Te vuane ye’elan asu bôte bevok

1. Aval avé bia yeme na meye’elane mangane me ne mfi mise me Yéhôva?

MEYE’ELANE me ne beta mvom: Yéhôva a nga ve beéngele abui mimbe’e miziñ. (Bsa. 91:11) A nga ve fe Mone wé beta mimbe’e. (Matt. 28:18) Ve za a nga ve mbe’e ya vô’ôlô meye’elane mangan? Teke môt! Yéhôva étame nnye a ne ngule ya vô’ôlô meye’elan. Yéhôva “Nyu a wô’ô meye’elan,” a nyoñ éyoñe ya vô’ôlô meye’elane me môt ase ya be bia.—Bsa. 65:2.

2. Aval avé nlômane Paul ô nga liti na ô ne mbamba éve’ela mfa’a ya ye’elane asu bôte bevok?

² É ne été na bi ne ye’elane Yéhôva asu mame ma ndeñele bia, ve bia yiane fe ye’elan asu bôte bevok. Nlômane Paul ô ne mbamba éve’ela mfak ôte, éve’an é ne na, éyoñ a nga tili ékôane bekristene ya Éphèse a nga jô na: “Ma ke ôsu a tote môé menane meye’elane mam.” (Éphé. 1:16) Paul a nga ye’elane fo’o asu abui bôt, ve a nga ye’elane fe asu mingum mi bôte miziñ. Éve’an é ne na a nga jô Timothée na: “Ma ve Zambe akiba, ... teke vuane simesane wo meye’elane me nja’ane mam alu ba môs.” (2Tim. 1:3) Paul a mbe fo’o a bili abui minjuk é nga tyelé nye nleme yôp. (2 Cor. 11:23; 12:7,8) Ve a nga nyoñ éyoñe ya ye’elan asu bôte bevok.

3. Jé é ne bo na bi vuane ye’elan asu bôte bevok?

³ É ne kui biyoñe biziñe na bi vuane ye’elan asu bôte bevok. Amu jé? Sita Sabrinaa a yalan a jô’ô na: “Melu ma, ényiñ é ne njalan a abui mam. Minju’u bia tôbane mie mi ne bo na bi vuane ye’elan asu bôte bevok a simesane ve biabebiene meye’elane mangan.” Ye jam éte é kuiya wo biyoñe biziñ? Nge é ne nalé, ayé’é di é ne volô wo. Ayé’é di da zu liti bia (1) amu jé é ne mfi na bi ye’elan asu bôte bevok a (2)aval avé bi ne kui na bi bo de.

AMU JÉ BIA YIANE YE’ELAN ASU BÔTE BEVOK?

4-5. Aval avé meye’elane mangan asu bôte bevo’o “me ne ngul”? (Jacques 5:16)

⁴ Meye’elane bia bo asu bôte bevo’o “me ne ngul.” (Lañe’e Jacques 5:16.) Ye ntyendan éziñ ô ne bobane binyiñe bi bôte fo’o ve amu bia ye’elan asu dap? Mvo’é mvo’é! Akusa bo Yésus a mbe a yeme’e na nlômane Pierre wo ye kate nye, a nga jô nye na: “Me nga bo meye’elane me nja’an asu dôé na mbunane wôé ô bo te tek.” (Luc 22:32) Paul fe a mbe a yeme’e na meye’elane mangane me ne volô. Éyoñ a mbe mimbô’ô Rome, Paul a nga tili Philémon na: “Me too ndi na a zene ya meye’elane menan, ma ye beta bo fili ya zu be mia.” (Philém. 22) Ôwé, Paul a nga su’ulane kui mimbôk a ke ôsu a kañete.

⁵ É ne été na, éyoñe bia ye’elan asu bôte bevok, a nji bo ane Yéhôva a mba’a mba’a ve bo jame bia yi. A yen abim avé bebo bisaé bé ba liti na ba nyoñe ngap a bobenyañe bap éyoñe ba ye’elane asu dap, a biyoñe biziñ a ne tyi’i na a yalane meye’elane mete. A jam éte ôsimesan, bi ne ye’elane Yéhôva a nlem ôse a tabe ndi na émien a ye kôm ajô éte avale da yian a mbamba éyoñ.—Bsa. 37:5; 2 Becorinthien 1:11.

