Yemete’e ndi nleme jôé

1. Ndi nleme fé Yéhôva a nga ve bia?

YÉHÔVA a nga ve bia mbamba ndi nleme ya nyiñe nnôm éto. Bôte béziñe be bili ndi nleme ya ke nyiñe yôp été nnôm éto ane minsisime mi vo’o wu. (1 Bec. 15:50, 53) Ba bevo’o ki be bili ndi nleme ya nyiñe nnôm éto si va, be to mvo’é minsôn a meva’a été. (Nli. 21:3, 4) To’o na bi ke nyiñe nnôm éto yôp, nge ke si va ndi nleme jangan é ne édima asu dangan.

2. Jé é ne mbôka’a ya ndi nlem jangan, a amu jé bi ne jô nalé?

² Éfia “ndi nlem” Kalate Zambe a belane je, é ne tinane na e yange mbamba be mam ba ye boban. Bi ne tabe ndi na mame bia yange asu melu ma zu ma ye tôéban amu Yéhôva nnye a ka’ale me. (Bero. 15:13) Bia yeme na a nga bo ngaka’a a na a tôé bengaka’a bé kom ése. (Nb. 23:19) Bi to ndi na Yéhôva a bili nkômban a ngule ya bo mame mese a jô. Ajô te bia yeme na ndi nleme jangan é nji bo biyeyem nge ke befe’e, mbôka’a ya été ô ne mame bia yem a mam me ne été.

3. Jé bia zu yen ayé’é di? (Besam 27:14)

³ Ésa wongane ya yôp été a nye’e bia a a yi na bi tabe ndi a nye. (Lañe’e Besam 27:14.) Éyoñe ndi nleme bi bili be Yéhôva é ne ngul, bii kui na bi dañe minju’u bia tôbane mie den, a mi bii tôbane mie melu ma zu a ayo’o nlem a meva’a mese. Bi tame zu yen aval avé ndi nleme jangan é ne kamane bia. Bia zu taté yen amu jé bi ne ve’e ndi nleme jangan a atyi étyé ba afô’ôlô. Mvuse ya valé, bia zu yen mame bi ne bo asu na bi yemete je.

NDI NLEME JANGAN É NE ANE ATYI ÉTYÉ

4. Amu jé ndi nlem jangan é ne ane atyi étyé? (Behébreu 6:19)

⁴ Kalate a nga tili Behébreu, nlômane Paul ô nga ve’e ndi nleme jangan a atyi étyé. (Lañe’e Behébreu 6:19.) Mbôle Paul a mbe a bete’e be sitima asu na a ke mulu mé, a mbe a yeme’e na be wô’ô belan atyi étyé asu na sitima a tebe ne bip. Môs éziñe a mbe a bete sitima, ane beta ôkôs a nga taté. Nde a nga yen ane môt a mbe a dutu sitima a nga wua metyi m’étyé mendim été asu na sitima a bo teke ke jimbi mekok. (Mam Minlôman 27:29, 39-41) Aval ane atyi étyé da volô na sitima a bo te feñelan, ndi nleme jangan ja volô bia na bi tebe ne bip éyoñe bia tôbane minjuk mi ne ane beta ôkôs. Ndi nleme jangan ja volô bia na bi tabe ne mieññ éyoñe bia tôbane minjuk. Amu bi to ndi na mam ma ye kômeban melu ma zu. Te vuane na Yésus a nga jô na bii tôbane bitibila’a. (Jean 15:20) Ajô te éyoñe bia bindi ngaka’a jangane ya melu ma zu, nalé é volô bia na bi ke ôsu a bo Yéhôva ésaé.

