Minsili bôte ba sili
Beyé’é 70 Yésus a nga lôme na be ke nkañete be mbe vé éyoñ a nga telé Tawôlô Tate? Ye be nga mane li’i nye étam?
Teke amu éziñ a yiane bo na bi simesane na, mbôle beyé’é be Yésus 70 be nji be a nye ngô’é a nga telé Tawôlô Tate, nalé a tinane na a nga bene be, nge na be nga li’i nye étam. Nge Yésus ba be minlômane mié be mbe étam ngô’é éte, a ne fo’o ve amu a nga kômbô na mame me bobane nalé.
Émien a nga tobe minlôman 12 a beyé’é 70. A nga taté tobe befam 12 zañe nsamba beyé’é bé a loone be na minlôman. (Luc 6:12-16) A mbe Galilée éyoñ “a nga tôkane minlôman Awôm a mibaé.” A ‘a nga lôme mie, mi ke kañete foé ya Éjôé Zambe a saé minkôkon.’ (Luc 9:1-6) Mvuse ya valé e Judée, “a nga tobe beyé’é befe 70, a nga lôme be bebaé bebaé.” (Luc 9:51; 10:1) Asu’ulane ya été é mbe na, Yésus a mbe a bili beyé’é ba kobô ajô dé abui bevôm.
Bejuif be nga bo beyé’é be Yésus be mbe be ngenane be jeme’ek abô’ô Paska mbu ôse, éko éziñe nsamba a menda me bôte map. (Nkôl. 12:6-11, 17-20) Mon éyoñ ôsusua na a wu, Yésus ba be minlômane mié be nga ke Jérusalem. Ve a nji loone beyé’é bé bese be mbe Judée, Galilée a Pérée na be zu jeme Paska a be. Da kôme fo’o yené na Yésus a mbe a kômbô’ô tabe fo’o ve a minlômane mié ngô’é éte. A nga jô be na: “Me nga jaé kômbô di Paska nyu a mia ôsusua na ma tôbane minjuk.”—Luc 22:15.
Yésus a mbe a bili mbamba amu ya bo de. A mbe a ntoo bebé ya wu ane “Ntômba Zambe wo vaa minseme mi bôte ba nyiñe si.” (Jean 1:29) Jam éte é mbe na da ye bobane Jérusalem, vôme bone be Israël be mbe be bili fulu ya ve Zambe metuna’a. Abô’ô Paska é mbe é bo’o na be bo teke vuan avale Yéhôva a nga kôté be Égypte. Ve Yésus a mbe na a zu bo abui mam a zene ya metuna’a mé. A zene jé, bôte bese be nga ye kôtéban abé a awu. (1 Cor. 5:7, 8) Jame Yésus a nga bo é nga ve minlôman Awôm a mibaé fane ya bo mbôka’a ya ékôane bekristen. (Éphé. 2:20-22) Mbamba jam a ne na Jérusalem, tison é ne étyi é bili “meko’o 12 ya mbôka’a.” E meko’o mete yôp, be nga tili “biyôlé 12 bi minlôman 12 mi Mone ntômba.” (Nlitan 21:10-14) Ôwé, minlômane mi nga wulu ba’aba’a a nye mi mbe na mia ye bi beta mbe’e mfa’a ya na nkômbane Zambe ô tôéban. Bi ne ñhe wôk amu jé Yésus a mbe a yiik na ba be minlômane mié be kandane di abô’ô Paska nsamba, a mvuse ya valé na be bo Tawôlô Tate.
Beyé’é 70 a beyé’é bevo’o be nji be abôk éte a Yésus. Ve beyé’é bese be nga liti na ba wulu ba’aba’a a nye be nga yene mfi ya abô’ô Yésus a nga telé: Tawôlô Tate. Ane éyoñ é nga lôt, beyé’é bese be nga wulu ba’aba’a a nye be nga su’ulane bo miñwo’on a bo benyoñe ngabe ya élat asu Éjôé, ajô ébiene Yésus a nga kobô minlômane mié ngô’é éte.—Luc 22:29, 30.