Nye’ane môt a nye’e Yéhôva wo yiane tindi nye na a duban

1-2. Kalate Mam. 8:27-31, 35-38 a liti na jé é nga tindi mia’a ya Éthiopie na ô nyoñe ntyi’ane ya duban?

YE WO kômbô duban a bo ñyé’é Yésus? Nye’an a fulu mvean akéva bi nga volô abui bôte na e nyoñe ntyi’an ôte. Bi tame bulane melu mvus a kobô ajô mbo ésaé njôô bôte minga ya Éthiopie, môt ate a mbe miak.

² Éyoñ mon Éthiopien ate a nga mane yé’é Mejô me Zambe, a nga nyoñe ntyi’an été été. (Lañe’e Mam. 8:27-31, 35-38.) Jé é nga tindi nye? Da kôme yené na a mbe a nye’e Mejô me Zambe amu a mbe a kele’ a lañe bifuse biziñe ya kalate Ésaïe zene zen, a bete chariot wé a so’o Jérusalem. Éyoñe ki Philippe a nga laan a nye, nlem môt ate ô nga jaé a mvean akéva amu mam mese Yésus a nga bo asu dé. Ve jé é nga kee nye Jérusalem? A nga ke wôé amu a mbe a tatéya na a nye’e Yéhôva. Jé ja kate bia nalé? Amu a mbe a kele’e kañe Yéhôva Jérusalem. Bi ne simesane na a nga jô’é ñyebe bebiaé bé na a kañe Yéhôva a ayoñ Israël, ayoñe Yéhôva a nga tobe si va na e bo nye ésaé. Nye’an ôte ñwô fe ô nga tindi nye na a nyoñe ntyi’ane ya duban a bo ñyé’é Yésus.​—Mt. 28:19.

3. Jé é ne bo na bôte béziñe be yen ayaé ya duban? (Fombô’ô nka’ale ô ne nlô ajô na: “Ô ne avale si avé?”)

³ Nye’ane wo nye’e Yéhôva ô ne tindi wo na ô nyoñe ntyi’ane ya duban. Ve fulu nye’an éte jia jia é ne fe kamane wo na ô baptizôban. Amu jé bia jô nalé? Tame yene bone bive’ane bi. Nge wo nye’e bivuvumane biôé bi nji bo Bengaa be Yéhôva abui, ô ne ko woñe ya duban, amu wo mate na bi vini wo. (Mt. 10:37) Nge ke na wo nye’e mam méziñe Zambe a vini, a wo yen ayaé ya kandane me. (Bs. 97:10) É ne fe bo na aso mongô, wo tôñe metum méziñe ya évuse ñyebe. Éko éziñ ô ngenan ô simesa’ane mbamba biyoñ ô mbe ô lôtô’ô a bôte mia be be mi mbe mi bo’o mam mete. Jôm ete nje wo yen ayaé ya jô’é metum mete, a too ke na Yéhôva a vini me. (1 Bec. 10:20, 21) Ve nsili ô ne ñhe na: “Za nnye wo dañe nye’e: Ye Yéhôva, ye môt, nge ke jôm éfe éziñ?”

NYE’ANE WO DAÑE MINYE’ANE MISE

4. Jam ôsu da yiane tindi wo na ô duban é ne avé?

⁴ Abui mam da yiane tindi wo na ô nye’e Yéhôva. Éko éziñ ôsusua na wo yé’é Bible a Bengaa, ô mbe ô nga nye’e Mejô me Zambe abim éziñ. Ô mbe fe ô nga nye’e Yésus abim éziñ. Mbôl ô maneya fe yembane Bengaa be Yéhôva, wo nye’e ô tabe’e bisulane biap. Ve mam mete me nji yian asu na ô nyoñe ntyi’ane ya ve womiene ngumba a duban. Jam ôsu da yiane tindi wo na ô duban é ne nye’ane wo nye’e Yéhôva. Nge Yéhôva nnye wo nye’e a lôte jôm ése, teke jôm éziñ, nge môt é ne kamane wo na ô duban. Bi ne jô na nye’ane wo nye’e Yéhôva ô ne ane nja wo kee wo nya zene, zene ja ye volô wo na ô bo Yéhôva ésaé.

