Ba be bili “mbamba été nsisim” ba ye kañese

1. Aval avé bôte be wô’ô bo éyoñe bia kañete be? (Mame minlôman 13:47, 48; 16:14, 15)

NTETE mimbu ôsu, abui bôt é nga kañese benya mejôô ve nné ane be nga wô’ô foé be nga kañete be. (Lañe’e Mame minlôman 13:47, 48; 16:14, 15.) Aval éte da da den, bôte béziñe be ne mevak éyoñe ba wô’ô mbamba foé éyoñ ôsu. To’o ba ba bisi ki mbamba foé ya éjôé atata’a be wô’ô su’ulane kañese nye a nlem ôse. Jé bia yiane bo éyoñe bia tôbane bôte be bili “mbamba été nsisim” éyoñe bi ne nkañete?

2. Aval avé ésaé ya bo bôte beyé’é ja funane ji mbé mefup?

² Bi tame nyoñe mon éve’an. Ésaé ya bo bôte beyé’é é ne funane ji mbé mefup. Nge ébuma éziñ é ntoo étôtôlô, da ye sili na mbé mefup a taté je koé to’o a ngenan a bé afube dé. Aval éte da da, nge bia tôbane môt a bili nkômbane ya wô’ô benya mejôô, bia jeñe na bi volô nye été été na a bo ñyé’é Yésus. Nté bia bo de, bia yiane ke ôsu a bo ôjibi a bôte ba sili abui éyoñ asu na be kañese foé bia kañete be. (Jean 4:35, 36) Mbamba ñyenane mam a ye volô bia na bi yeme kañete bôte ba vô’ôlô bia. Bi tame zu yene jame bi ne bo asu na bi volô bôte be bili mbamba nkômbane ya vô’ôlô mbamba foé éyoñ ôsu bia kañete be. Bia zu fe yene aval avé bi ne volô be na be ke ôsu a yaé nsisim.

AVALE BI NE VOLÔ BÔTE BA NYE’E BENYA MEJÔÔ

3. Jé bi ne bo éyoñe bia tôbane môt a bili nkômbane ya wô’ô benya mejôô éyoñe bi ne ésaé nkañete? (1 Becorinthien 9:26)

³ Éyoñe bia tôbane bôte be bili nkômbane ya wô’ô benya mejôô éyoñe bi ne ésaé nkañete, bia yi été été na bi volô be na be wulu zene ya ényiñ. Éyoñe bia tôban avale bôt éte, bi nji yiane jañele éyoñe na bi taté ayé’é a be a bañete be bisulane biangane to’o a ne éyoñ ôsu bia tôbane be le.—Lañe’e 1 Becorinthien 9:26.

4. Kañete’e nlañe ngone minga é mbe é bili nkômbane ya taté ayé’é ya kalate Zambe été été.

⁴ Taté’é ayé’é. Bôte béziñe bia tôbane be nkañete, be bili nkômbane ya taté ayé’é été été. Éve’an é ne na, ngone minga éziñe ja nyiñe Canada é nga tebe ata’a bekalate môse beletô éziñ, ane é nga nyoñe nsoé kalate Bu’uban ényiñ nnôm éto! Sita a mbe ata’a bekalate a nga jô nye na nsoé kalate ôte wo ve nye fane ya yé’é kalate Zambe zezé. Ngone minga éte é nga nye’e jam éte ane é nga ve nye nombo nkole jé. Môs ôte ôbien a nga tili sita ate kalate a sili nye éyoñe ba ye taté ayé’é. Éyoñe sita a nga sili nye nge be ne yenane memane me sondô, ngone minga éte é nga jô nye na: “Ô lôô môse ya akiti aya? Amu me yoo.” Be nga taté ayé’é môs ô nga tôé valé, môse nkul éwônga. Mona minga ate a nga tabe ésulane memane ya sondô ate. Éyoñ ôsu le a nga tabe ésulane Bengaa be Yéhôva, a nga yaé nsisim angôndô ya avôl.

5. Aval avé bi ne liti fulu atyeñe meyen éyoñe bia kômbô taté ayé’é a môt? (Fombô’ô fe befôtô.)

⁵ É ne été na, môt ase a ye ke bo ôjeja’a ya taté ayé’é aval ane mona minga bia te jôô nye yôp. É ne sili bôte béziñ abui éyoñ. Éko éziñe da ye sili na bi taté minlañ a minlô mejô mia nambe be minlem. Bi ne su’ulane yene na, mvuse étun éyoñ, nge bia ba’ale mbamba été nsisim a liti be nye’an, bi ne taté ayé’é a be. Jé bi ne jô éyoñe bia kômbô taté ayé’é a môt? Bi nga sili abui bobejañ a besita ba yeme taté meyé’é nsili ôte.

