Yéhôva a kômbô volô wo na ô bo jé?

1. Jé Yéhôva a ne ngule ya bo asu na a tôé nsoñane wé?

YÉHÔVA a ne ngule ya bo mam mese asu na a tôé nkômbane wé. E nga sili biyoñ biziñe na a bo Ñye’ele, Mvolô minlem, Nkañete mbamba foé, nge bi ne lañe ve abim ete. (És. 48:17; 2 Bec. 7:6; Beg. 3:8) A nga belane fe bone be bôt asu na a tôé minsôñane mié. (Mt. 24:14; 28:19, 20; 2 Bec. 1:3, 4) Yéhôva a ne fe ve mbo ésaé wé fek a ngule ya bo jam ese da sili asu na a tôé nkômbane wé. Abui beyeme mam e ne tyiñe na mam mese bi ndôme jô le ma lu’an a atinane ya éyôlé Yéhôva.

2. (a) Jé é ne bo na môt a buni na a volô ki Yéhôva jôm? (b) Jé ayé’é di da zu ye’ele bia?

² Bia bese bia yi na Yéhôva a belane bia, ve bobejañe béziñe be ne buni na be nji volô nye jôm. Amu jé? Amu be lôô éko éziñ na be yômbôya, nge amu mam méziñ me nga kui be ényiñ, nge ke amu ba buni na be nji bi ñyeman. Bevo’o ki be lôô na ba saé abime da yian, nde be nji beta yene mfi ya nene ésaé jap. Ayé’é di bia zu yen avale Yéhôva a ne volô môt ase ya be bia na a tôé nkômbane wé. Bia zu fe yene minkañete miziñ ya Kalate Zambe mia liti avale Yéhôva a nga ve bebo bisaé bé, befam a binga, nkômban a ngule ya bo nye ésaé. Bia ye su’ulane yen avale bi ne jô’é na Yéhôva a belane bia.

MEZENE YÉHÔVA A BELANE ME

3. Bephilippien 2:13 a liti na Yéhôva a ne ve bia nkômbane ya jalé nsôñane wé aval avé?

³ Lañe’e Bephilippien 2:13.b Yéhôva a ne ve bia nkômbane ya bo nye ésaé. A bo de aya? Bi ne wô’ô na mojañ éziñ a bili njuk, nge ke na mam méziñe ma jemban akônda dangan. Wofise ya Béthel ô ne fe lôme mekônda kalate a liti’i mfi ya ke su’u ésaé vôme mfe. Bi ne ñhe sili biabebien avale biyoñ ete na: ‘Jé me ne bo asu na ma fe me volô?’ E ne fe kui na ba ve bia mbe’e ô ne ôbe ayaé, éyoñ éte bia sili biabebien nge bi ne ngule ya be’e mbe’e ôte. Nge ke na, éyoñ bi maneya lañ éfus éziñe ya Kalate Zambe, bi ne sili biabebiene na: ‘Aval avé me ne belane mam me ndeme mane yé’é ma asu na me volô bôte bevok?’ Yéhôva a vo’o yemete bia na bi bo jam éziñ. Ve éyoñ a yene na nleme wongan été, bia jeñe mezene ya bo mam ane a yi, a ne volô bia na bi bi nkômban a ngule ya tôé nsôñan ôte.

4. Aval avé Yéhôva a ne ve bia ngule ya bo aval a yi?

⁴ Yéhôva a ne fe ve bia ngule ya bo mam ane a yi. (És. 40:29) A bo de aval avé? A ne yañele bia a ngule ya mbamba nsisime wé asu na bi tu’a yeme belan atyeñe mboane mame dangan. (Nk. 35:30-35) A zene ya ékôane jé, Yéhôva a ye’ele bia avale bi ne yeme bo mam méziñ. Nge wo ko woñ ya be’e mbe’e éziñ, sili’i mvolan. Sili’i fe Ésaa wongane ya mvam ngule jé “é ne te ave’an.” (2 Bec. 4:7, Mfefé Nkôñelan; Luc 11:13) Kalate Zambe a ne njalan a minkañete mi binga a befam Yéhôva a nga ve mam mese me nga sili na be bi nkômban a ngule ya bo aval a yi. Nté bia zu yé’é minkañete mite, tame ve’ele fas avale wo fe ô ne jô’é na Yéhôva a belane wo aval a nga bo a bôte bete.