5. Jé bia zu yen ayé’é di?

⁵ Yésus a nga jô na bia yiane nye’e Yéhôva a nleme wongan ôse, a nsisime wongan ôse, a ngule jangan ése. (Marc 12:30) Jé é ne volô wo na ô nye’e Yéhôva a semé nye abim ete? Nge wo tu’a fas abim avé Yéhôva a nye’e wo, wo fe wo ye bo ntindane ya nye’e nye. (1 Jean 4:19) Ajô te, ayé’é di, bia zu yene mam môt a yiane bo asu na a nye’e Yéhôva édo’o nye’an, a duban.b

6. Kalate Beromain 1:20 a liti na jame da ya mam me ne volô bia na bi yeme Yéhôva é ne avé?

⁶ Yé’é na ô yeme Yéhôva a zene ya biôm a nga té. (Lañe’e Beromain 1:20; Nli. 4:11) Tame ve’ele fas abime fe’ é nga sili asu na Yéhôva a té bilok a betit. Fombô’ô fe nyule jôé womien a yen abim avé Yéhôva a nga yeme ta’a bibu’a bise ya été. (Bs. 139:14) Tame ve’ele simesan abime ngule Yéhôva a nga futi nlô jôbô, te vuane ki na nlô jôbô ôte ô ne ve ôteté wua ya bemilliard b’ateté Zambe a nga té.c (És. 40:26) Nge wo nyoñ éyoñe ya fase bitétéa bi Yéhôva aval ete, wo ye tu’a semé nye. E ne fo’o mfi na bi yeme na Yéhôva a ne fek a ngul. Ve asu na bi kôme yemete nye’ane bia nye’e Yéhôva a bo bemvôé bé, bia yiane yem abui mam afe a lat a nye.

7. Ndi nleme fé wo yiane bi asu na ô tu’a nye’e Yéhôva?

⁷ Da sili na ô tu’a bi ndi nleme na Yéhôva a nyoñe ngab a wo. Ye wo yen ayaé ya yebe na Nté biôm bise a yeme wo, a na a nyoñe ngab a wo? Nge é ne nalé, te vuane na Yéhôva “a nji bo môt ase ya be bia ôyap.” (Mam. 17:26-28, Mfefé Nkôñelan) Bible a jô na “a bi’ili minlem mise;” David a nga kate mone wé Salomon na ‘nge a jeñe Yéhôva, A ye yené be nye.’ Ngaka’a éte ja fombô fe bia. (1 Mka. 28:9) Nde fe na, nge wo yé’é yé’é Bible den, a ne amu Yéhôva Zambe émien ‘a nga dutu wo be nye.’ (Jr. 31:3) Nté wo ye ke ôsu a tu’a yemelane mam mese Yéhôva a bo asu dôé, nye’ane wo nye’e nye wo ye tu’a yaé.

8. Aval avé ô ne liti Yéhôva na wo fe wo nye’e nye?

⁸ Bi ne liti na bia fe bia nye’e Yéhôva éyoñe bia bo bi ye’elane nye. Ane wo ye ke ôsu a yooé Yéhôva nleme wôé, a ve nye akiba asu mam a bo asu dôé, wo ye kui na ô tu’a nye’e nye. Wônaa, éyoñe wo ye yen ane a ve wo mame wo sili nye meye’elan, élate mia nye ja ye tu’a bo ngul. (Bs. 116:1) Wo ye tu’a yemelan éyoñ éte na Yéhôva a wô’ô wo. Ve asu na ô kôme subu Yéhôva bebé, wo yiane dañe yé’é na ô yene mam ane nye. Wo yiane fe yemelane jé a yi na ô bo. Jé é ne volô wo? Ve Kalate Zambe étam.

9. Aval avé ô ne liti na wo semé Kalate Zambe?

⁹ Semé’é Kalate Zambe. Kalate Zambe étame nnye a ne kate wo benya mejôô a lat a Yéhôva a nsôñane wé asu dôé. Wo liti na wo nye’e a semé Kalate Zambe éyoñe wo lañe nye môs ôse, éyoñe wo kômesan ayé’é dôé, a éyoñe wo tôñe mame wo yé’é. (Bs. 119:97, 99; Jean 17:17) Ye ô bili fo’o ngume nta’ane mam asu nlañane Bible nga? Ye wo lañe fo’o Kalate Zambe môs ôse ya yôp?

