Beta ôbane nkañete asu na bi kobô ajô ya Éjôé Zambe

Yésus a nga kobô ajô, “mbamba foé ya Éjôé Zambe.” (Lc 4:43) A nga jô fe bôte na be ye’elan asu Éjôé éte. (Mt 6:9, 10) Ngon awôm a jia, bia ye ve ngule ya miase foé ya Éjôé éte. (Mt 24:14) Bo’o nta’ane mam asu na ô kôme kañete éyoñ ôbane nkañete ôte wo ye boban. Ngon éte, ba bese ba ye kômbô bo ésaé nkpwa’a mefane ya étun éyoñ be ne tobe na ba ve mewolo 30 nge ke 50.

Va’a ngule ya lañe bôt bifuse ya Kalate Zambe bi tii a Éjôé Zambe éyoñ ése wo ye bi fane ya bo de. Éyoñ wo ye top éfus, jeñe’e na ô yeme ñyebe môt wo ye lañ éfus éte a né. Éyoñe môt éziñ a ye nye’e nkañete wôé éyoñ ôsu wo ye kañete nye, ô va’a nye Nkume mmombô a bete No. 2 ya mbu 2020. Ô jeñe’e fe na ô ji’a zu jome nye a taté ayé’é ya Bible a zene ya kalate wua ya bekalate bia ye’ele be bôt. Éyoñ é nto étun, Éjôé Zambe é mbeme zu mane jiane bijôé bise bia sengane je. (Dn 2:44; 1Bec 15:24, 25) Ôsusua na jam ete da boban, ngo’o nge bia ye kôme yene mfi ya nyoñe ngap a ôbane nkañete ôte mfa’a ya liti na bi ne ngame Yéhôva a Éjôé jé!