AVAL A NGA VOLÔ BEFAM BÉZIÑ

5. Jé bia yé’é éyoñ bia yen aval avé Yéhôva a nga belane Moïse, a éyoñ ése é nga lôt ôsusua na a belane nye?

⁵ Yéhôva a nga bo na Moïse a bo nkôté asu bon b’Israël be mbe minkôm. Ve a nga tyi’i na a bo de éyoñ évé? Ye éyoñe Moïse a mbe a buni’i émien amu a nga mane yé’é “mam mese bôte ya Égypte be nga yem”? (Mam. 7:22-25) Momo, Yéhôva a nga taté na a belane nye valé a tatéya ye’ele nye éjote nyul a évôvoé nlem. (Mam. 7:30, 34-36) Yéhôva a nga volô fe Moïse na a bo ayo’o nlem, ndemben a bo ngule ya ke kobô beta Njôô bôte ya Égypte. (Nk. 9:13-19) Jé bia yé’é éyoñ bia yen aval avé Yéhôva a nga belane Moïse, a éyoñ ése é nga lôt ôsusua na a belane nye? Bia yé’é na Yéhôva a belane bôte ba jeñe na be vu mefulu mé a ba ba ja’é nye ngule jé.​—Beph. 4:13.

6. Jé nkañete Barzillaï wo ye’ele bia?

⁶ Mvuse mintete mimbu, Yéhôva a nga beta belane Barzillaï asu na a volô mbo ésaé wé David. Éyoñ David a mbe a tubu’u Absalom, ba be bôte bé ve zu ‘wô’ô zaé a évé, a bili atek.’ Barzillaï a bôte befe be nga fam awu asu na be volô be. Barzillaï a nji buni na mbôl a ntoo nnôm abui, a vo’o beta bo mfi asu Yéhôva. Ve a nga belane biôm a mbe a bili asu na a su’u mbo ésaé Yéhôva. (2 Sa. 17:27-29) Jé nkañete Barzillaï wo ye’ele bia? To’o bi nto benya bôtô, Yéhôva a ne belane bia na bi su’u bobejañe ya akônda dangan nge ke ba ya vôme mfe be tele mbia été. (Min. 3:27, 28; 19:17) To’o biabebiene bi vo’o ke ve bobejañe bete jôme mo, bi ne ngule ya su’u be éyoñ bia bo mimvean Aba Éjôé.​—2 Bec. 8:14, 15; 9:11.

7. Aval avé Yéhôva a nga belane Siméon, a aval avé jam ete e ne ve bia ngule nyul?

⁷ Siméon, éwôlô mbo ésaé Yéhôva ya Jérusalem, a mbe a nto nnôm éyoñe Yéhôva a nga ka’ale nye na a ye yene Messie ôsusua na a wu. Ngaka’a éte é nga yiane ve Siméon ngule nyul mimbu mise a nga yange Messie. Yéhôva a nga botane mbunane wé a ôjibi wé. Môs éziñ mbamba nsisim a nga tindi nye na a zu Temple. Za a nga koone nye wôé? Yésus a too étume mon, ane Yéhôva a nga ve Siméon beta mvome ya kate bôte na étume mon éte nje ja ye bo Messie. (Luc 2:25-35) Akusa bo na Siméon a nga wu ôsusua na Yésus a taté ésaé nkañete jé, a nga wô’ô mvaé amu Yéhôva a nga belane nye aval ete, abui bibotan é ngenane fe é yange’e nye. Mfefé émo, éwôlô mbo ésaé Yéhôva éte ja ye yen ane éjôé Yésus ja ye soo menda me bôte mese ya si abui bibotan. (Met. 22:18) Bia fe bia yiane wô’ô ésaé ése Yéhôva a ve bia mvaé.

