“Kelan, mi bo . . . beyé’é”

1-2. (a) Kalate Matthieu 28:18-20 a liti na ésaé évé akônda Bekristen da yiane telé ôsu? (b) Bia zu bi biyalane ya minsili mivé ayé’é di?

MINLÔMANE mi Yésus mi nga yiane wô’ô angônda mvaé ya sulane nkôle yôp. Vôm ate nnye Yésus a nga jô be mvuse ñwômane miñwuane wé na ba be nye ba ye tôban. (Mt. 28:16) Éko éziñe môs ôte fe wua wua ñwô “a nga yené be bobenyañ bé adañe mintet mitan.” (1 Bec. 15:6) Amu jé Yésus a nga bañete be? Asu na a ve be abendé di: “Kelan, mi bo [bôte ya] meyoñ mese beyé’é.”​—Lañe’e Matthieu 28:18-20.

² Beyé’é be nga wô’ô mejô me Yésus mete be nga su’ulane bo bibu’a ya akônda Bekristene ya ntete mimbu ôsu. Ésaé ôsu akônda éte é mbe é bili é mbe na é bo bôte beyé’é.b Den, si ése é bili mekônda betoyini mewôm, a ésaé mekônda mete ma telé ôsu é ne fe na me bo bôte beyé’é. Ayé’é di, bia zu bi biyalane ya minsili mi: Amu jé ésaé ya bo bôte beyé’é é ne nya mfii? Mam mevé me ne volô bia na bi bo je? Ye Bekristene bese be ne nyoñe ngab a ésaé éte? Amu jé da sili ôjibi asu na bi bo ésaé éte?

AMU JÉ ÉSAÉ YA BO BÔTE BEYÉ’É É NE NYA MFII?

3. Kalate Jean 14:6 a 17:3 a liti na amu jé é ne nya mfii ya bo bôt beyé’é?

³ Amu jé ésaé ya bo bôte beyé’é é ne nya mfii? Amu na, môt a ne bo mvôé Zambe vengevenge ve a taté bo ñyé’é Krist. Ane ô vaa nalé, môt a tôñ bibô’a mebo bi Yésus a bi abui meva’a den, a bi fe ndi nleme ya nyiñe nnôm éto melu ma zu. (Lañe’e Jean 14:6; 17:3.) Beta mbe’e fo’o nnye Yésus a nga ve bia le, ve bia bo ke ésaé éte étam. Paul a nga kobô señe ba beyé’é befe a jô’ô na: “Bi ne beébe bebo bisaé be Zambe.” (1 Bec. 3:9) Nga bia yene na Yéhôva ba Yésus be nga ve bebo mam abé ane bia angôndô ya beta mvom?

4. Nlañ Ivan ba Matilde wo ye’ele bia jé?

⁴ Ésaé ya bo beyé’é é ne soo bia angôndô ya abui mevak. Tame yene jam e nga kui Ivan ba minga wé Matilde ba nyiñe Colombie. Be nga kañete mone ndôman a too jôé na Davier, nde a nga jô be na: “Ma yi na me tyendé, ve jam ete da kate ma.” Davier a mbe a bo’o boxe, a vibane fe ta’a a bilam, a bili fe ébon é too jôé na Érika. Ivan a laane bia na: “Bi mbe bi kele’ bo nye ayé’é nlame wé, dulu ete e mbe e nyoñe’e bia abui éyoñ, bi mbe bi yiane wulu a beminsini, njoñe ki ô too angôndô ya abé. Éyoñ Érika a nga yen ane Davier a tyendé, nye fe a nga taté na a yé’é Bible.” Ôte’ete’ ôte’etek, Davier a nga telé boxe, nyuane banga, a nso’one bilam. Mvuse ya valé a nga late fe alu’u dé a Érika. Matilde a jô na: “Éyoñ bi nga yene Davier ba Érika be dubane mbu 2016, bi nga beta simesane mejô a nga jô bia môs ôsu bia be nye bi nga laan: ‘Ma yi na me tyendé, ve jam ete da kate ma.’ Ane mili’i me nga taté na ma lene bia mis.” Teke bisô na, éyoñ bia bo bôte beyé’é, jam ete da soo bia abui mevak.