6. Bifia bivé bi ne belane bie éyoñe bia kômbô taté ayé’é a môt?

⁶ Bekañete mbamba foé a bekpwa’a mefane bi nga sili avale ba taté meyé’é, be nga yalane na, mesi méziñ, bia yiane sa’ale bifia a ne “ayé’é,” “ayé’é Kalate Zambe,” nge ke “e ye’ele wo” éyoñe bia kobô môt ajô ayé’é. Be nga yene na, bifia ane “e laane minlañ,” a “e jeñe na bi yeme mame me ne Kalate Zambe,” mbie bi ne yian. Ô ne kee minlañ ôsu ô jô’ô na: “A ne fo’o jame ya kam éyoñe bia yen avale Kalate Zambe a yalane beta minsili ya ényiñ,” nge ke “Ye ô mbe ô yeme’e na Kalate Zambe a su’u ki ve na a kobô ajô Zambe, a ve fe bia mbamba melep asu ényiñe ya môs ôse?” Ô ne beta kô’ôlane na: “Da sili ki abui éyoñ, minutan 10 nge 15 mi ne yian asu na bi yé’é mfefé jam.” Nté bia bo de bi nji bo ntindane ya belane bifia ane “ma ye beta zu jome wo” nge ke “sondô ase,” amu nalé a ye bo na be wô’ôtane na bi nga kômbô bete be adite mbe’e bitul, na bia ye bo bi za’a kañete be éyoñ ése.

7. Éyoñ évé nje abui bôt é nga kañese benya mejôô éyoñ ôsu? (1 Becorinthien 14:23-25)

⁷ Bañete’e be bisulan. Melu me nlômane Paul, a ne ve ane bôte béziñe be nga kañese benya mejôô éyoñe be nga taté tabe ésulan. (Lañe’e 1 Becorinthien 14:23-25.) Avale mam éte da kui fe melu ma. Abui beyé’é Kalate Zambe da ji’a yaé nsisim éyoñe ba taté na ba tabe bisulan. Nde ñhe, éyoñ évé nje bia yiane bañete be bisulan? Kalate Bu’uban ényiñ nnôm éto! a kobô ajô bisulane nlô ajô 10, ve bi nji yiane yange na bi taté kui nlô ajô ôte asu na bi bañete be bisulan. Bi ne de bo môs ôsu bia tôbane be, éko éziñe bi ne be kate nlô ajô ya nkañete ya mengana bôt, nge ke jam éziñe bia ye yene Nkume mmombô a bete ya sondô ate.

8. Jé bi ne kate môt éyoñe bia bañete nye bisulane biangan? (Ésaïe 54:13)

⁸ Éyoñe bia bañete môt a nye’e benya mejôô éyoñ ôsu bisulan, bia yiane liti nye nsela’ane a ne zañe bisulane biangan a bi a jaé zu a tabe. Môs éziñ, minga éziñ a mbe a yé’é Kalate Zambe a nga tabe ayé’é Nkume mmombô a bete éyoñ ôsu, a nga sili ñye’ele wé na: “Ye môt a wulu ayé’é a yeme bôte bese ba biyôlé?” Sita ate a nga yalane nye na, bia Bengaa bia jeñe na bi yeme biyôlé bi bôte bese be ne ékôane bekristene fo’o ve ane bia yeme biyôlé bibu’a ya menda me bôte mangan. Ñyé’é Kalate Zambe ate a nga kôme yene beta nsela’ane a ne zañe Bengaa be Yéhôva a ñyebe wé. Aval éte da da, abui bôte da yene nsela’ane ate éyoñe ba tabe bisulane biangan éyôñ ôsu. (Lañek Ésaïe 54:13.) Bia sulane vôma wua asu na Yéhôva a ye’ele bia, na bi kañe nye, a na bi veane ngule nyul. (Héb. 2:12; 10:24, 25) Amu nalé, bisulane biangane bi ne mbamba nta’an, tyi’ibi a teke abui ajô. (1 Cor. 14:40) Be nga futi mbamba éfufube meba m’Éjôé mangan amu bia sulan été na bia zu yé’é. Nde fe bisulane biangane bia su’u ki ngame pôlitik éziñ amu bia nyoñe ki ngap a mame me pôlitik. Bisulane biangan, bia kobô ki mame me pôlitik nge suk ôsimesane môta binam éziñ. É ne bo mfi na bi liti môt a zu taté ayé’é Kalate Zambe vidéo a ne nlô ajô na; Jé ja boban Aba Éjôé été? Nalé a ye volô nye na a yeme jame da yange nye.