5. Aval avé ndi nlem é nga volô Yésus éyoñe awu é mbe é tele’ nye ôsu?

⁵ Tame yen aval avé ndi nlem é nga volô Yésus akusa bo a mbe a yeme’e na a yiane wu awu mintaé. Môse Pentecôte ya mbu 33 É.J., Nlômane Pierre ô nga belan mbamba bifia bia koone bie kalate Besam mfa’a ya liti aval avé nlem ô mbe ô bôô Yésus si éyoñe a mbe a tôbane minjuk. A nga jô na: “minsône miam mi vee a mbunane ya mam ma ye boban ôsu amu wo ye li’i nsisime wom vôme ya miñwuan, nalé fe wo ye me’ete mba môte wôé a boé soñ.. .  Wo wo ye jalé ma a mevak asu dôé.” (Mam Minlôman 2:25-28; Bs. 16:8-11) Akusa bo Yésus a mbe a yeme’e na é wu, a mbe a to ndi na Zambe é wômôlô nye a na aye bi avak ya beta ke koone ésaé wé yôp été.​—Beh. 12:2, 3

6. Jé mojañe éziñ a nga jô a lat a ndi nlem?

⁶ Ndi nleme jangan é nga volô abui bobejañ a besita na be jibi minjuk. Bi tame zu yen éve’ela étôtôlô mojañ éziñ, Leonard Chinn a nyiñ Angleterre. Éyoñe beta bita bi ôsu bi nga taté, be nga futi nye mimbôk amu a nga bene ke bezimbi. Be nga taté nye ba’ale étam a to mfetan nda été ngon ébaé. Mvuse ya valé be nga bo na a saé ane éjakas. Mojañ ate a nga jô na: “minjuk me nga tôbane mie, mi nga volô ma na me yemelane na, ndi nleme ja volô bia na bi dañe minjuk. Bi bili éve’ela Yésus, minlôman, bekulu mejô a bi bili fe mbamba bengaka’a be ne Kalate Zambe été. Mame mete mese ma ve bia ngule ndi nlem asu melu ma zu a ngule ya jibi minjuk.” Ndi nlem é mbe ane atyi étyé asu Leonard é ne fe bo ane atyi étyé asu dangan.

7. Aval avé minjuk mia yemete ndi nleme jangan? (Beromain 5:3-5; Jacques 1:12)

⁷ Éyoñe bia jibi minjuk a yen ane Yéhôva a volô bia, bia yeme na a wô’ô bia mvaé. (Lañe’e Beromain 5:3-5; Jacques 1:12.) Nalé a bo na ndi nleme jangan é tu’a bo ngul a lôte éyoñe bi nga yem benya mejô. Satan a yi na minju’u mi te’e bia, ve a mvolane Yéhôva, bi ne dañe njuk ôse bi ne tôbane wô.

NDI NLEME JANGAN É NE ANE AFÔ’ÔLÔ

8. Amu jé bi ne ve’e ndi nleme jangan a afô’ôlô? (1 Bethessalonicien 5:8)

⁸ Kalate Zambe a ve’e fe ndi nleme jangan a afô’ôlô. (Lañe’e 1 Bethessalonicien 5:8.) Mone bezimbi a jaé afô’ôlô asu na mekoñe ma so be besiñe bé me bo teke nambe nye nlô. Mewosane mangane ya nsisim, bia yiane kaman asimesane dangan asu na Satan a bo teke wone bia. A belan abui mam asu na a ve’ele bia a ndaman asimesane dangan. Fo’o ve aval afô’ôlô da ba’ale nlô mone bezimbi, ndi nleme jangan ja ba’ale asimesane dangan asu na bi ke ôsu a wulu ba’aba’a a Yéhôva.

9. Jé ja kui bôte be nji bi ndi nlem?

⁹ Ndi nleme jangane ya nyiñe nnôm éto ja ye volô bia na bi bo mam a fek, a nyoñe mbamba mintyi’an. Ve nge ndi nleme jangan é ne nte’an a nge bia jô’é na mame ya minsôn mme me jaé ôsimesane wongan, bi ne vuane ndi nleme jangane ya nyiñe nnôm éto. Bi tame zu kobô ajô Bekristen béziñe be mbe be nyiñi’i Corinthe melu mvus. Be nga jañele mbunane be mbe be bili beta ngaka’a Yéhôva, ngaka’a ya ñwômane miñwuan. (1 Bec. 15:12) Paul a nga jô na bôte ba buni ki ñwômane miñwuan ba nyiñe fo’o ve na be jalé miñyiane miap ya minsôn. (1 Bec. 15:32) Den abui bôt e nji tabe ndi a bengaka’a be Zambe, ba jeñe ve na be bu’uban ényiñ ya éyoñe ji. Avale bôt ete da jeñe mimvôman a ômes. Ve bi bia selane be amu bi to ndi a bengaka’a Zambe a nga bo asu melu ma zu. Ndi nleme jangan é ne ane afô’ôlô amu ja ba’ale asimesane dangan. Ja volô fe bia na bi bo teke simesane ve biabebien amu fatan ényiñe éte é ne ndaman élate jangan a Yéhôva.​—1 Bec. 15:33, 34.