10. Jam avé da bo na Bible a bo édima?

¹⁰ Jame da da bo na Bible a bo édima é ne na, bia koone minkañete mi bôte be nga nyiñ a Yésus été. Bible étame nnye a ne kôme kate wo beta jame Yésus a nga bo asu dôé. Nté wo ye ke ôsu a yé’é mame Yésus a nga jô a bo, nalé a ye tindi wo na ô kômbô bo mvôé jé.

11. Jé é ne volô wo na ô nye’e Yéhôva?

¹¹ Jeñe’e na ô nye’e Yésus. Nge wo nye’e Yésus, wônaa nye’ane wo nye’e Yéhôva wo ye fe yaé. Amu jé? Amu Yésus a nga kôme tune mefulu m’Ésaa. (Jean 14:9) Ajô te, nté wo ye ke ôsu a yé’é yeme Yésus, nye’ane wo nye’e Yéhôva wo ye fe tu’a bo ngul. Tame ve’ele yene ve aval Yésus a mbe a yeme’e tebe été bingôngole bi bôt ane minzôzoé, minkôkon, a ba be nji be be bili môt a kamane be. Tame fe ve’ele fase mbamba meleb a ve wo, a abim avé wo yene mfi ya été ényiñe jôé éyoñe wo tôñe me.​—Mt. 5:1-11; 7:24-27.

12. Wo ye tabe ntindane ya bo jé éyoñe wo ye kôme wô’ô jame Yésus a nga bo asu dôé?

¹² Wo ye tu’a beta nye’e Yésus éyoñe wo ye bindi beta jam a nga bo na a wu a butane mam abé môé. (Mt. 20:28) Nge wo kôme wô’ô na Yésus a nga kañese ve ényiñe jé asu dôé, nalé a ne tindi wo na ô jôban abé dôé a sili Yéhôva njaman. (Mam. 3:19, 20; 1 Jean 1:9) Wônaa, éyoñe wo ye kui na ô kôme nye’e Yéhôva ba Yésus, teke vaa nge beté, wo ye fe bo ntindane ya nye’e bemvôé bap.

13. Jé Yéhôva a ve wo?

¹³ Yeké’é na ô nye’e nda bôte Yéhôva. Bibu’a ya nda bôte jôé a minnôm bemvôé bôé be ne kate wô’ô ntyi’ane wôé ya ve womiene ngumba be Yéhôva. Be ne ne fe wosane wo. Nge da kui wo, tabe’e ndi na Yéhôva a veya wo beta nda bôte ya nsisim. Nge ô kôme kabetane bibu’a ya nda bôte jôé éte, womiene wo ye yen abim avé bia ye liti wo nye’an a su’u wo. (Marc 10:29, 30; Beh. 10:24, 25) Za a yem, bibu’a ya nda bôte jôé ya minsôn bi ne fe su’ulane kañe Yéhôva a tôñe memvinda mé.​—1 P. 2:12.

14. Tame kate bia avale womien ô nga yene mfi ya tôñe memvinda me Yéhôva ényiñe jôé avale 1 Jean 5:3 a jô?

¹⁴ Yeké’é na wo semé memvinda me Yéhôva a tôñe me ényiñe jôé. Éko éziñ ôsusua na wo yé’é yeme Yéhôva, ô mbe ô bo’o mam avale wo yi, ve den, womiene wo yene na memvinda me Yéhôva mme ma dañe mfi. (Bs. 1:1-3; lañe’e 1 Jean 5:3.) Tame tebe mone jôm a fas melebe Yéhôva a ve beyôm, beyal, bebiaé, a bongô. (Beép. 5:22–6:4) Nté ane ô nga taté na wo tôñe melebe mete, ye ô lôô na ényiñe ya nda bôte jôé ja tu’a bo mvaé? Ane ô nga taté na wo tôñe melebe ya Bible a lat a mewoso, ye wo yene na ô sôaneya abo dulu dôé nga? Ye ényiñe jôé ja dañ abeñ éyoñe ji? (Min. 13:20; 1 Bec. 15:33) Bia simesane na éyalane ya minsili mite mise é ne ôwé.