MAM MEVÉ ME NE VOLÔ NA BI BO BÔTE BEYÉ’É?

5. Jam avé bia yiane taté bo asu na bi bo bôte beyé’é?

⁵ Jam ôsu bia yiane bo éyoñ bia kômbô bo beyé’é é ne na bi ‘jeñe bôte’ be bili mbamba été nlem. (Mt. 10:11) Bia liti na bi ne benya Bengaa be Yéhôva éyoñ bia kañete môt ase bia tôbane nye. Benya Bekristen ba tôñ abendé Yésus a nga ve be na be kañete mbamba foé.

6. Jé bi ne bo asu na ésaé nkañete jangan é tu’a wulu mvo’é?

⁶ Bôte béziñ ba kômbô fo’o yeme benya mejôô, ve abui ya be be e wô’ô bo ane da bisi ki bia éyoñ ôsu bia kañete be. Bia yiane jeñe na bi ve be ôzañe ya vô’ôlô bia. Asu na bi yeme bo ésaé nkañete, bia yiane taté kôme kômesan. Bia yiane kôme fase minlô mejô bôte ya abôta nkañete dangan ba dañe nye’e. Mvuse ya valé, bia yiane fe fase menyiine me nkobô bia ye belane me éyoñ bia ye laan a be.

7. Aval avé ô ne taté minlañ a môte nkañete, a amu jé e ne mfi na ô vô’ôlô a semé bôte wo laan a be?

⁷ Ô ne taté minlañ a môt ô jô’ô na: “Ye me ne sili wo mone nsili? Abui minju’u bia wo bia tôbane mie den mia nambe bôte ya si se. Ye wo simesane na éjôé éziñe ya émo ji é ne mane vaa minju’u mite nga?” Mvuse ya valé ô ne liti nye kalate Daniel 2:44. Ô ne fe belane menyiine me nkobô ma: “Éngôngol tame kate bia: Mfa’a wôé, jé é ne volô bia na bi yeme yale bone bangan?” Mvuse ya valé, lañe’e kalate Deutéronome 6:6, 7. Simesa’ane bôte wo ye kañete Mejô me Zambe éyoñ ése wo tobe nlô ajô. Simesa’ane mfi ba ye bi éyoñe ba ye yeme jôme Kalate Zambe a ye’ele. Éyoñe wo laan a be, é ne nya mfii na ô vô’ôlô be a na ô semé ôsimesane wop. Nalé é volô na ô tu’a yeme tebe été jap a na be’e fe be tu’a kômbô vô’ôlô wo.

8. Amu jé é ne mfi na bi bo mbane ya jome bôt?

⁸ Ôsusua na mia môt mi taté ayé’é Bible, e ne sili na ô taté jome nye biyoñe biyoñ. Amu jé? Amu e wô’ô kui abui biyoñ na, éyoñ bia beta zu jome môt, bi zu koone nye momo, nge ke na bi zu koone nye a yeme a abui bisaé. E ne fe sili na ô ja bo ndeñendeñ ôsusua na môt a mane yembane wo, a su’ulane yebe na mia nye mi yé’é Bible. Fo’o ve avale ane sam ja yaé éyoñ ba sôé je mendime mban, aval ete fe môte bia kañete a ne taté na a nye’e Yéhôva ba Yésus éyoñ bia bo bi kele’ jome nye mban.

YE BEKRISTENE BESE BE NE NYOÑE NGAB A  ÉSAÉ YA BO BEYÉ’É?

9-10. Amu jé bi ne jô na sa ke môte wua étam nnye a volô môte na a bo ñyé’é Yésus?

⁹ Kristen ése ja yiane jeñe bôte be bili mbamba été nsisim a lat a benya mejôô. Bi ne ve’e ésaé bia bo a éyoñ bia jeñe mongô a te jañ. Amu jé bia jô nalé? Bi tame laane mia jam e nga kui afôla éziñ. Étum mongô é bili mimbu milal é nga jañ, éyoñ ete bôte mintet mitan be nga taté na ba jeñe nye. Mvuse mewolo me nkolo mewôm mebaé, môt wua a nga ke koone nye afub éziñ. Môt a nga yene mongô a nga bene na be se’e ve nye étam. Amu jé? A nga jô na: “Bôte bese ba ba te saé asu na bi yene mongô ate.”

