Ôbane nkañete asu na bi taté meyé’é Ngon ébulu

Ngon ébulu, bia ye ve ngul ése na bi taté meyé’é a bôte bese bia ye tôbane be; bia ye belane nsoé kalate Bu’uban ényiñ nnôm éto! Nkañete mbamba foé ase a ne nyoñ ésaé nkpwa’a mefan asu étun éyoñ, a ve mewolo 30. Aval avé bi ne nyoñe ngab a ôbane nkañete ôte?

• Éyoñ ôsu wo nkañete môt: Bela’an afep da su’ulane nsoé kalate asu na ô ve môt mia nye mia laan éva’a ya vô’ôlô wo, a jeñe na ô liti nye aval ayé’é da boban. Wo yiane fe de bo a bôt be tatéya liti na ba nye’e Mejô me Zambe, te vuan minjomane miôé. Ja’a bôte be nga taté ben ayé’é melu mvus be ne nye’e fatan meyé’é bia bo éyoñe ji a nsoé kalate bia belane wô. Nge môt a nji liti na a nye’e Mejô me Zambe, bi nji yiane ve nye nsoé kalate, nge lôme nye wô abam kalate été. Émo’o bemvendé asu bisaé é ne yen aval be ne kô’ôlan bisulan bi nkañete ngon éte.

• Mam mefe bi ne bo: Nge akônda dôé da belane meta’a bekalate, kôme’e futi nsoé kalate Bu’uban ényiñ nnôm éto! été. Kate’e bôt ba yi nsoé kalate ôte na, bia ve wô ba ba kômbô yé’é Bible zezé. Nté mia laan, liti’i be aval ayé’é da boban, nge ke na mi ne top môs ôfe mi ne taté ayé’é. Mvendé ja tebele ésaé nkañete é ne jô bobejañ a besita be ne nya atyeñe na be ke bewofis ya abeñ nkañete; a kate bôte na bia bo bôte meyé’é zezé. Ô ne fe de bo a bôte ya nda bisaé jôé, nge ke ba wo tôbane be atemetem.

Yésus a nga ve bia abendé na bi “bo [bôte ya] meyoñe mese beyé’é,” a “ye’ele be.” (Mt 28:19, 20) Ngo’o nge ôbane nkañete wu ô ne volô bia na bi tôé nsôñan ôte, a zene ya nsoé kalate Bu’uban ényiñ nnôm éto!