Aval avé ô ne bi mbamba ényiñ?

DEN, ényiñ é nji bo avale Zambe a mbe a yi atata’a. Si é mbe é yiane bo njalan a bôte ba kômbô tabe Éjôé Zambe si, ba ba tôñe miñye’elane mié a vu nye’ane wé a mefulu mé mefe. Be nga ye saé nsamba meva’a été nté ba yale menda me bôte map, be nga ye yé’é mimfefé mi mam a bo na si ése é bo paradis.

ZAMBE A KA’ALE NA ÉNYIÑE JA YE BO AVAL É MBE ATATA’A

• “A mane mewosan akekui susu’a ya si nyô.”​—Besam 46:9.

• “Éyoñ ya . . . jiane ba be ajiane si [ja zu].”​—Nlitan 11:18.

• “A môt a to été a ye bo te jô na, m’akon.”​—Ésaïe 33:24.

• “Bôte bam be ne mintoban b’aye jaé vak a ésaé ya mo map.”​—Ésaïe 65:22.

Aval avé minkulane mejô mite mia ye tôéban? Zambe a nga telé Mone wé Yésus, Njô ya éjôé ja ye jôé si se é tele yôb été. Kalate Zambe a loen éjôé éte na Éjôé Zambe. (Daniel 2:44) Kalate Zambe a kobô fe ajô Yésus a jô’ô na: “Zambe a ye ve nye éto njôan . . . , a ye jôô.”​—Luc 1:32, 33, Mfefé Nkôñelan.

Éyoñ a mbe si va, Yésus a nga bo mesimba asu na a liti na, éyoñ a ye bo Njôô, ényiñe ja ye bo angôndô ya abeñ.

YÉSUS A NGA LITI AVAL AVÉ A YE BO MBAMBA BE MAM ASU BONE BE BÔT

• A nga saé aval akon ése; nalé a nga liti na a ye mane akon ése.​—Matthieu 9:35.

• A nga bo na ôkôs ô tebe; nalé a nga liti na a ne ngule ya jôé bibubua bi mam mfa’a ya kamane bone be bôt.​—Marc 4:36-39.

• A nga ve betoyini be bôte bidi; nalé a nga liti na a ye jalé miñyiane mi bone be bôt.​—Marc 6:41-44.

• A nga bo na mendim me veñesane won abô’ô alu’u éziñ; nalé a nga liti na a ye bo na bone be bôt be wô’ô ényiñe mvaé.​—Jean 2:7-11.

Aval avé ô ne bi mbamba ényiñe Zambe a kômesan asu bôte ba nye’e nye? Wo yiane tôñe “zen” éziñ. Kalate Zambe a liti na zen éte é ne “zen . . . je ake vôm bôt be anyiñ, a bôt be ayene je be ne tyôtyoé.”​—Matthieu 7:14.

JEÑE’E ZENE JA VE ÉNYIÑ

Zene fé ja ve ényiñ? Zambe a jô na: “Me ne Yéhôva Zambe wôé, nyô a ye’ele wo ane w’aye yen mvolan, nyô a wulu wo zen w’ayiane ke.” (Ésaïe 48:17) Nge wo tôñe zene Zambe a liti wo, ényiñe jôé ja ye bo abeñ.

Yésus a nga jô na: “Ma me ne zen, me ne fe benya mejôô, a ényiñ.” (Jean 14:6) Bi ne subu Zambe bebé a bi mbamba ényiñ nge bia tôñe miñye’elane mi Yésus a vu nye.

Aval avé ô ne yene zene ja ve ényiñ? Miñyebe mi ne nya abui, ve Yésus a nga ve abendé di: “Sake môt ase a jô me na: A Nti, a Nti, a ye nyiin éjôé ya yôp, ve nyô a bo nkômban ésaa wom a ne yôp.” (Matthieu 7:21, Mfefé Nkôñelan) A nga jô fe na: “Mi aye yemelane be a bibuma biap.” (Matthieu 7:16) Kalate Zambe a ne volô wo na ô yemelane nya ñyebe a évuse ñyebe.​—Jean 17:17.

Aval avé ô ne taté na wo wulu zene ja ve ényiñ? Wo yiane jeñe na ô yé’é yeme Nyô a nga ve bia bese ényiñ: A ne za? Éyôlé jé é ne évé? A ne avale môt avé? Jé a bo asu dangan? Jé a yi na bi bo?a

Zambe a nji yi na ényiñe mona môt é su’u ve na a saé, a di, a vôman a na a yale nda bôt. Bi ne ngule ya yeme Nté wongan a bo bemvôé bé. Bia liti nye na bia nye’e nye éyoñe bia bo nkômbane wé. Yésus a nga jô na: “Ényiñ ya melu mese é ne na, be aye yeme wo, wo étam ô ne nya Zambe, be aye yeme fe nyô ô nga lôm, nnye a ne Yésus Krist.”​—Jean 17:3.

TATÉ’É NA WO WULU ZENE JA VE ÉNYIÑ

Éyoñe bia yeme jé Zambe a yi na bi bo, nalé a tindi bia na bi bo mintyendan. Jam ete e ne yené ayaé. Ve éyoñ bia kôme fas, bia yene na bia bu’ubane mbamba ényiñ éyoñe bia tôñe zene ja ve ényiñ. Asu na ô bi biyalane ya minsili a lat a Zambe, kañese’e yé’é Kalate Zambe e zezé a Bengaa be Yéhôva éyoñe wo yi a vôme wo yi. Ô ne fe ke anjeñe mefoé dangan www.pr418.com.