¹⁰ Den, abui bôt e ne ane mone mongô nyi. Be ne miñyem. Be nji bi ndi nlem éziñ ényiñ, ve ba yi mvolan. (Beép. 2:12) Bôt a lôte million mwom ba jeñ a ngul ése na be volô be. Éko éziñ womien ô ngenane teke tôbane môt a kômbô yé’é Kalate Zambe a wo. Ve bobejañ mia be be mia saé abôta nkañete da be yianeya tôban aval bôt ete. Ajô te, nkañete mbamba foé ase a vak éyoñe ñyé’é Bible a tyi’i na a kañe Yéhôva, to’o sa ke ba nye mbe ba yé’é.

11. To’o ô ngenane teke kaa ayé’é ya Bible a môt, aval avé ô ne su’u ésaé ya bo beyé’é?

¹¹ To’o womien ô ngenane teke kaa ayé’é ya Bible a môt, ô ne su’u ésaé ya bo beyé’é aval afe. Éyoñe wo yene mfefé asu Aba Éjôé, ô ne nyoñ avale môt ete a mevak a ôsesa. Éyoñ é yen avale nye’an ete, a ye tu’a yemelane na bia bi ne benya bebo bisaé be Yéhôva. (Jean 13:34, 35) Ô ne fe su’u ésaé éte a zene ya biyalane biôé bisulan; to’o ô nji kobô abui, nge éyalane jôé ja so nlem a nge mame wo jô ma liti na wo semé bôte bevok, nalé a ne ve bôte be ndeme taté na ba tabe ésulan mbamba éve’ela ya tôñ. Ô ne fe kui nkañete a mfefé nkañete mbamba foé, a volô nye na a yeme belane bifuse ya Bible éyoñ a laan a bôt. Éyoñe wo bo nalé, wo liti nye aval a ne vu Krist.​—Luc 10:25-28.

12. Ye da sili na bi bo susu’a mintyetyeñ asu na bi bo bôte beyé’é? Timi’in.

¹² Bi nji yiane buni na bia yiane bo avale fatan atyeñ éziñ asu na bi ye’e’le bôte mejô me Yésus. Amu jé? Bi tame nyoñ éve’ela Faustina a nyiñe Bolivie. Éyoñ ôsu a nga laan a Bengaa be Yéhôva a nji be a yeme lañe ve i. Ve nté ane a nga taté ayé’é azukui den, a nga bone te bo. A dubaneya, a a nye’e a ye’ele bôte Mejô me Zambe. Sondô ase a wulu meyé’é metan. Akusa fo’o bo na a nji yeme lañ ane bôte ba be nye ba yé’é Bible, Faustina a kuiya na a volô bôte besamane na be duban.​—Luc 10:21.

13. To’o bi yeme aya, bibotane bivé bi ne bi éyoñ bia jeñe na bi bo bôte beyé’é?

¹³ Abui Bekristen e yeme a mimbe’e ya nda bôt. Ve to’o nalé, ba sum éyoñe ya wulu meyé’é, a ésaé éte ja soo be abui mevak. Melanie a ne wua ya été. A mbe a nyiñi’i Alaska, teke nnôm, ajô te a mbe a yiane yale ngo jé é mbe é bili mimbu 8 étam étam. Ésaé jé é mbe é nyoñe’e nye abui éyoñ, a mbe fe a yiane nyoñ ngab a ésaa a mbe nkôkone cancer. A mbe fe étame Ngaa tisone jé. A nga bo a ye’elane Yéhôva na a ve nye ngule ya kui nkañete akusa bo avep, amu a mbe a kômbô’ô yene ve môte wua ba nye be ne yé’é Bible. Nde môs éziñ a nga tôbane Sara, minga ve zu wô’ô mvaé éyoñ a nga yeme na Zambe a bili ngum éyôlé. Ane a nga taté na a yé’é Bible. Mélanie a jô na: “Mimôs minkul éwônga miziñ, bia ngo jam bi mbe nya nte’ane, ve bi mbe bi tôme’e nyul na bi ke bo ayé’é éte, a jam ete e mbe e so’o bia abui mevak. Bi mbe bi nye’e bi jeñe’e biyalane ya minsili mi Sara, a bi nga wô’ô mvaé ya yen ane a su’ulane bo mvôé Yéhôva.” Sara a nga jibi étibela’a, a kôlô ñyebe wé, a su’ulane fe duban.