6. Aval avé ôsimesane bi bili a lat a bôte bevok ô ne tyendé éyoñe bia ye’elan asu dap? (1Pierre 3:8)

⁶ Éyoñe bia ye’elan asu bôte bevok, nalé a volô na bi “wô’ane mintaé.” (Lañe’e 1Pierre 3:8.) E wô’ô môte mintaé a tinane na bia yeme nju’u môt ate a tôbane wô a bi bili nkômbane ya volô nye. (Marc 1:40,41) Michael, mvendé éziñ a jô na: “Éyoñe ma ye’elan asu miñyiane mi bôte bevok, nalé a volô ma na me yeme minju’u ba tôbane mie a nye’ane ma nye’e be wo tu’a bo ngul. Ma wô’ôtane ve ane élate jangane ja tu’a bo ngul, to’o bebiene ba yeme ki nalé.” Richard, mvendé éfe a kate bia mfi ya ye’elan asu bôte bevok a jô’ô na: “Éyoñe bia ye’elan asu môt, nalé a volô na bi tu’a bi nkômbane ya volô môt ate. A éyoñe bia bo mame méziñ asu na bi volô nye, a ne ve ane Yéhôva a belane bia na bi yalane meye’elane mangan.”

7. Aval avé éyoñe bia ye’elan asu bôte bevok, nalé a volô na bi bo teke simesane ve biabebien? (Bephilippien 2:3,4) (Fombô’ô fe befôtô.)

⁷ Éyoñe bia ye’elan asu bôte bevok, nalé a volô na bi bo teke simesane ve biabebien. (Lañe’e Bephilippien 2:3,4.) Môt ase ya be bia a tôbane minjuk amu bia nyiñe mbia émo Satan nyi. (1 Jean 5:19; Nlitan 12:12) Éyoñe bi bili mbamba fulu ya ye’elan asu bôte bevok, nalé a volô na bi bo teke vuane na, “bobenyañe [bangane] ya si ése be fe ba tôban avale minjuk éte.” (1 P. 5:9) Kathérine, nkpwa’a mefan éziñ a jô na: “Éyoñe ma ye’elan asu bôte bevok, nalé a volô ma na me yeme na be fe ba tôbane minjuk a na me bo teke dañe bem ôsimesane wom fo’o ve minju’u miam.”

MEYE’ELANE MANGANE ME NE BE MFI

8. Bi ne ye’elan asu za?

⁸ Bi ne ye’elan asu za? Bi ne ye’elan asu; minkôkon, bisoé bia tôban ékpwe’ela a étibila’a sikôlô, nge ke asu ba be ne mintutuñ amu be ntoo minnôm. Abui bobejañe ya nsisime da tôban étibila’a é so’o be bibu’a ya menda me bôte map nge ke be bijôé. (Matt. 10:18,36; Mame mi. 12:5) Bôte béziñe be nga tube male map amu bita. Ba bevo’o ki be nga tôbane beta bibubua. Bi ne bo teke be yem, ve éyoñe bia ye’elan asu dap bia liti na bia tôñ atiñe Yésus da jô na bi “nye’esan.”—Jean 13:34.

