Bela’ane Kalate Zambe ane ngobô

Ñyé’é Jacques a nga ve’e Kalate Zambe a ngobô a volô na bi kôme yeme biabebien. (Jacq. 1:​22-25) Aval avé bi ne belane Kalate Zambe ane ngobô?

Kôme’e futi nleme mame wo lañ. Nge bia wua mise ngobô bi ji’a ki vaa, bia ye ke yene beta be mame bia yiane kôme nyule jangan. Avale te da da nge bia lañe Kalate Zambe avôl avôl, bia ye ke yeme mame bia yiane tyendé binyiñe biangan.

Fombô’ô bevôme womiene wo yiane tyendé, te fombô bôte bevok. Biyoñe biziñ éyoñe bia fombô ngobô, bi ne fe yene bôte bevok a taté na bia dañe fombô mame me nji yiane nyule jap nge ke mbote wop. Avale te da da éyoñe bia lañe Kalate Zambe, bi ne taté na bia yene mbia mefulu bôte bevo’o ba yiane tyendé. Ve nalé a ye ke volô bia na bi tyendé mbia mefulu mangan.

Yeme’e minné miôé. Nge bi dañe beme mise ve mame me ne abé nyule jangan éyoñe bia fombô ngobô, nalé a ne bo na bi wô’ô nlem abé. Nté bia lañe Kalate Zambe, bia yiane yeme minné miangan. Bi nji yiane jeñe na bi bo mame ma lôte bia nkôñ, a lôt abime Yéhôva a sili bia.—Bsa. 103:14.