AMU JÉ DA SILI ÔJIBI ASU NA BI BO BÔTE BEYÉ’É?

14. (a) Amu jé ésaé nkañete é ne ane nyobane kos? (b) Mejô me Paul bia koone me 2 Timothée 4:1, 2 ma tindi wo na ô bo jé?

¹⁴ To’o wo yene ve ane ésaé nkañete jôé ja wume ki bibuma, te sili mo si. Yésus a nga ve’e ésaé ya bo bôte beyé’é a nyobane kos. E ne sili beyobe kos abui mewolo asu na be bi ve kose jia. E wô’ô kui na be ke minobe mite zañ alu nge ke ndibe tyé; beyobe kos béziñ ba yiane wulu bekilimita abui na be ke kui vôme ba yiane yop. (Luc 5:5) Aval ete da da, bekañete mbamba foé béziñ ba yiane lôt abui éyoñe na ba “yobe” bôt mevale mewolo mese, a bevôme mevale meval. Amu jé ba wu abime nju’u ôte? Asu na be bi fane ya yob abui bôt. Bôte ba kôme ve ngule nalé be wô’ô yen a mise mabe na ésaé ése é bili ma’an, amu be wô’ô su’ulane yene bôte ba wô’ô évé ya benya mejôô. Ye wo fe ô ne fo’o jeñe na ô kañete mewolo a bevôm ô ne koone bôte tyi’ibi?​—Lañe’e 2 Timothée 4:1, 2.

15. Amu jé da sili ôjibi asu na bi ye’ele bôte Mejô me Zambe?

¹⁵ Amu jé da sili na bi bo ôjibi éyoñe bia ye’ele môte Mejô me Zambe? Amu na ésaé éte é nji sili ve na bi ye’ele môte na a bi ñyeman a na a nye’e mam a yé’é Bible. Bia yiane fe volô nye na a nye’e Yéhôva, Môt émien a ne mbôndé ya Bible. Ane ô vaa na bia yiane ye’ele môte jé Yésus a yi na a bo, bia yiane fe liti nye avale nya Kristen a yiane nyiñ. Bia yiane bi nye wo ôte’ete’ ôte’etek, nté a bibane na a bo mam a yé’é Bible. Asu bôte béziñ, da sili ve bone bengon asu na be tyendé, ve asu bôte bevok, jam ete e ne sili abui éyoñ.

16. Nkañete Raoul wo ye’ele wo jé?

¹⁶ Missionnaire éziñe ya Pérou a nga kôme yene mfi ya bo ôjibi. Missionnaire ate a jô na: “Bia Raoul bi nga yé’é bekalate bebaé. Ve a mbe a bili aka’a abui minju’ ényiñ. Nda alu’u jé é mbe éyoñ ése ve zô’é, émien a nye’e a belane mvite minkobô, bone te ke semene nye. Ve a mbe mbane bisulan, ajô te me nga ke ôsu a jome nye, a jeñe na me volô ba nda bôte jé. Mvuse mimbu milal, a nga su’ulane duban.”

17. Jé bia ye yen ayé’é da zu?

¹⁷ Yésus a nga jô na “kelan, mi bo meyoñe mese beyé’é.” Éyoñ bia bo ésaé éte, bi wô’ô tôbane bôte be nji yene mam ane bia, ba bevo’o be ne teke ñyebe, a ba buni buni na Zambe a nji bo. Ayé’é da zu, bia ye yen avale bi ne kañete mevale me bôte mete mese.