ÉNYIÑE BEKRISTEN
Ensemané metiñe me Yéhôva a lat a ntaban
Yéhôva Zambe a nga mane ve môta binam metiñ mfa’a ya ntaban. Éve’an e ne na, a nga mane jô na aluk zañe fam ba minga da yiane ke tyamé. (Mt 19:4-6, 9) A tyili aval mbia nkeane binoñ ese. (1Bec 6:9, 10) A ve fe miñye’elane mia fombô mbot a mboane nyanga mia bo na, bebo bisaé bé be bo te funan bôte bevo’o bese.—Dt 22:5; 1Tim 2:9, 10.
Melu ma, abui bôt da bene tôñe metiñe me Yéhôva. (Bero 1:18-32) Ba jô’é na asimesane bôte befe é liti be avale mimbôt ba yiane jaé, avale nyanga ba yiane bo, a aval ényiñe ba yiane nyiñ. Ba bevok ba bo mbia be mam éngengeñ, a ba ve bôte bese be nji kômbô nyiñ ane be bijô.—1P 4:3, 4.
Amu bi ne Bengaa be Yéhôva, bi nji yiane ko woñ ya tôñe metiñ me Zambe a lat a ntaban. (Bero 12:9) Aval avé bi ne bo de? Bia yiane liti bôt a évôvoé ése jé Yéhôva a kañese. Ve bia yiane fe liti ényiñe jangan biabebiene na, bia tôñe metiñe mete. Éve’an é ne na, éyoñe bia tobe jôme bia ye jaé, nge nyanga bia zu bo, bia yiane sili biabebiene na: ‘Ye mbote wom wo liti na ma tôñe metiñe me Zambe, nge na ma tôñe nsisime y’émo? Ye ma liti na me ne fo’o Kristen a ko Zambe woñ?’ Jam afe é ne na, éyoñe ma tobe film éziñ, nge mvôman éziñ, ma yiane sili mamiene na: ‘Ye Yéhôva a kañese fo’o aval mvômane di? Nsisim ôvé wo wumulu? Ye mintobane ma bo mfa’a ya mimvôman mia bo na mbunane wom ô tek? (Bs 101:3) Ye mvôman ôte ô ne bo ékolé ôbak asu nda bôte jam a asu bôte befe?’—1Bec 10:31-33.
Amu jé é ne mfi na bi semé metiñe me Yéhôva a lat a ntaban? Yésus Krist a mbeme zu jiane meyoñ a mbia be mam mese ba bo. (Éz 9:4-7) Fo’o ve bôte ba bo nkômbane Yéhôva mbe ba ye nyiñ. (1Jn 2:15-17) Enkamané metiñe me Yéhôva, nalé a ye volô na, bôte be lôô mbamba ntabane wongan, be ve Yéhôva duma.—1P 2:11, 12.
Mbote wom a kane nyanga ma bo, mia liti na ma yene metiñe me Zambe a lat a ntaban aya?
YENE VIDÉO BO’O MVÔÉ YÉHÔVA—FAM BA MINGA, MVUSE YA VALÉ SILI’I MINSILI MI:
Amu jé é ne mfi na bi nyiñ aval metiñe me Yéhôva ma jô?
Amu jé bebiaé ba yiane ji’a taté na ba ye’ele bone bap metiñe me Yéhôva a lat a ntaban?
Aval avé bongô a benya bôtô be ne volô bôte na, be bu’uban mbamba nleme Zambe?