Ye wo too ô yemek?

Ésaé évé mba’ale ya melu mvus a mbe a bo’ok?

MBA’ALE ya melu mvus a mbe a nyoñe’e ngab a nda, nge ke a akume môte mfe. Bifia ya nkobô Hébreu a nkobô Grek be nga kôñelane Bebible bia belane be na “mba’ale,” nge ke na “mba’ale akum” bi ne fe tinane na ntebele nda.

Éyoñe Joseph, mone Jacob a mbe ôlo si ya Égypte, masa wé a nga telé nye mba’ale ya nda jé. Bible a kôme yemete na ‘a nga ve Joseph biôm bise a nga bili na a ba’ale bie.’ (Met. 39:2-6) Mvuse ya valé, éyoñe Joseph émien a nga bo beta môte si ya Égypte, nye’e fe a nga telé ngume môte na ô ba’ale akume dé.​—Met. 44:4, Mfefé Nkôñelan.

Melu me Yésus, bôte be mbe be nyiñi’i ôyab a mefube map. Jôm ete nje be mbe be telé’é beba’ale na be wulu ésaé ya mefube mete.

Za a mbe ngule ya bo mba’ale melu mvus? Columella, ntili bekalate éziñe ya ntete mimbu ôsu a nga jô na, asu na mbo ésaé a bo mba’ale, “a mbe a yiane kôme yem ésaé.” A nji be a yiane bo avale môt da nye’e éjôé ékôndé ékôp, “a mbe a yiane véé mise na ésaé é boban, ve teke tibili bebo bisaé bevok.” A nga jô fe na: “Jam masa a mbe a dañe yi é mbe na, mba’ale a bo môt a nye’e a yé’é mimfefé mi mam, sa ke nyi a buni na a yeme jôm ése.”

Kalate Zambe a ve’ ésaé mba’ale ya melu mvus a ji ja boban akônda Bekristen. Bi ne wô’ô amu jé Paul a jô Bekristene na, nge ba belan atyeñe mboane mame dap asu mvaé bôte bevok, ba ye bo “mbamba beba’ale ya mevale me mvam abui ya Zambe.”​—1 P. 4:10.

Yésus a nga belane fe éve’ela mba’ale kalate Luc 16:1-8. To’o éyoñ a nga kobô ajô ndeme ya nzuane wé ane Njôô, Yésus a nga ka’ale beyé’é bé na a ye telé ‘ôlo ô ne mewôk a fek,’ nge ke “mbamba mba’ale.” (Mt. 24:45-47; Luc 12:42, Mfefé Nkôñelan) Mba’ale ate nnye a ye ve Bekristene bidi ya nsisim melu ya asu’ulan. (Mt. 24:45-47; Luc 12:42) Bia ve Yéhôva akiba asu bekalate bese mbamba mba’ale ate a kuli asu bebo bisaé Bé ya si se.