8. Aval avé Yéhôva a ne belane bia aval a nga belane Barnabas?

⁸ Joseph, ésôse môte ya ntete mimbu ôsu É.J, a nga kañese na Yéhôva a belane nye. (Mam. 4:36, 37) Minlômane mi nga jibi yôlé nye na Barnabas (‘Môte ya mvolan minlem’). Be nga yiane nye ve jôé éte amu a mbe mbamba nlem, a nye’e fe a va’a bôte ngule nyul. Nge mi ngenane mi simesan, éyoñe Saul a nga bo Kristen, abui bobejañ é nga tyetebe nye amu a nga tibili Bekristen angôndô. Ve Barnabas nye a nga ke volô nye, a jam ete e nga yiane nambe Paul abui. (Mam. 9:21, 26-28) Mvuse ya valé bemvendé ya Jérusalem be nga yene na bobejañe ya Antioche ba yiane na be ke ve be ngule nyul. Nde za be nga lôm? Barnabas. Barnabas fo’o nnye be nga yiane lôme wôé. Bible a jô na ‘a nga tu’a lebe be bese na be lat a Tate a minleme miabe mise.’ (Mam. 11:22-24) Dene fe, Yéhôva a ne volô wo na ô bo ‘môte ya mvolan minlem’ asu bobenyoñ. A ne belane wo na ô ke volô môt a te bi awu nlem. Éyoñ mojañ éziñ a bili atek nge ke éyoñ a kon, Yéhôva a ne belane wo na ô loone nye téléphone, nge ke na ô ke jome nye a ve nye ngule nyul a mbamba bifia. Ye wo ye fo’o vu Barnabas a jô’é na Yéhôva a belane wo aval ete nga?​—1 Bet. 5:14.

9. Jé nkañete Vasily wo ye’ele bia?

⁹ Yéhôva a nga volô mojañe Vasily na a bo éwôlô mvendé. Vasily a mbe a bili mimbu 26 éyoñ a nga tebe mvendé; a nga koo mbe’e ôte woñ amu a mbe a simesa’ane na a vo’o yeme volô bobejañ, e dañedañ ba ba tôbane minjuk. Ve bitôtôlô bemvendé bivo’o bi nga volô nye, sikôlô bemvendé a bediakon a nga yañele fe nye nya abuii. Vasily a nga saé a ngul ése na a bo mbamba mvendé. A nga kôme nyoñ afep a nkôs, a mane tili bone minsôñane mise a kômbô tôé. Nté a mbe a kele’ a tôé mone nsôñan ase ya été, nne fe a mbe a dañe woñe wé nalé. A jô na: “Mbe’e me mbe me mate’e wo soo ma abui meva’a den. Éyoñ ése Yéhôva a volô ma na me yen éfuse ya Kalate Zambe é ne ve mojañe ngule nyul, ma bi abui mevak.” A befam, nge mia vu Vasily a jô’é na Yéhôva a belane mia, mia ye yen ane a ye yañele mia na mi be’e beta mimbe’e akônda.

AVAL A NGA VOLÔ BINGA BÉZIÑ

10. Jé Abigaïl a nga bo, a jam ete da ye’ele bia jé?

¹⁰ David ba be bôte bé be mbe be yii’ mvolan amu be mbe be tubu’u Njôô bôte Saül. Ane be nga ja’é Nabal, nkukume môte ya Israël, mone jôme ya di. Be mbe be buni’i na mbôle be nga mvamane biyem bi Nabal nkôte si, nye fe a ye wô’ô be éngôngo. Ve mfôfome môte ba jôô wô wu ô nga bene volô be. David ve zu wô’ô ajô sañ, ane a nga tyi’i na a zu wôé Nabal a jôm ése e ne fame nda jé. (1 Sa. 25:3-13, 22) Ve Nabal a mbe a bili mfefek a étua abeñe minga, Abigaïl. Minga ate a nga bi ayo’o nleme ya ke de’ele David mo asu na a bo teke kuli metyi. A nga lebe David a ésemé ése na a jô’é na Yéhôva émien a kune nye. Jam ete e nga nambe David angôndô. A nga yemelane na Yéhôva nnye a nga lôm Abigaïl. (1 Sa. 25:23-28, 32-34) Mbamba mefulu me Abigaïl me nga tindi Yéhôva na a belane nye. Dene fe, éyoñe Yéhôva a yene na sita a bili mbamba mefulu ane fek a atyeñe meyen, a belane nye na a su’u nda bôte jé a bobejañe befe ya akônda.​—Min. 24:3; Tite 2:3-5.

11. Jé bengo be Schallum be nga bo, beza ba vu be den?

¹¹ Mintete mimbu mvus, Yéhôva a nga belane bengo be Schallum asu na be lôñe mimfine ya Jérusalem. (Néh. 2:20; 3:12) Akusa bo be mbe bendaé be njôô bôt, bengo be Schallum be nga kañese na ba nyoñe ngab a aval ayaé ésaé éte. (Néh. 4:15-18) Be nga liti na ba selan a mimfañe mi bôte ya Tekoa, mbe bete be nga bene sulu bebiene si, a bo ésaé. (Néh. 3:5) Bi vo’o yem abim mevak bengo be Schallum be nga wôk éyoñ be nga kôme yen ane ésaé éte ja mane mvuse mimôse 52. (Néh. 6:15) Melu ma fe, abui besita da wô’ô mvaé ya su’u bisaé melôñe bia boban ékôane Yéhôva. Mintyetyeñ, biwôlô a bitôtôlô bi binga bite bia bo Yéhôva ésaé ngum aval, a be ne angôndô ya mfi asu ésaé éte.