10. Aval avé ndi nleme jangan é ne volô bia na bi sa’ale mbia b’asimesan?

¹⁰ Afô’ôlô dangan é ne fe volô bia na bi sa’ale asimesane da wosane nkômbane Yéhôva. Éko éziñe môt a ne jô na: ‘Me vo’o bo nsamba bôt wo ye nyiñe nnôm éto. Me nji bo mbamba môt. Me bili ki ngule ya tôñe metiñe ya Kalate Zambe.’ Te vuane na Éliphaz mbia mvô’é Job fe a nga jô nye avale mame ete. A nga jô na: “Môt a ne za, ane a ye bo mfuban?” Mvuse ya valé, a nga kobô ajô Zambe a jô’ô na: “Ô lô a ne te tabe bôte bé be ne étyi mebun; ya, yôp ôbien ô nji bo mfuban mise mé.” (Job 15:14, 15) Ngo’o abime minsos ete! Te vuane na Satan nnye a yi na ô bi aval asimesan ete. A yeme na nge ô kele ôsu a fase nalé, wé taté na wo jañele ndi nleme jôé. Ajô te tita’ane minsos mite nleme wôé, a bem ôsimesane wôé bengaka’a be Yéhôva. Te ve’ele vuane na Yéhôva a yi na ô nyiñe nnôm éto. A na é volô wo na ô tôé nsôñan ôte.​—1 Tim. 2:3, 4.

YEMETE’E NDI NLEME JÔÉ

11. Amu jé bia yiane bo ôjibi nté bia yange na mame Yéhôva a ka’ale bia me tôéban?

¹¹ E nji bo tyi’ibi na ndi nleme jangan é bo ngul kom ése. Bi ne taté na bia yene na Zambe a ji’a ki tôé bengaka’a bé. Ve mbôle Yéhôva a to nnôm éto, bia be nye bi nji yen éyoñ avale da. (2 P. 3:8, 9) A ye tôé bengaka’a bé mbamba éyoñ, ve a ne bo teke bo de éyoñe bia bunan. Jé é ne volô bia na bi ba’ale ndi nleme jangane ngul nté bia yange na Yéhôva a tôé bengaka’a bé?​—Jc. 5:7, 8.

12. Aval Behébreu 11:1, 6 a liti, nja ôvé ô ne zañe ndi nlem a mbunan?

¹² Bi ne kui na bi ba’ale ndi nleme jangane ngul nge bia tabe Yéhôva bebé amu nnye a bo na é tôéban. Ajô te Bible a jô na beta nja a ne zañe ndi nlem a mbunan, bi bili na Yéhôva a ne, a na a ne “ñya’ane ya ba ba jeñe nye.” (Lañe’e Behébreu 11:1, 6.) Éyoñe Yéhôva é tu’a bo vevee mise mangan, nalé é tu’a yemete ndi nlem bi bili na é tôé bengaka’a bese a nga bo bia. Bi tame fe zu yene mame bi ne bo asu na bi tu’a yemete élate jangan a Yéhôva, ndembene ndi nleme jangan ja ye yem.

13. Aval avé bi ne subu Zambe bebé?

¹³ Ye’ela’ane Yéhôva a lañe Kalate wé. Akusa bo bi vo’o yene Yéhôva, bi ne subu nye bebé. Bi ne kate nye mame mangane meye’elan été bi to ndi na é vô’ôlô bia. (Jr. 29:11, 12) Bi ne vô’ôlô Zambe éyoñe bia lañe Kalate wé a bindi mame bia lañ été. Nté bia yé’é avale Yéhôva a nga nyoñe ngap a bôte be nga wulu ba’aba’a a nye melu mvus, mbunane wongan wo ye yaé a dañe bo ngul. Mame mese me ne Kalate Zambe “me nga tiliban mfa’a ya ñyé’ane wongan, nde, amu njiban a amu mvolane minleme ya mintilan, bia ye tabe ndi minlem.”​—Bero. 15:4.