9-10. Éyoñe bia bañete môt ésulan, jé bia yiane bo asu na bi bôé nye nleme si? (Fombô’ô fe fôtô.)

⁹ Abui bôte da ko woñe ya zu tabe bisulan amu ba simesane na nge be zu tabe ésulane jangane bia ye yemete be na be zu nyiine Bengaa. Ajô te bôé môte wo te bañete nleme si, kate’e nye na sa ke mbôl a tabe ésulane Bengaa nde a mba’a mba’a ve bo mone bengaa, môt ase a yi a ne fili ya zu tabe bisulane biangan, nde fe bia tindi ki môt éziñe na a ve éyalane nge a nji kômbô. Bia bañete menda me bôte bisulane biangan, to’o menda me bôte me bili ayôme bongô. Bia bo ki ésulane bongô mfa’a wua, ji benya bôtô mfa’a ôvok, bia bese bia yé’é fufulu. Nalé a volô na bebiaé be bemele nge ke fombô bone bap a na be yeme mame ba ye’ele be. (Deut. 31:12) Bia sili ki bôte moné nge yemete be na be bo mimvean. Bia tôñ abendé Yésus di: “Mi nga nyoñ e zezé, mia fe va’ané e zezé.” (Matt. 10:8) Bi ne fe nye jô na, asu na a tabe bisulane da sili ki na a jaé biyé bi ne dia. Amu nleme môte ñwô Zambe a fombô, sa ke avale môt a yené atan.—1 Sam. 16:7.

¹⁰ Nge môt a zu tabe ésulan, bo’o jam ése ô ne ngule ya bo asu na a wô’ôtane nye’an. Bo’o na bemvendé a bobejañ a besita bevo’o be batane nye. Nge a wô’ôtane nye’an, nalé a ye bo na a bi nkômbane ya beta so. Éyoñ ésulane ja lôt, nge a nji bi Kalate Zambe, ô ne bo na mia nye mi lañe bifuse Kalate Zambe wôé, a volô nye na a yeme tôñe miñye’elane nté mbo nkañete nge ke môt a wulu ayé’é a timine mam.

AVALE BI NE VOLÔ ÑYÉ’É KALATE ZAMBE

11. Aval avé bi ne liti na bia semene bôte ba vô’ôlô bia?

¹¹ Mame mevé bia yiane ba’ale ôsimesan éyoñe bia bo môt ayé’é? Te vuane na môte mia nye mia yé’é Kalate Zambe a bili fe mame mefe ya bo. Éve’an é ne na, nge mia te telé ngum awolo nge ngume môs asu ayé’é, seme’ene de to’o ba dañe ki semen awolo vôm ô too. Nde fe te nyoñ abui éyoñ, éyoñ ôsu mia nye mia yé’é. Abui mintyeñtyeñe bekañete mbamba foé da yene na é ne mfi ya tyik ayé’é ôsu étun, to’o ñyé’é Kalate Zambe a ngenan a kômbô’ô kee minlañ ôsu. Te dañe kobô abui. Va’a ñyé’é Kalate Zambe fane ya kuli mam me ne nye nlem.—Mink. 10:19.

12. Nsôñane ôvé bia yiane bi éyoñe bia taté ayé’é a môt?

¹² Éyoñe bia taté ayé’é a môt, nsôñane wongane wo yiane bo na bi volô nye na a yeme Yéhôva ba Yésus a na nye’an a nye’e be ô yaé. Dutu’u ôsimesane wé e Kalate Zambe sa ke ñyemane wôé. (Mame minlôman 10:25, 26) Nlômane Paul ô ne mbamba éve’ela mfa’a ôte, amu ô nga beme miñye’elane mié be Yésus Krist, nnye ate Yéhôva a nga lôme na a zu volô bia na bi yem a nye’e nye. (1 Cor. 2:1, 2) Paul a nga kôme fe be liti mfi ya volô mimfefé beyé’é na be bi mbamba mefulu be ne vek a or, argent nge meko’o me ne édima. (1 Cor. 3:11-15) Mbamba mefulu mete me ne, mbunan, fek, atyeñe meyen, a woñe Yéhôva. (Bsa. 19:9, 10; Mink. 3:13-15; 1 P. 1:7) Bia fe bi ne vu Paul éyoñe bia ye’ele bôte na be bi ngule mbunan a ngul élat a Ésa wop ya yôp.—2 Cor. 1:24.

13. Aval avé bia liti na bi ne ôjibi a na bia tebe été bôte bia be be bia yé’é? (2 Becorinthien 10:4, 5) (Fombô’ô fe fôtô.)