15. Jé ô ne bo nge ô nji tu’a yem aval ô ne tôñe miñye’elane miziñe ya Kalate Zambe?

¹⁵ Biyoñ biziñ, ô ne yen ayaé ya yemelan aval ô ne tôñe mame wo yé’é Bible. Jôm ete nje Yéhôva a belan ékôane jé na a ve wo bekalate be ne volô wo na ô yeme kandé mvaé ba abé. (Beh. 5:13, 14) Nge wo lañe bekalate bete a bindi mam me ne été, wo ye yen aval avé ô ne tôñe miñye’elane ya Bible bone be mam bese ya ényiñe jôé, a nalé a ye bo na ô tu’a kabetan ékôane Yéhôva.

16. Aval avé Yéhôva a nga mane ta’a bebo bisaé bé?

¹⁶ Yeké’é na wo nye’e ékôane Yéhôva a su’u je. Yéhôva a belane mekônda na a ta’a bebo bisaé bé ya si se; Yésus ki nnye a ne nlô ya mekônda mese. (Beép. 1:22; 5:23) Yésus a nga telé mone nsamba miñwo’an, mise befam, na mbe be wulu ésaé a bo si va den. A loone be na ‘Ôlo ô ne mewôk a fek.’ Ôlô ôte wo bo ki fianga a ésaé ô bili na wo ve wo bidi ya nsisim a kaman élate jôé a Yéhôva. (Mt. 24:45-47) Zene jia ôlo ôte wo belane je na ô bo ésaé éte é ne na, wo telé biwôlô befame bemvendé e mekônda, mfa’a ya na be yeme wulu me. (És. 32:1, 2; Beh. 13:17; 1 P. 5:2, 3) Bemvendé bete be ne meva’a ya nyume bebiene mam asu dôé, ba wô’ô mvaé ya ve wo ngule nyul a volô wo na ô ke ôsu a yemete élate jôé a Yéhôva. Ve beta jame mfe ba bo asu dôé a ne na, ba liti wo aval ô ne ye’ele bôte bevo’o Mejô me Zambe.​—Beép. 4:11-13.

17. Kalate Beromain 10:10, 13, 14 a liti na amu jé bia yiane kañete bôte bevo’o ajô Yéhôva?

¹⁷ Volô’ô bôte bevo’o na be nye’e Yéhôva. Yésus a nga jô beyé’é bé na be ye’ele bôte Mejô me Zambe. (Mt. 28:19, 20) Môt éziñ a ne de bo fo’o asu na a jalé abendé. Ve nté wo ye ke ôsu a nye’e Yéhôva, wo ye wô’ôtan ane nlômane Pierre ba Jean, mbe bete be nga jô môs éziñe na: “Bi se ngule ya bo te kobô mam bi nga yen a wôk.” (Mam. 4:20) Teke abui mam da soo bia mevak ane éyoñ bia kui na bi volô ve môte wua wua na a nye’e Yéhôva. Tame ve’ele simesan abim meva’a Philippe a nga wôk éyoñ a nga volô mia’a ya Éthiopie na ô yeme benya mejôô a duban! Ane Philippe, éyoñ wo fe wo tôñ atiñe Yésus a nga ve bia na bi kañete, wo liti na wo kômbô bo Ngaa Yéhôva. (Lañe’e Beromain 10:10, 13, 14.) Éyoñ éte nje fe ô nto ve sili womien ane mon Éthiopien na: “Jé ja kamane ma na me duban?”​—Mam. 8:36, Mfefé Nkôñelan.

18. Jé bia ye yen ayé’é da zu?

¹⁸ Teke ntyi’an éziñ ô ne mfi ényiñe jôé ane wu wo ye nyoñe na wo baptizôban. Jôm ete nje é ne mfi na ô nyoñ éyoñe ya tu’a fas atinane ya mbaptizô. Mam mevé wo yiane yem a lat a mbaptizô? Mam mevé wo yiane bo ôsusua na wo duban a éyoñ ô dubaneya? Bia ye yalane minsili mite ayé’é da zu.