9. Amu jé bia yiane ye’elan asu bobejañe ba wulu ékôane Yéhôva a asu binga bap?

⁹ Bi ne fe ye’elan asu bobejañe ba wulu ékôane Yéhôva. Nsamba ôte bi ne lañe bobejañe ya Tin ékôan a bevolô bap, bobejañe ba tebele bewofise ya bebéthel, bobejañe ba tebele bisaé bia bobane bebéthel, bejome bikôane bekristen, bemvendé a bevolô. Minleme mi tyele abui ya été yôp asu dangan. (2 Cor. 12:15) Éve’an é ne na, Mark, nnye ate a ne njome bikôane bekristen a jô na: “Jame da dañe bo na me tyelé nleme yôp é ne amu ma nyiñe ôyap a bebiaé bame be ntoo minnôm, be too fe mintutuñ. Akusa bo kale jame ba nnôme ba nyoñe ngap a be, nleme wo taé ma angôndô amu ma kate kui na me bo mame méziñ asu dap.” To’o bia yeme minju’u bobejañe bete ba tôbane mie, to’o bi nji yeme mie, bia yiane ye’elan asu dap. (1 Thes. 5:12,13) Bi ne fe ye’elan asu binga bap amu ba volô bobejañe bete na be be’e beta mimbe’e miap.

10-11. Ye Yéhôva a kañese meye’elane mangan asu bobejañ to’o éyoñe bi nji tote môé map? Timi’in.

¹⁰ Avale bia te yen, bi wô’ô ye’elan asu bobejañ a besita. Éve’an é ne na, bi wô’ô ye’elane Yéhôva éyoñ ése na a volô bobejañe bese be ne mimbôk, nge ba be bili mewu akusa bo bi nji yeme be. Donald a ne mvendé a jô na, “bi bili aka’a abui bobejañ a besita ba tôbane minjuk aval é ne na bi wô’ô ye’elan asu be bese éyoñe jia.”

¹¹ Ye Yéhôva a kañese ñhe avale meye’elan éte? Mvo’é mvo’é! Mbôle bi nji yeme minju’u mise bobejañe ba tôbane mie, bi ne ye’elan asu be bese éyoñe jia. (Jean 17:20; Éphé. 6:18) Avale meye’elan éte da liti nye’ane bi bili asu “bobejañe bese ya nsisim.”—1 P. 2:17.

ÉYOÑE BIA YE’ELAN ASU MINGUME MI BÔT

12. Aval avé fulu atyeñe meyen é ne volô bia na bi yeme mame bi ne sili Yéhôva asu bôte bevok?

¹² Fombô’ô bité bôte ba bômane wo be tele. É ne fo’o mvo’é na bi sili Yéhôva na a volô nsamba bobejañ a besita éziñ, ve da ye dañe bo bo mvo’é nge bia tote môé map meye’elane mangan. Ye wo yeme môt éziñe ya ékôane bekristene jôé a juan a ngul ôkon? Ye ésoé éziñe wo yeme ja bili atek amu minjuk a tôbane mie sikôlô? Ye wo yeme mbiaé éziñ a ve mengule ya yale bone bé “melep […] a miñye’elane mi Yéhôva,” akusa bo a ne étam? (Éphé. 6:4) Fulu atyeñe meyene ja ye volô na, nye’ane wo nye’e bobenyoñ ô yaé a na ô bi nkômbane ya ye’elan asu dap.b—Rom. 12:15.

13. Aval avé bi ne ye’elan asu ba bia tu’a ke yem?

¹³ Tote’e môé map éyoñe wo ye’elan. Bi ne ye’elane to’o asu ba bi ngenane teke tame yene môs éziñe bi tote’e môé map. Aval avé bi ne bo de? Bia koone môé me bobejañ a besita be ne mimbô’ô mesi ane, Crimé, Érythrée, Russie, a Singapour, anjeñe mefoé dangan, jw.org.c Brian, njome bikôane bekristen éziñ a jô na: “Éyoñe ma tili môé me bobejañ a besita be ne mimbôk a tote me yôb été, nalé a volô ma na me simesane be éyoñe ma ye’elan.”

14-15. Jé é ne volô bia na bi yeme mame bi ne sili Yéhôva meye’elan?

¹⁴ Kôme’e kate Yéhôva mame wo yi. Michael, bia te jôô nye yôp a jô na: “Éyoñ ése ma lañe minkañete mi bobejañe be ne mimbô’ô bia koone mie jw.org, me wô’ô jeñe na me ve’ele tebe été jap. Ma yeme na nge ma me tele aval été éte, nleme wo ye bômbô ma si nge ma yeme na ba nyoñe ngap a minga wom. Mfasan ôte wo volô ma na me yeme mame me ne sili Yéhôva asu bobejañe be ne minlu’ane be ne mimbôk.”—Héb. 13:3.