¹³ Bia vu Yésus éyoñe bi ne ôjibi a éyoñe bia yeme tebe été bôte bevok. Sa’ale minsili mi ne bo na a wô’ô ôson. Nge nalé a sili, ô ne taté dañe nlô ajô éziñ a kate wôk, a lôte na ô jeñ a ngul ése na a kañese wô, va’a nye éyoñ asu na benya mejôô be nambe nye nlem. (Jean 16:12; Col. 2:6, 7) Kalate Zambe a ve’e bivuse miñye’elan a “mbia be asimesane” bia jeñe na bi titan. (Lañe’e 2 Becorinthien 10:4, 5; Nkobô Grec, éfia be nga kôñelane na “mbia be asimesan” é ne fe tinane na “beta nkum” a yiane tyamban.) Mbôle é nji bo tyi’ibi asu ñyé’é Kalate Zambe na a jô’é mam a mbe a taté buni den a ntoo abui mimbu. Nde ñhe bia yiane nye volô a ôjibi ôse na a beta bi a buni mimfefé miñye’elan a na a yé’é na a tabe ndi a Yéhôva. Éyoñ éte ñhe a ye bo ngule ya jô’é mam a mbe a taté buni.—Bsa. 91:9.

AVALE BI NE VOLÔ BÔTE BA ZU TABE BISULANE BIANGAN

14. Aval avé bia yiane nyoñe bôte ba zu tabe bisulane biangan éyoñ ôsu?

¹⁴ Yéhôva a nji bo ôbangam, nde a yi na éyoñe bôte ba zu tabe bisulane biangan, bi bo te fombô ayoñe dap, metume map, nge nkôñ ényiñe wop. Bia yiane nyoñe bôte bese a nye’an. (Jacq. 2:1-4, 9) Nde, aval avé bi ne de bo?

15-16. Aval avé bi ne liti bôte ba zu tabe bisulane biangan éyoñ ôsu nye’an?

¹⁵ Bôte béziñe be wô’ô zu tabe bisulane biangane fo’o ve amu ba kômbô yen aval mame ma boban, nge ke amu môte ba yem a te lebe be na be bo de. Nde bi nji yiane ko woñe ya nyoñe be a ôsesa a nye’an ôse. Tame’e be mbamba nsôan a ôsesa ve te beté ôdo’é. Ô ne tabe vôma wua a be. Nge be nji bi Kalate Zambe nge bekalate bisulane befe, ô ne bo na mi belan émbôé nge jeñe na be bi émbap. Nde fe, liti’i be ésemé. Môt éziñ a nga zu Aba Éjôé éyoñ ôsu a nga jô mojañ a nga nyoñe nye mbé na a wô’ô ôson amu a be’e ki mbamba biyé ane bôte bevo’o bese. Mojañ a nga bôé nye nleme si a jô nye na Bengaa be ne ane bôte bevok. Môt ate a nga su’ulane bo Ngaa Yéhôva, a a nji ve’ele vuane mbamba éyalane mojañ a nga ve nye. Ve, bia yiane tabe ntyele ya fa’a binyiñe biap éyoñe bia laan a be atata’a nge memane ya ésulan.—1 P. 4:15.

¹⁶ Bi ne fe bo na bôte bete be wô’ôtane nye’an éyoñe bia belane mbamba bifia biyalane bia ve, minlañe bia laane a be, éyoñe bia kobô ajô bôte be nji bo Bengaa nge ajô mbunane wop. Bia yiane sa’ale bifia bia funane meta nge bi bia liti na bia biasé be. (Tite 2:8; 3:2) Bi nji yiane ve’ele belane bifia bia liti na bia biasé mame ba buni. (2 Cor. 6:3) Ajô te bobejañe ba bo minkañete ya mengana bôte ba yiane kôme véé mise mfak ôte. Ba liti na ba tebe été jap éyoñe ba kôme timine bifia nge mame me ne ayaé ya wôk asu dap.

17. Nsôñane wongan ô ne ôvé éyoñe bia tôbane bôte be bili “mbamba été nsisim” ésaé nkañete?

¹⁷ Ésaé ya bo bôte beyé’é, é ne ésaé ja yiane boban avôl avôl avale mimôse mia lôt, a bia ke ôsu a tôbane bôte be bili “mbamba été nsisim asu ényiñe ya nnôm éto.” (Mame minlôman 13:48) Éyoñe bia tôban avale bôt éte bi nji yiane jañele éyoñ, bia yiane bañete be bisulan a taté meyé’é a be. Nge bi bo de, bia ye volô be na be taté dulu dap e zene ja “kee bôt ényiñ.”—Matt. 7:14.