12. Aval avé Yéhôva a ne belane bia aval a nga belane Tabitha?

¹² Yéhôva a nga volô Tabitha na a bo abui “mame ya mvam a éngôngol,” e dañedañ asu minkuse mi binga. (Mam. 9:36) Fulu mvame jé éte é nga bo na bôte be yône nye abui éyoñ a nga wu. Ve éyoñ Pierre a nga wômôlô nye, bôte bete be nga ye viane beta mane wu a mevak. (Mam. 9:39-41) Jé nkañete Tabitha wo ye’ele bia? To’o bi ne ésoé nge nya môtô, minga nge fam, bia bese bi ne bo mam me ne volô bobejañ.​—Beh. 13:16.

13. Aval avé Yéhôva a nga belane Ruth, a jé sita ate a nga jô?

¹³ Ruth a mbe awusonô, ve a kômbô’ô bo missionnaire. Éyoñ a mbe ésoé, a mbe a nye’e a kabe betract menda menda. A jô na: “Me mbe me nye’e ésaé éte mbia jam.” Ve e mbe nya ayaé na a kôme taté minlañ a môt éyoñ a nee nkañete. Ve to’o nalé, éyoñ a nga bi mimbu 18, a nga nyoñ ésaé nkpwa’a mefan ya éyoñ ése. Mbu 1946, a nga ke sikôlô ya Galaad, ane be nga lôme nye Hawaï e Japon. Yéhôva a nga belane sita ate étua ya abui wôé. Ruth a kañete benya mejôô den a nto mimbu bebé 80, a jô na: “ Yéhôva a nga su’u ma angôndô. A nga volô ma na me dañe fulu awusonô. Me too ndi na Yéhôva a ne ngule ya belane môt ase a futi ndi nleme jé be nye.”

KAÑESE’E NA YÉHÔVA A BELANE WO

14. Becolossien 1:29 a liti na bia yiane bo jé asu na Yéhôva a belane bia?

¹⁴ Yéhôva a jaéya zu a belane bebo bisaé bé mevale meva. Yéhôva a ye volô wo na ô bo jé? Womien ô bili éyalane ya nsili ôte. (Lañe’e Becolossien 1:29) Nge Yéhôva a yene na wo yi na a belane wo, a ne volô wo na ô bo beta nkañete mbamba foé, atyeñe ñye’ele, mbamba mvolô minlem, éwôlô mbo ésaé, nya mvôé, a mam mese mevo’o me ne mfi asu na a tôé nsôñane wé.

15. Kalate 1 Timothée 4:12, 15 a liti na bisoé bia yiane ye’elane Yéhôva asu jé?

¹⁵ A bisoé, ye mia yeme fo’o na ékôane Yéhôva ja yi befam be ne ngule minsône na be bo bediakon a bemvendé? Abui mekônda, tañe bemvendé ja lôte tañe bediakon. Ajô te a bisoé, jeñané na mi be’e mimbe’e akônda. Bi wô’ô wô’ô bobejañe béziñ be jô’ô na: “Ma kañete ngon ése, abim ete da yian.” Nge nne wo fase nalé, kôme’e ye’elane Yéhôva na a ve wo nkômbane ya bo diakon, a na a ve wo ngule ya bo ésaé avale da sili. (Éc. 12:1) Éngôngol a bisoé, bia yi mia!​—Lañe’e 1 Timothée 4:12, 15.

16. Jé bia yiane sili Yéhôva, a amu jé?

¹⁶ Yéhôva a ne ngule ya volô wo na ô bo jam ese a yi asu na a tôé nkômbane wé. Ajô te sili’i nye nkômban a ngule ya bo nye ésaé. To’o ô ne ésoé nge ke nya môtô, bela’ane ngule jôé, éyoñe jôé, a atyeñ mboane mame dôé, akume dôé, akeke, asu na ô su’u ésaé Yéhôva. (Éc. 9:10) Nge ba ve wo fane ya nene ésaé jôé ékôane Yéhôva, te vañe bene fo’o ve amu wo simesane na mbe’e ôte ô ne ayaé. Ngo’o abime beta ma’a te na bia fe bi ne ngule ya ve Yéhôva duma da yiane nye!