¹⁵ Éyoñe bia ve’ele simesan aval ényiñe bobejañe bete é ne bo ayaé mimbôk, nalé a ne volô na bi yeme mame bi ne sili Yéhôva asu dap. Éve’an é ne na, bi ne ye’elan asu na beba’ale mimbô’ô be bo mbamba nlem a be, nge ke na bijôé bi jô’é na bobejañe be kañe Yéhôva fili été. (1Tim. 2:1,2) Bi ne fe ye’elan asu na mbunane bibu’a ya bikôane bekristene bi bobejañe bete ô tu’a bo ngul, nge ke na bôte ba kañe ki Yéhôva be ne mimbô’ô be yene mbamba ntabane wop a kañese benya mejôô. (1 P. 2:12) Mfasan ôte ô ne fe bia volô na bi ye’elan asu bobejañ a besita ba tôban avale minjuk afe. Bia ye liti na ‘nye’ane wongane wo fuluku’ éyoñe bia tote môé me bobejañe meye’elane mangan, éyoñe bia kôme kate Yéhôva jame bia yi, a éyoñe bi bili fulu atyeñe meyen.—1 Thes. 3:12.

MBAMBA ÑYENANE MAM A LAT A MEYE’ELANE MANGAN

16. Jé é ne volô bia na bi bi mbamba ñyenane mam a lat a meye’elane mangan? (Matthieu 6:8)

¹⁶ Avale bia te yen, meye’elane mangane me ne bo nya mfii asu bobejañ a besita. Ve bia yiane bi mbamba ñyenane mam. Éyoñe bia ye’elan, a nji bo ane nge bia kate Yéhôva mfefé jam éziñe nge kate nye aval a yiane bo jame si jame ka. Yéhôva a yeme miñyiane bebo bisaé bé bese ôsusua na bia, nge ke na bebiene ba yeme mie. (Lañe’e Matthieu 6:8.) Nde ñhe, amu jé bia yiane ye’elan asu bôte bevok? Nge bi vaa abui beamu bia te yen ayé’é di, beta amu mfe a ne na, a ne zene jia ya liti na bia nyoñe bôte bevo’o ngap. Nye’ane ñwô wo tindi bia na bi ye’elan asu bôte bevok. A Yéhôva a ne angôndô ya mevak éyoñ a yen ane bia nyoñe ngap a bôte bevok.

17-18. Bi ne ve’e meye’elane mangan asu bobejañ a jé?

¹⁷ Akusa bo meye’elane mangane me ne bo te tyendé jam éziñ, ve ma liti na bia nye’e bobejañ a besita a Yéhôva a wô’ô nalé mvaé. Bi ne ve’e meye’elane mangan a nda bôt é bili bone bebaé, mona fam a mona minga. Tame ve’ele simesane na mona fam a bôô énoñ ôkon. Éyoñ éte mona minga a jô ésa a yônô’ô na: “Éngôngol a pa, bo’o jôm éziñ asu ndôme jam, a ne ngule nkôkon!” Akusa bo ésa a maneya bo nta’ane mam asu na a volô mone wé a kon amu a nye’e nye a nyoñe fe ngap a nye, ve a ne mevak éyoñ a yen ane nlem ô tyele ngo jé yôp asu ndôm.

¹⁸ Nne ñhe Yéhôva a yi na bi bo nalé, a yi na bi nyoñe ngap a bobejañ a ye’elan asu dap. Mboon ôte wo ye liti na, bia simesane ki fo’o ve bia bebien, a Yéhôva a wô’ô jam éte mvaé. (2 Thes. 1:3; Héb. 6:10) Nde fe, avale bia te yen ayé’é di, to’o meye’elane mangane me ne tyendé jam éziñe nge momo, bia yiane ke ôsu a ye’elan asu bobejañ a besita.