su’ulane yômbô a wu. Adam émien a mbe a yeme’ na, nge a bo te di ébuma ya élé éte, a ye ke wu.

É nji be é sili’i na Adam ba Ève be di ébuma ya élé éte asu na be nyiñ, amu bidi bi mbe afub ete ne vôô nat. (Metata’a 2:9) Be nga ye liti na ba bo Nyô a nga ve be ényiñ mewôk éyoñ be nga ye bo te di ébuma ya élé éte. A be nga ye liti na Zambe nnye a yiane be liti zene ba yiane tôñ.

AMU JÉ ADAM BA ÈVE BE NGA WU?

Asu na bi yem amu jé Adam ba Ève be nga wu, bia yiane la’ase minlañ miziñ mia fombô bia bese. Satan Diable a nga belane nyo na a mias beta minsos. Kalate Zambe a jô na: “Betite bese ya fé Yéhôva Zambe a nga té, nyo nje é nga dañe fek. Ane é nga jô minga na, ye Zambe a nga jô fo’o na, te diane bibuma ya bilé bise ya afup?”​—Metata’a 3:1.

Ane Ève a nga jô nye na: “Bi ne ngule ya di bibuma ya bilé ya afup: ve ébuma ya élé é ne zañ afup, Zambe a nga jô na, te diane je, nalé fe te nambane je, mi za wu.” Ane nyo é nga jô minga na: “Mi aye ke tu’a wu: amu Zambe a yeme na, môs mi aye di je, môs ôte mise menan m’aye kuiban, nalé mi aye bo ane Zambe, a yem mvaé a abé.” Satan a nga jô na Yéhôva a ne nlaa minsos a na, a nyume bebiaé bangan mam me ne mvaé.​—Metata’a 3:2-5.

Ève ve kôme kañese mejô mete. Ane a nga taté na a fombô élé éte ne toéññ, a yene na é ne abeñe ya yen a mis. Nde a nga kolé ébuma y’élé éte a taté ñhe fe na a di. Kalate Zambe a jô na: “Ane a nga ve fe je nnôme wé ba nye be nga to, nnye fe a nga di.”​—Metata’a 3:6.

Ngo’o abime mintaé Zambe a nga wôk éyoñ a nga yen ane bone bé a nye’e ba vañe bo nye melo! Jé a nga bo? A nga jô Adam na: “W’aye timane si été; amu ô nga nyoñebane si été; amu ô ne metek, w’aye timane fe metek.” (Metata’a 3:17-19) Amu nalé, “melu mese Adam a nga to me mbe mimbu mintet ébu a mewôm mela; ane a nga wu.” (Metata’a 5:5) Adam a nji ke yôp, nge k’ôsu a nyiñe vôm éziñ. A nji be a nyiñik ôsusua na Yéhôva a kôme nye a metek. Ajô te, éyoñ a nga wu, ényiñe jé é nga tebe, a nyule jé é nga su’ulane bo metek. A mbe a wuya fo’o. Aval éngôngole jam ete!

AMU JÉ BIA BIALÉ A NSEM?

Amu Adam ba Ève be nga vañe bo melo, be nga sub ényiñ é mbe te nsem a fane ya nyiñe nnôm éto. Nyule jap é nga taté na ja tyendé; ane be nga be’e nsem. Ve biyo’é bite bi nji nambe ve mbe étam. Be nga kôé fe mvoñe bôte jap nsem. Kalate Beromain 5:12 a jô na: “Ajô te, aval ane abé e nga zu si nyô amu môte wua, a awu e nga zu amu abé; a nalé awu e nga kui be bôte bese, amu bese be nga bo abé.”

Kalate Zambe a liti na nsem a awu bi ne ane “mfinga wo buti meyoñ me bôte mese.” (Ésaïe 25:7, Mfefé Nkôñelan) Mfinga ôte wo buti bone be bôt ane nsul ô nji bi biañ éziñ. Ôwé, “bese be awu be Adam.” (1 Becorinthien 15:22) Aval ane Paul, bi ne ñhe sili biabebien na: “Za a ye va ma nyôle ya awu di?” Ye môt éziñ a ne de bo?​—Beromain 7:24.