Ye ô nto fo’o nkômesan asu Mesimesa’ane?

Pâque Yésus a nga kandane lôt a beyé’é bé a mbe étua mfi. Mbôle a mbe a nga zu wu, a nga ta’a na nné ane a mane di pâque a minlômane mié, a zu telé mfefé jam bé bo be bo’o mbu ôse: Tawôla Tate. Ajô te, a nga lôme Pierre ba Jean na be ke kôme vôme bé di pâque ate. (Lc 22:7-13; fombô’ô fôtô ya ékô’ôla.) Jam ete da liti bia mfi ya kômesan asu Mesimesa’ane é bobane mbu wu, Ngone lale é too melu 27. Bemvendé be yianeya mane tak môt é bo nkañete, avale bé kômesane won a belet, a mam mefe. Ve jé môt ase ya be bia a yiane bo nté bia yange Mesimesa’ane?

Kômesa’ane nleme wôé. Lañe’ a bindi nlañane Bible ya Mesimesa’ane. Ô ne koone wô nsoé kalate ô ne na Emfasané éfuse ya môs. Appendice B12 ya Traduction du monde nouveau a bili fe angôndô ya mbamba nta’ane mam a ne volô wo éyoñe ya Mesimesa’ane. (Lañe’e fe Kalate bisulan ya Ngone nyini ya mbu 2020.) Menda me bôt me ne fe koone minlô mejô mi ne volô be asu ayé’é ya nda bôt éyoñe ya Mesimesa’ane Index nge ke Ékpwelé asu ayé’é Bengaa be Yéhôva.

Bañete’e bôte bevok. Kôme’e nyoñe ngab ôbane nkañete. Simesa’ane bôt ô ne bañete aval ane bôte wo jom, bôte mia be be mi mbe mi yé’é Bible, bôte befe wo yem a bivuvumane biôé. Bemvendé ba yiane jeñe na be bañete bôte bese be voéya nsisim. To’o môte wo bañete a nji nyiñe bebé a vôm ô too, ô ne yem awolo a vôme Mesimesa’ane é boban tisone môt ate a nyiñ. Kele’ anjeñe mefoé dangan jw.org, nambe’e vôm a ne na BI NE BEZA?, fiti’i mone nlô ajô a ne na “Mesimesa’ane.”

Jé éfe bi ne bo asu na bi kômesan Mesimesa’ane?