14. Amu jé bia yiane bindi mame Yéhôva a nga bo asu bôte bevok?

¹⁴ Bindi’i avale Yéhôva a nga tôé bengaka’a bé melu mvus. Bi tame yene jam Zambe a nga bo asu Abraham a Sara. Be nga kui ôkala be nji be ngule ya beta bi bon. Ve Zambe a nga ka’ale be na ba ye bi mon. (Met. 18:10) Nde Abraham a nga bo aya? Bible a jô na: “A nga buni a ndi nlem, te yen a bili jôme ya tabe je ndi, nde te a ye bo ésa ya meyoñ abui.” (Bero. 4:18) Akusa bo na e mise me bôt jam ete e mbe e yené’é ane jam e vo’o boban, ve Abraham a mbe a bili ndi nleme na Yéhôva a ye tôé ngaka’a jé. Zôsôa môt ate a nji same. (Bero. 4:19-21) Avale minkañete ete da ye’ele bia na bi ne tabe ndi na Yéhôva é tôé bengaka’a bé bese, to’o jam ete da yené bia aval ayaé avé.

15. Amu jé bia yiane simesan mame Zambe a boya asu dangan?

¹⁵ Fase’e mame Yéhôva a nga bo asu dôé. Simesa’an abime bibotan ô biya amu bengaka’a be Yéhôva be ne Kalate Zambe été be nga tôéban. Éve’an é ne na Yésus a nga ka’a na Ésaa wé é jalé miñyiane miôé. (Mt. 6:32, 33) Yésus a nga ka’ale fe na Yéhôva a ye ve wo mbamba nsisime wé éyoñe wo sili nye. (Luc 11:13) Yéhôva a nga tôé bengaka’a bete. Avale te fe ô ne simesan bengaka’a a nga tôé asu dôé. Éve’an é ne na a nga ka’ale na é bo a jamé bikobe biôé, na é ve wo ngule nyul a na é jalé miñyiane miôé ya nsisim. (Mt. 6:14; 24:45; 2 Bec. 1:3) Éyoñe wo bindi mame Yéhôva a zuya a ve wo, ndi nleme jôé ja yem mfa’a ya mam é bo asu dôé melu ma zu.

VA’AK NDI NLEME JÔE ÉTÉ

16. Amu jé ndi nlem é ne édima das?

¹⁶ Ndi nleme jangane ya nyiñ nnôm éto é ne édima das da so be Yéhôva. Angôndô ya mbamba ényiñ a yange bia melu ma zu. A bi ne tabe ndi na mame mete mé boban. Ndi nlem éte é ne ane atyi étyé, nje ja volô bia na bi tebe ne bip éyoñe bia tôbane minjuk aval ane étibila’a to’o awu. Ndi nlem éte é ne fe ane afô’ôlô amu ja ba’ale asimesane dangan asu na bi sa’ale mame me ne abé a bo ma me ne mvaé. Ndi nleme jangan é bili mbôka’a Kalate Zambe été. Ja volô bia na bi subu Zambe bebé a yen abim avé a nye’e bia. Bia tu’a bu’ubane ndi nlem éte éyoñe bia ba’ale je a yemete je.

17. Amu jé ndi nleme jangane ja soo bia mevak?

¹⁷ Kalate nlômane Paul ô nga tili Bekristene ya Rome, a nga jô be na be ‘vak ndi nleme jap été.’ (Bero. 12:12) Paul a mbe ve vak amu a mbe a to ndi na nge a kele ôsu a wulu ba’aba’a a Yéhôva, é nyiñe nnôm éto yôp été. Bia fe bi ne vak a ndi nleme jangan amu bi to ndi na Yéhôva a ye tôé bengaka’a bé. Ntili Besam a nga jô na, “mvom é ne be nyu . . . ndi nleme jé é ne be Yéhôva Zambe wé . . . Nyô a ba’ale benya mejô nnôm éto.”​—Bs. 146:5, 6.